Tura bır aptadan keiın, 19 qaraşa künı Täuelsızdık saraiynda «Kazakhstan Kids Fashion Show-2016» atty balalar sän körsetılımı ötedı. Joba neden bastau aldy? Oǧan daiyndyq qalai ötude? Sūraqtardyŋ tüiının tömendegışe tarqatyp köruge tyrystyq.
TÖRT JASYNAN TALPYNYP JÜR
– Būl jobany bız 2014 jyldan bastap qolǧa aldyq. Alǧaşqyda kiım dükenderımen jūmys jasadyq. Sol uaqytta «Balalardy qaidan kiındıremız?» degen mäsele aldymyzdan şyqty. Sebebı balalarǧa arnalǧan sän toptamalary joqtyŋ qasy bolatyn. Al bügınde Aidarhan Qaliev, Maiia Jūmanbekova, Dinara Chakarova, Zarina Akşulakova syndy maitalmandar jäne Samidel, ILATI, Vesta, Glasman, KaroMeli, LOGOVO sän üilerı balalarǧa arnap kiım ülgılerın ūsyna bastady, – dep sän körsetılımınıŋ bas prodiuserı, belgılı jurnalist Mahabbat Esen äŋgımesın bastady.
Bırınşı jyly şouǧa 70-ke juyq bala qatysty. Qazırgı taŋda jobaǧa qatysuǧa niet bıldırgenderdıŋ qarasy köbeidı. Osy jyly 318 baladan 111-ın ırıktep aldy. Jobaǧa tört jastan bastap, on alty jasqa deiıngı balalar qatysady. «Maŋyzdysy – ärkımnıŋ atalmyş şaraǧa öz qūlqymen keluınde» deidı jobanyŋ kreativ prodiuserı, kasting direktory Jūldyz Seisenbekova. İä, körsetılımge joldama alǧan künnen bastap bala jauapkerşılıktı sezınedı. Jai ǧana sahnaǧa şyǧyp, oiyn körsetemın degen oi bolmaidy. «Kids Fashion Show» balalardy kışkentaiynan jan-jaqty boluǧa jeteleidı. Kerek bolsa, sūraqtarǧa jauap berıp, özın är qyrynan tanytuǧa daiyn bolady. Bala sahnaǧa şyqqan kezde belgılı bır obrazǧa enıp, teatrlandyrylǧan qoiylym qoiady. Sondai-aq, bi bilep, 20 metrlık sän şeruınen ötıp ülgeredı. Ärine, nömırdı tastai etıp jasau üşın käsıbi mamandardyŋ kömegı qajet, sol sebeptı balalarmen ekı ai boiy jūmys jüredı. Osy tūsta bärı balanyŋ eŋbegıne bailanysty ekenın tüsınu qajet. Eger bala qalamasa, äke-şeşe onyŋ şeşımıne äser ete almaidy.
– Bır quantarlyǧy, är jyl saiyn er balalar jobamyzǧa köptep qatysyp jatyr. Bügınde ūldardan 40 qatysuşymyz bar. Köbı būl jobany uaqytşa mümkındık dep qabyldamaitynyn baiqauǧa bolady. Alǧan bılımderın ärı qarai jalǧastyryp, diplomatiialyq mektebımızge jazylady. Boiyndaǧy senımdılıktı arttyryp, oqu ülgerımın jaqsartady. Uaqyttyŋ qadırın tüsınedı, – deidı Jūldyz.
KASTİNGTE TAŊǦALDYRUDAN TARTYNBAIDY
Balalar kastingten sürınbei ötu üşın taŋqaldyrudan jalyqpaidy. Osy joly ırıkteuge bır qyz qaǧazdan jasalǧan köilektı kiıp kelgen eken. Keibır jaǧdaida qatysuşylar kümänmen keledı, qazylar alqasyna sūraq qoiudan taiynbaidy. «Qoiylymnyŋ maǧan berer paidasy qandai?» degen saual kökeilerınde jüredı.
«Ekınşı talap – tür-älpettıŋ kelısuı» deidı ūiymdastyruşylar. «Balanyŋ aty bala. Qatty ärlemei-aq, jalt-jūlt etken kiımdı kigızbei-aq bala boiyndaǧy jalyndy körsetuge bolady. Bızdıŋ maqsatymyz da soǧan saiady. Tek qana balalarǧa emes, käsıbi mamandarǧa da talap qataŋ. Üzdıkterdı taŋdap aldyq. Mäselen, «KaroMeli» atty sän üiı balalardyŋ kiım-keşegınen bastap, aiaq-kiımıne deiın tıgedı. Al Aidarhan esımdı jıgıt otandyq jün men kaşemirmen jūmys ısteidı» dep sözın sabaqtady Jūldyz.
SAHNA JIGER BEREDI
Balalar kiımımen bärı tüsınıktı bolǧan siiaqty. Endı bi jaǧyna kım jauapty? Daiyndyq barysyn öz közımızben köru üşın studiiaǧa bettedık. Täp-tättı balalar horeografpen bırge bilep jatqannyŋ üstınen tüstık. Ärkım ūstazdarynyŋ aitqan nūsqaulyǧyn, jasaǧan qimyldaryn barynşa ainytpai qaitalauǧa tyrysyp jatyr. Är qimyldy balaǧa oiyn arqyly jetkızıp jatqanyn baiqadyq. «Narūl, sen tigrdı sal», «…Endı kölık aidaǧandai bol» degen sözder estılıp jatty.
Balany bige üiretudıŋ öz erekşelıgı baryn horeograf jasyrmady. Bi mūǧalımı Tūrsynai Erkenbaeva jetıstıkke jetudıŋ joly – balaǧa senım bıldıru deidı. Ömırge jaŋa qadam basqandarǧa «Qolyŋnan barlyǧy keledı!» degen söz kädımgıdei jıger beretın bolyp şyqty.
Kışkentailar baryn salyp, bi bilep jatqan kezde, bölmenıŋ ar jaǧynda olardyŋ äke-şeşesın kördık. Solardyŋ bırı – alty jasar Ersūltannyŋ anasy Aqtotymen äŋgımelesudıŋ sätı tüstı. «Būl jobaǧa bız alǧaş ret qatysyp otyrmyz. Bız üşın osynau şara ülken jaŋalyq deuge bolady» dep bastady ol. – Ūlym üş jasynan bastap barlyq üiırmelerge üiır: bi bilep, än aitady, sportpen ainalysady. Mūnyŋ barlyǧy balamnyŋ damuyna oŋ äser etetınıne senemın. Ol bırden «Mama, teledidardan körıngım keledı» dedı. Aitqanyna qūlaq astym. Būl joba bala armanynyŋ oryndaluyna sep bolaryna senemın. Jobada basqa da balalarmen tanysyp, qoǧam belsendısıne ainalyp jatyr. Keibıreulerı besıkten belı şyqpaǧan balany tanymaldyqqa äuestendırme dep söguı mümkın. Alaida balamyz öz uaqytyn tiımdı ötkızedı, tabiǧatynan ūqypty, tärbielı. Berıp jatqan mümkındıktıŋ de sūrauy baryn bıledı. Äkesı de temırdei tärtıptıŋ adamy» dep qaiyrdy sözın jas ana.
İä, «bolar bala – besıkten» deidı qazaq. «Kazakhstan Kids Fashion Show» jobasy köptegen büldırşınderdıŋ jūldyzyn jandyrǧany talai ret däleldendı. Ūl-qyzdardyŋ dauystaryn radiodan estıp, jüzderın jarnamalyq bilbordtan körgen bolarsyz. Būnyŋ barlyǧy bala eŋbegın paidalanyp, qarjy jinaqtau maqsatynda emestıgın Mahabbat basa aitty. Özı de 7 jasarlyq ūldy tärbielep otyrǧan ana. «İdeiany äu bastan-aq balam üşın jüzege asyrdym. Ol menıŋ barlyq bastamalaryma atsalysyp, basy-qasymda jüredı» dep aǧynan jaryldy ol.
Biylǧy şou Täuelsızdıgımızdıŋ 25 jyldyǧyna arnalyp, «Qazaqstanda jasalǧan» ūranymen ötedı.
Güldana TALǦATQYZY
