Keşe Nūr-Sūltan qalasynyŋ Qoǧamdyq damu ısterı basqarmasy «Qazaqstan damu qauymdastyǧy» qoǧamdyq bırlestıgımen bırge «Qazaqstannyŋ tūraqty damuy: sabaqtastyq, dästür jäne jaŋaşyldyq» atty döŋgelek üstel ötkızdı. Basqosuǧa qoǧamdyq pıkırdıŋ köşbasşylary, ükımettık emes ūiymdardyŋ, ǧylymi intelligensiianyŋ ökılderı, qoǧam qairatkerlerı men täuelsız sarapşylar qatysty. Olar Memleket basşysy Qasym-Jomart Toqaevtyŋ ūlyqtau räsımınde söilegen sözıne qatysty oi-pıkırlerın ortaǧa salyp, Prezident ataǧan basym baǧyttardy odan ärı jetıldıru joldaryn nūsqady.
Tömende sol jiynda aitylǧan bırneşe sarapşynyŋ pıkırın jariialaudy jön kördık.
Mūhtar Erketaev, Nūr-Sūltan qalalyq qoǧamdyq keŋesınıŋ hatşysy:
– Qazaqstan Prezidentı Qasym-Jomart Toqaev ūlyqtau räsımınde negızgı on baǧytty atap aitty. Sonyŋ bırı – jemqorlyqty joiu. Menıŋ oiymşa, jemqorlyq qylmysqa ekı adam qatysady: bırı – para bergısı keledı, ekınşısı – parany alǧysy keledı. Osy mäselenıŋ aldyn alu üşın ekı närsege erekşe nazar audaruymyz kerek. Bırınşıden, jemqorlyqtyŋ jegıqūrt ekenın, onyŋ adamǧa, qoǧamǧa qandai ziiany bar ekenın balabaqşadan bastap jas ūrpaqtyŋ sanasyna tereŋ sıŋıruge tiıspız. Ekınşıden, jemqorlyqpen küreske qatysty elımızde qanşama zaŋ qabyldanyp jatyr. Bıraq keide olar bır-bırıne qarama-qaişy keledı. Parlament deputattary, Ükımettegı qūzyrettı tūlǧalar osyǧan dūrys köŋıl bölsın.
Qūndyzai Erımbetova, Bılım jäne ǧylym ministrlıgı Memleket tarihy institutynyŋ sarapşysy:
– Äleumettık jaŋǧyru degen mäsele bügın ǧana köterılıp otyrǧan joq. Ol būryn da bolǧan. Alaida bügıngı jaŋǧyrudyŋ būrynǧy jaŋǧyrudan aiyrmaşylyǧy bar. Keŋes zamanynda ol küştep jürgızıldı. Ol jaŋǧyru ūrpaqtarǧa qaiǧy-qasıret äkeldı. Al şirek ǧasyrdan berı bolyp jatqan jaŋǧyru müldem özgeşe. Būl jerde dästürdı qasterleu, ūrpaqtar sabaqtastyǧy, jaŋaşa damu degen ūstanym bar. Menıŋşe, jetıstık degen sözdı aitpauymyz kerek. Bälkım, «Qazaqstannyŋ sybailas jemqorlyqtaǧy ölşemı» degen dūrys şyǧar. Eger jetıstıkke jetken bolsaq, bır ǧana jemqorlyq üşın reformalar toptamasyn daiyndamaimyz ǧoi.
Tabiia Janmurzina, «Iltipat» qoǧamdyq bırlestıgınıŋ jetekşısı:
– Eger bız Memleket basşysy Q.Toqaev aitqandai, adaldyqty, ädılettılıktı, parasattylyqty ūstanyp, halyqtyŋ aldynda şyndyqty aşyq aitsaq, qoǧam, el üşın paidaly ıs ıstegen bolar edık. Ökınıştısı sol, keibır adamdardyŋ osyndai basqosularda şyrqyraǧan şyndyqty aituǧa jıgerı jetpeidı. Mysaly, halyq şeruge şyqqanda Ükımettegı şeneunıkter, Parlamenttegı deputattar, elge tanymal qoǧam qairatkerlerı ünsız otyrdy. Qarsylyq aksiiasyna şyqqan adamdar qazaqstandyqtar emes siiaqty. Halyq bır jaqta, bilık bır jaqta qalǧanyn kördık. Būl dūrys emes. Qasym-Jomart Kemelūlynyŋ özı äkımderge, şeneunıkterge kabinetten şyǧyp, halyqpen etene aralasyp, mūŋ-mūqtajyn tyŋdap, mäselelerdı şeşu joldaryn qarastyruǧa şaqyrdy. Būl – öte quanarlyq jaǧdai. Prezidenttıŋ özıne de, sözıne de senemın!
