Ūlttyq muzeide «Bozoq» memlekettık tarihi-mädeni muzei-qoryǧynyŋ ūiytqy boluymen «Bozoq tarihi-mädeni jobasy: 2019 jyldyŋ qorytyndysy jäne damu perspektivasy» atty respublikalyq ǧylymi-praktikalyq seminar öttı.
Qazırgı künı elordanyŋ aumaǧyndaǧy bıregei arheologiialyq eskertkış – Bozoq ejelgı qalaşyǧy aşyq aspan astyndaǧy muzeiınıŋ qūrylysy josparlanuda. Būl joba ejelgı Bozoq qalaşyǧyn qaita jaŋǧyrtudy, Euraziia aumaǧyndaǧy dala örkenietınıŋ qalyptasuy men damuy tarihynyŋ negızgı kezeŋderın körsetetın bes tarihi qonystyŋ qūrylysyn qamtidy. Jiyn barysynda joba jetekşılerı, qūrylysqa jauapty adamdar, ǧalymdar biyl atqarylǧan jūmystardyŋ qorytyndysyn şyǧaryp, aldaǧy jylǧa josparlanǧan şaralardy köpşılıkke tanystyrdy.
Seminarda Mädeniet jäne sport ministrlıgı Tarihi-mädeni mūra basqarmasynyŋ basşysy Jannat Seidalieva biyl atqarylǧan jūmystarǧa oŋ baǧa berdı.
«Bız osy jyldy jaqsy nätijemen aiaqtap otyrmyz. Parlament Senaty «Tarihi-mädeni mūra obektılerın qorǧau jäne paidalanu turaly» jaŋa zaŋdy maqūldady. Aldaǧy uaqytta osy zaŋ aiasynda jobalardy bırlesıp ıske asyramyz» dedı ol.
«Bozoq» memlekettık tarihi-mädeni qoryq-mūrajaiynyŋ direktory mındetın atqaruşy Säule Börıbaeva atqarylǧan şarualar ıstıŋ tek bastamasy ekenın aitty.
–Qazır elşılıktermen tyǧyz jūmys jürgızıldı. Bılım jäne ǧylym ministrlıgı Ǧylym komitetınıŋ ǧylymi qyzmet subektısı retınde akkreditteu turaly kuälıgın, sondai-aq tarih jäne mädeniet eskertkışterınde arheologiialyq jäne ǧylymi-restavrasiialau jūmystaryn jürgızuge lisenziia berdı. Jobany ǧylymi-ädıstemelık qamtamasyz etu maqsatynda 10-nan astam ärtürlı formattyq ıs-şaralar ötkızıldı. Qazır jetekşı otandyq ǧalymdar men säuletşılerdıŋ qatysuymen jobanyŋ tarihi bölıgın eskizdık jobalau jūmystary daiyndalyp jatyr, – dedı.
«Bozoq» memlekettık tarihi-mädeni qoryq-mūrajaiynyŋ injenerı Serık Beisenov tarihi orynda jürgızılgen jūmystar retın aita kelıp: «Bügınde arheologiialyq qazba uchaskesınen topyraq synamasy alyndy, uchaske aumaǧyn sanepidemstansiia qyzmetkerlerı tolyǧymen zerttedı, sonymen qatar injenerlık-geografiialyq ızdestıru jūmystary jürgızıldı» dedı ol.
