Gauhar MOLDAŞEVA
«Astana aqşamy» gazetınıŋ köp balaly otbasylardyŋ jaǧdaiyn eskerıp, mäsele köterıp otyrǧany menıŋ de ümıtımdı jaqqandai.
Men 2009 jyly jas otbasylarǧa arnalǧan memlekettık tūrǧyn üi baǧdarlamasyna qatysyp, baǧym janǧan edı. Baǧdarlamadan ötkenımızben üş jyl üiımızdı kütıp, 2012 jyly baspanaly boldyq. Bıraq ol kezde menıŋ üş balam bar edı. Al bızge berılgen päter bır bölmelı ǧana bolyp şyqty. Bız «nege bır bölme berıldı, nege balalarymyz dūrys eseptelmedı?» dep «Nūr Otan» partiiasynyŋ, qalalyq tūrǧyn üi basqarmasynyŋ, banktıŋ – bärınıŋ ǧimaratynyŋ tabaldyryǧyn tozdyrdyq. Bıraq «osyǧan da şükır deŋız. Bolmasa üiden bas tartyŋyz» degen jauap aldyq. Sonda da baǧdarlama ärı qarai jalǧasatyn şyǧar, bızge üiımızdı keŋeituge mümkındık berıletın şyǧar degen ümıtpen üiımızdı aldyq. Öitkenı odan bas tartsaq, bız jas otbasy retınde üi ala almaityn edık.
Al qazır menıŋ bes balam bar. Balalarymyzdyŋ aldy 10-synypta oqidy. Bır balamyz 9-synypty bıtırıp, oquǧa tüsıp otyr, student. Jalpy, otbasymyzdaǧy jetı adam 34 şarşy metrlık bır bölmelı päterde tūryp jatyrmyz. Şiettei bala-şaǧamen tar üide tūrudyŋ qandai qiyn ekenın basynan ötkızgender ǧana bıletın şyǧar.
Men jaǧdaiymyzdy aityp basqarmaǧa da, bankterge de baryp jürmın. Būrynǧy baǧdarlama jabylyp, qazır jaŋa jobalar qabyldanyp jatyr eken. Bıraq olardyŋ qaisysyna barsaq ta, bızge esık jabyq. «Būryn päter alǧansyŋdar, sender endı qūjat tapsyra almaisyŋdar» deidı. Bız bes balamen bır bölmede tūratynymyzdy aityp, üidı keŋeituge mümkındık beruın sūrasaq, «ondai zaŋ joq» deidı. Onymen qoimai, «üiıŋız joq emes, bar, soǧan da şükır deŋız» dep özıme aqyl aitady. Bızge myna üilerıŋdı satyp, aqşa qosyp, basqa üi aluǧa ǧana mümkındıkterıŋ bar deidı.
Köp balaly otbasynda üige aqşa jinau mümkın be özı? Ai saiyn men 10 myŋ teŋge ǧana järdemaqy alamyn. Ol bır balamyzdyŋ balabaqşa aqysyna da jetpeidı ǧoi. Baqşada tölemaqyǧa jeŋıldık joq, onymen qoimai jinaityn aqşasy, satyp alatyn kıtaptary taǧy bar.
Menıŋ oiymşa, «Astana aqşamy» oryndy mäsele köterıp otyr. Gazetterıŋızde Läilä Qūndaqbaeva jazǧandai, bank memlekettık baǧdarlamamen üi bergende är bala tuǧan saiyn, üi baǧasyn ne prosentın jeŋıldetuı kerek. Sonymen bırge, köp balaly otbasyna ainalǧan jaǧdaida bız sekıldı küi keşpeuı üşın azamattardyŋ päterın keŋeituıne jol aşyluy tiıs. Äitpese, qazırgı baǧdarlamalar qanşa jalaulatyp aitqanymen, qazaqqa «mysyqtıleu» adamdardyŋ jasaǧany siiaqty. Bır-ekı bölmelı üidı kreditke alyp, sony tölep bıtkenşe, jiyrma jyl boiy qazaq bala süimei me? «Qaiyr qylsaŋ, bütın qyl» degen bar. Memlekettık baǧdarlamany qaita qarap, köp balaly otbasylardyŋ bır ne ekı bölmelı ǧana päter alyp qalǧan jaǧdaida üiın keŋeituge mümkındık berılse jäne bala sanyna qarai üi baǧasynyŋ paiyzyn jeŋıldetudı engızse, talai otbasy baqytty bolar edı.
