Betmennen Alpamysqa auysaiyq…

Juyrda «Balapan» telearnasy efirınen aqyn Baianǧali Älımjanov: «Şeteldık multfilmderge, fantastikalyq keiıpkerlerge qyzyǧyp qajetı joq. Ondai qaharmandar qazaqtyŋ folklorynda tolyp jatyr. Sony ülgı etu qajet» dep edı. Keşe Mädeniet jäne sport ministrlıgı ökılderı «Etnoauyl» ūlttyq-mädeni keşenıne jurnalisterge baspasöz turyn ūiymdastyrdy.Sonda jürıp, Baianǧali Älımjanov aitqan keiıpkermen kezdestık. Osynda ötetın mädeni şaralardyŋ negızgısı retınde «Alpamys» teatraldy-sirk şouy 1 mausymnan bastap 3 ai boiy körsetıledı. 70 ärtıs qatysatyn qoiylymnyŋ daiyndyǧymen tanystyq.
Aldymen Alpamys naiza, qalqanymen öner körsettı. Qasynda qyr qyzdary bilep jür. «Suǧa salsa batpaityn, otqa salsa janbaityn» äue gimnasttary aspandaǧy auany ainala sekırıp, öner körsettı. Būl tamaşa şoudy Mädeniet jäne sport ministrlıgı arnaiy ötkızıp otyr. Zalda 1000-ǧa tarta körermen keremet qoiylymdy tamaşalai alady. Būl jönınde ministrlıktıŋ baspasöz hatşysy Aidar Qyryqbaev: «Şaraǧa 7 memleket öz ökılderımen, önerpazdarymen keledı. Şoudan bölek, būl auylda üş ai boiy audaryspaq, teŋge ılu syndy ūlttyq oiyndar oinalady. At sportynan jarystar ötedı. Bızdıŋ sportşylar da, önerpazdar da saqadai-sai» dedı.
Baspasöz tury barysynda 2500 şarşy metrge jaiylǧan aimaqpen, «Şeberler auyly» sektory, «Sporttyq-sirktık şaralar» mekenı, «Konserttık zal», «Demalys alleiasy», «Dästürlı qazaq jäne şyǧys taǧamdary meiramhanasy», «Ūlttyq dästür-salt» sektory, «Jıbek joly Şyǧys bazary», «Aŋşylyqtyŋ dästürlı türlerı» oryndarymen tanystyq. Bärı daiyn, soŋǧy tekseru jūmys­tary jürıp jatyr.
Osy ıstıŋ basy-qasynda jürgen «Qazaq äuenderı» AQ vise-prezidentı Säken Şakeev: «Şou ruhani jaŋǧyrǧanymyzdy baiqatady. Alpamysty basty keiıpker retınde tegınnen tegın alǧanymyz joq. Bızdıŋ balalar Betmendı emes, özınıŋ Alpamysyn ülgı tūtuy tiıs. Qazaq tarihynyŋ eŋ köne jäne jūmbaq betterınen bastau alatyn batyr turaly ǧajap aŋyz jelısı ejelgı Bozoq qalasynyŋ boiynda ötedı» dep atap öttı.
Alpamystyŋ rölınde – Darhan Kambyşev oinady. Şoudyŋ tylsym sazǧa tūnǧan muzyka avtory – Janbolat Ädılov. Ol – «Ūlytau» tobynyŋ köptegen kompozisiialaryn jazǧan önerpaz. Al rejisserı – Sergei Kozin.
Bır erekşelıgı, körermen üşın «Trapesiia mektebı» jūmys ısteidı. Mūnda özın äuede synap körgısı kelgen adam aşyq aspan astynda qalyqtauǧa jäne auada gimnastikalyq triukter jasauǧa mümkındık alady.
«Etnoauyl» sonadaidan körıngende-aq, qazaq ekenıŋdı tanytady. Ruhtanyp ketetınıŋ anyq. Al Alpamys sol ruhqa jıger üstei tüsetını sözsız.