Bügınde qorǧanys salasyndaǧy äskeri qyzmet pen sport baspaldaǧyn qatar baǧyndyryp jürgen azamattar az emes. Ondai azamattardyŋ bırazy äskeri qyzmettıŋ auyrlyǧy men qauyrttyǧyna qaramastan, ärtürlı halyqaralyq deŋgeidegı bairaqty bästerde eldıŋ namysyn qorǧap, jülde alyp kelude.
Sondai azamattyŋ bırı – elorda tūrǧyny, qorǧanys salasynyŋ qyzmetkerı Timur Spataev. Timur Spataev bügınde Astana qalasy Qorǧanys ısterı jönındegı bırıktırılgen basqarmasynyŋ zaŋdy tūlǧalarmen jūmys jönındegı toptyŋ basşysy bolyp qyzmet ısteidı. Jastaiynan sportty serık etken keiıpkerımız – qol küresınen halyqaralyq dərejedegı sport şeberı. «Öz basym jastaiymnan sportqa beiım bolyp östım. Kürestım, kökparǧa tüsıp, bäige şaptym. Jasym 17-ge tolǧanda käsıbi türde sportpen, naqtysyn aitqanda, qol küresımen ainalysa bastadym. Būl eŋbegım, ärine, aqtausyz qalǧan joq. Bırneşe märte halyqaralyq deŋgeidegı jarystarǧa qatysyp, jüldemen oraldym» deidı keiıpkerımız.
Sport şeberınıŋ, kuboktary men maqtau qaǧazdaryn qospaǧannyŋ özınde, jarystardan jeŋıp alǧan medaldarynyŋ ūzyn sany 70-ke juyq. Köbın el ışındegı jarystardan alǧan. Qaruly Küşter salasyndaǧy äskeri qyzmetşıler arasynda chempionattarda top jarǧany üşın berılgen jüldelerı de jeterlık. Qaharmanymyz üşın būl jüldelerdıŋ ışındegı eŋ ülkenı ärı qūndysy – İran elınen jeŋıp alǧan altyn medal. Öitkenı būl Aziia chempionatynda bas jülde üşın köp ter töguge tura kelgen edı. Aziianyŋ nebır myqtylary jinalǧan jarys boldy. Alaida tögılgen maŋdai ter men artynda jeŋıs tılep kütıp otyrǧan tuǧan elınıŋ namysy alyp şyqty. Qarsy kelgennıŋ bärın qaqyrata jeŋıp şyǧady. Nätijesınde bairaqty bästıŋ bas jüldesı qanjyǧasyna bailandy. «Gorgan qalasynda ötken būl jarysqa «Qazaqstannan sportşylar kele jatyr» degen habardy estıp, sol elde tūratyn qazaqtar kelıp, janküier boldy. Qazaqstannyŋ kök bairaǧyn köterıp tūryp ūrandatty. Tıleules bolyp, namysymdy qairady. Būl menı jeŋıske itermeledı» deidı sportşymyz sol bır sättı esıne alyp. Közge jas üiırerlık mūndai jaǧdai keiınnen Özbek elınde ötken chempionatta qaitalanypty. «Alǧa, qazaq!», «Alǧa, Qazaqstan!» degen ūran Timurdyŋ ruhyn qairap, jüldelı orynǧa köterıluıne mümkındık beredı.
Sonymen qatar, Timur Spataevtyŋ qol küresı ǧana emes, futboldan, şaŋǧy tebuden, suǧa jüzuden ūtyp alǧan jetıstıkterı de jeterlık. «Qaruly Küşter qataryna alynyp, forma kigen ekensıŋ, bärıne daiyn boluyŋ kerek! Äskeri mındet eşteŋege qaramaidy. Tapsyrma berıldı me, oryndap, jeŋıp şyǧuyŋ kerek! Sport ta sol sekıldı.
Atam qazaq «jıgıtke jetı öner de azdyq etedı» demeitın be edı? Bala kezınen auyldyq, audandyq deŋgeidegı «Jıgıt sūltany» baiqaularynda top jaryp jürgen ol osydan bırneşe jyl būryn «Habar» arnasy ötkızgen äskeri qyzmetkerler arasyndaǧy «Jıgıt sūltany» baiqauynda jeŋımpaz atanyp, rasynda da, osy atqa äbden laiyq ekenın tüpkılıktı däleldep berdı.
Änşılıgı men aqyndyǧy da bır töbe. 2015 jyly Qaruly Küşter arasynda ötken patriottyq änder baiqauynda «Avtorlyq än» nominasiiasy boiynşa 1-oryn alady. «2011 jyly Täuelsızdık taqyrybynda öleŋ jazǧanym bar edı. Keiın əuenın jazyp, artynşa aranjirovkasyn jasatyp, baiqauǧa qatystym. «Avtorlyq än» nominasiiasy boiynşa 1-oryn aldym. Baiqau Beibıtşılık jəne kelısım saraiynda öttı» deidı Timur Spataev.
Aitpaqşy, Timurdyŋ zaiyby da halyqaralyq dərejedegı sport şeberı. Qūdai qosqan jarynyŋ aty – Qarlyǧaş İsrailova. Mamandyǧy – temırjol salasynda injener-energetik. Qol küresten halyqaralyq deŋgeidegı sport şeberı. Būl ataqqa Ündıstanda ötken Aziia chempionatynda bas jülde alǧan soŋ qol jetkızgen. Ärı būl ataǧyn segız jyl boiy ūstap keledı. Aty älem chempionattarynda top jaryp jürgen sportşylardyŋ qatarynda atalady.
«Bız äuletımızben sportşy bolǧandyqtan, barlyq jarystarǧa bırge baramyz. Sport ūtu men ūtyludan tūrady. Bıraq ärqaşan jeŋudı maqsat tūtamyz. Jetıstıgımız de az emes. Bız baqytty otbasymyz. Bır ūl, bır qyz tärbielep otyrmyz. Balalarymyz da sportqa beiım bolyp ösıp keledı» deidı Qarlyǧaş İsrailova.
Bürkıt NŪRASYL
