Qazırgı üi qyzmetşısınıŋ de jūmysy jeŋıl emes. Būryndary üi şaruasyna kelgende qazaqtyŋ bäibışesınıŋ är kezde kömekşısı bolǧan. Abysyn-ajyny, kelın-kepşık, körşınıŋ kempırı degendei kısı qolyn qajet etetın jaǧdaida janaşyry janynan tabylǧan. Bügıngınıŋ tırlıgı basqaşa. Köbısı jūmysbasty. Bai-baǧlandardyŋ keibır erketotailary üi şaruasyn döŋgeletıp alyp kete almaidy. Bıraq ol mın emes, ülgermei jatsa üi qyzmetşısın şaqyrta qoiady. Būl – aǧylşyn tılınen «clean» tazalyq degennen şyǧatyn kliningtık biznes ökılderı. Iаǧni üi tazalap, eden juyp, kır şaiyp, qazan qainatyp as pısıretın ämbebap jandar.
Olardyŋ statusy elımızdıŋ Eŋbek zaŋynda körsetılgen. Bar qyzmetı eŋbek şartymen rastalyp, jūmys beruşınıŋ arasyndaǧy jeke eŋbek daulary taraptar kelısımımen nemese sotta şeşıledı delıngen. Alaida ekı jaqtyŋ da äreketterın kuälandyratyn eŋbek şartyn jasauǧa eşkım qūlyqty emes. Qūlyqty bolmaidy da, öitkenı üi qyzmetşılerı de, ony jūmsaityndar da būl tırlıktı jeke şaruasy retınde qaraidy. Kısıge jaldanuşy da qūqyǧyn qumaq tügıl öz mındetındegı qyzmetterdıŋ tızbegın de anyqtap, oǧan tölenetın aqynyŋ da auqymyn bıle bermeidı. Ärkım oi-örısı men älıne qarai bıtıp bolmaityn kündegı küikı tırlıktıŋ tızgının özınşe alyp jürıp, mädenietın de özınşe qalyptastyryp jatyr. Būl jerde bıreudıŋ qūlaq kestı qūlyna ainaluǧa da, ne bolmasa öz qūqyǧyn aiaqasty etpei, qarym-qatynasty laiyqty därejede ornatyp jūmysyn jürgızuge bolady. Bıraq būl el qyzyǧatyn mansap emes. Sol sebeptı de amaly joqtar men studentter ǧana kelısedı.
Äzırge üi qyzmetşısınen bır ǧana närse talap etıledı: ol bar-joǧyn bıldırmei, dybysyn şyǧarmai üş mezgıl tamaǧyn ıstep, ydys-aiaǧyn syldyrlatpai juyp, as üidıŋ bar jūmysyn jolǧa qoiyp, jatyn bölmelerdı juyp alyp, aiyna bır-ekı ret esık-terezenı juyp, kılem qaǧyp tazalap alu kerek. Osy üşın kelısılgen aqysyn alady. Az qarajat emes. Sol sebeptı tolyq jūmys künıne jūmysqa alyp, ışıp-jeitının de moinyna ılıp, üi egesımen bırge tūratyn qyzmetşını jaldau qymbatqa tüsedı.
«Men ekı bırdei otbasynda tūraqty türde baryp-kelıp üi şaruasyn bıtırıp jürmın. Ol aldaǧy üş künnıŋ tamaǧyn äzırlep, üidı jinap, kiımderdı juyp, ütıktep oryn-ornyna qoiyp ketemın. Kısınıŋ üiıne kelıp aqysyna jūmys jasap jatqannan keiın özıŋnıŋ şaruaŋdy ūmytasyŋ. Qazır otymen kırıp, suymen şyǧatyndai alyp bara jatqan tırlık joq, bärı avtomat. Sonda da sol üidıŋ bır adamyna ainaluyma bıraz uaqyt kerek boldy. Bır-bırımızge senım de kerek, ärkım öz ornyn bılgen jön. Eŋ bastysy, ıştegı kedergını jeŋu kerek. «Hoziaikam» telefon ūstaǧanymdy jaqtyrmaidy. Alǧaşynda renjitın edım, keiın üirenıp kettım. Bastysy, jaqsy «hoziaika» tabu qiyn, olarǧa da jaqsy qyzmetşı tabu oŋai emes. Osy jerde müddelerı toǧysqan jandar bır-bırınıŋ köŋılın qaldyrmai kündelıktı tırlıktı jeŋıldetuge bar küşın salady. Būl jūmystyŋ da mänı sol» deidı Dana. Joǧary bılımdı maman elge oralǧan soŋ, laiyqty jūmys taba almai osy käsıppen ainalysyp jür eken. Ol jūmysynyŋ qūpiiasymen bölısuge qūlyqty bolmai, «eŋ bastysy, kımge qyzmet etseŋız de, otbasynyŋ ışkı ahualyn böten adamdarǧa aitpaǧan dūrys dedı. Tüsınıktı. Būl da özın-özı eŋbekpen qamtyp, nanyn tauyp jürgenderdıŋ – basty qaǧidasy.
