Būqar jyrau babamyz «Qazaqtyŋ qamal qorǧany» dep baǧalaǧan, joŋǧar şapqynşylyǧynda qazaq äskerınıŋ qolbasşysy bolǧan Bögenbai batyrǧa bas qaladaǧy qoiylǧan eskertkış 2007 jyly 5 şıldede aşylǧan. Ol daŋqty tūlǧa esımımen atalǧan daŋǧylda ornalasqan. Eskertkışte batyr at üstınde beinelengen. Bır qolyn joǧary köterıp, el şetıne kelgen jaudy bögep tūrǧandai. Al ekınşı qolyndaǧy aldaspan sol kezeŋnıŋ almastai qylpyǧan qauıp-qaterın aŋǧartyp tūrǧandai körınedı. Eskertkış tūǧyrynyŋ biıktıgı 11,3 m bolsa, at üstındegı batyr müsınınıŋ biıktıgı – 6,3 metr. Avtory – belgılı müsınşı Toqtar Ermekov.
Bız sözımızdıŋ basynda Būqar babamyzdy beker aitqan joqpyz, qazaq elınıŋ tıregı bolǧan bahadür ömırden ötkende äruaqty jyrau, üş jüzdıŋ basyn qosqan Abylai hanǧa batyrdyŋ ölımın:
– Qazaqtyŋ hany Abylai,
Abylai hanym, būl qalai?
Aqiyqty aspanǧa
Ūşpastai ǧyp torlady.
Qūlaǧanǧa ūqsaidy
Qazaqtyŋ qamal-qorǧany.
Qaiǧyrmaŋyz, hanzadam,
Aitpasyma bolmady,
Batyryŋ öttı – Bögenbai!
Qiiadan qiqu tögılse,
Attyŋ basyn tartpaǧan,
Qisapsyz qol körınse,
Qorqyp jaudan qaitpaǧan,
Qazaq degen halqynan,
Batyr şyqqan daŋqynan,
Qarsylasqan asyldar
Qorǧasyndai balqyǧan,
Batyryŋ öttı – Bögenbai!, – dep jetkızıptı.
