Qaz KSR halyq ärtısı, Qaz KSR Memlekettık syilyǧynyŋ iegerı Şara Jienqūlovanyŋ 110 jyldyǧyna arnalǧan «Qamajai» I respublikalyq horeograftar baiqauy öz märesıne jettı.
Būl baiqau jyl boiy elımızdıŋ öŋırlerın aralap, horeograftardyŋ jūmysyn anyqtauǧa mümkındık tuǧyzdy. Mamandar elımızdıŋ barlyq öŋırlerıne arnaiy baryp, bi ansamblderımen tanysty. Jüirıkterdı anyqtady. Elımızdegı tūŋǧyş ūiymdastyrylǧan horeograftar baiqauy «Astana Opera» opera jäne balet teatrynyŋ kışı zalynda «Türkı halyqtarynyŋ bi mädenietınıŋ simbiozy» atty ǧylymi-praktikalyq konferensiiamen qorytyndylandy.
Konferensiiany QR mädeniet qairatkerı, «Naz» memlekettık bi teatrynyŋ direktory, «Horeografiia önerınıŋ qairatkerler qoǧamy» töraǧasy Erkebūlan Aǧymbaev qūttyqtau sözben aşty. Qaz KSR eŋbek sıŋırgen ärtısı, önertanu kandidaty, Qazaq ūlttyq horeografiia akademiiasynyŋ professory Toiǧan Izım «Şara Jienqūlovanyŋ jan-jaqty şyǧarmaşylyǧynyŋ jalǧasy bolǧan baiqaulardyŋ qazaq biınıŋ damuyna qosqan ülesı» degen taqyrypta baiandama jasady. Sondai-aq jiynǧa qatysqan basqa da bi önerınıŋ mamandary baiandama jasap, tyŋdauşylarmen pıkır almasty.
Al jüldegerlerdı anyqtaityn gala konsert «Astana» konsert zalynda» öttı.
Baiqaudyŋ bas jüldesın astanalyq horeograf Ūlan İzenaev ielendı. Jüldegerler men diplomanttar marapattaldy.
Qaz KSR halyq ärtısı Zäuırbek Raibaev atyndaǧy, Qaz KSR eŋbek sıŋırgen öner qairatkerı, baletmeister, professor M.Tıleubaev atyndaǧy, Qazaqstannyŋ halyq ärtısı, önertanu kandidaty, professor Däuren Äbırov atyndaǧy, Qaz KSR halyq suretşısı, rejisser, akter Ä.İsmailov atyndaǧy, QR mädeniet qairatkerı, bişı-pedagog Üsen Maqan atyndaǧy arnaiy jüldeler iegerlerı anyqtaldy.
Kelesı jyly – qazaqtyŋ tūŋǧyş balerinasy, Qazaqstannyŋ eŋbek sıŋırgen ärtısı Nūrsūlu Tapalovanyŋ 100 jyldyǧy. Būl mereitoi respublikalyq deŋgeide, öz biıgınde atalyp ötedı dep ümıttenemız.
Tolqyn SŪLTAN
