El igılıgı jolynda erlermen bırdei eŋbek etıp, jūrt süisıner igı ıster tyndyrsa da, azamatynyŋ aldyna şyqpai, «men ıstedım» dep keude qaqpaityn qairatker analar qanşama. Densaulyq saqtau salasynda 40 jyldan astam uaqyt qyzmet atqaryp, adal eŋbegımen abyroi biıgınen körıngen astanalyq därıger Güljan BEIBITOVA solardyŋ qatarynan.
Densaulyq saqtau ısınıŋ üzdıgı, joǧary sanatty därıger Güljan Beibıtova qūrmettı demalysqa şyqqanyna 10 jyldan assa da ol älı tyŋ, qol qusyryp qarap otyrǧan joq, qoǧamdyq jūmystardyŋ bel ortasynda jür.
Älı künge deiın qala ömırıne belsendı qatysyp, täjıribesımen bölısıp jürgenı üşın jaqynda qalalyq mäslihat hatşysy Erlan Kanalimov mereitoi iesın qūttyqtap, elordalyq halyq qalaulylary atynan alǧysyn bıldırdı. Jürekjardy tılegın jetkızgennen keiın ol estelık syilyǧymen bırge gül şoǧyn tabystady. Būl da bolsa densaulyq saqtau salasyna sübelı üles qosqan hanymnyŋ qoǧamdaǧy belsendılıgın baiqatqandai.
Talaidy syrqatynan sauyqtyryp, auruyna em darytqan därıgermen men sonau 90-jyldardyŋ basynda kezdesıp, jaqynyraq tanysqan bolatynmyn. Ol kezde Güljan Ǧazizqyzy qalalyq №6 emhanada bas därıger. Keiın qalalyq mäslihattyŋ deputaty bolǧan kezde de bızdıŋ gazetpen jiı habarlasyp, atqaryp jürgen jūmysy turaly jergılıktı basylym betıne ülkendı-kışılı maqalalar jariialap tūrdy. Qaida jürse de ünemı qazaq tıldı mamandardyŋ eŋbegın eskerıp, olardyŋ bılıktılıgı öz salasynda laiyqty ornyn aluǧa küş jūmsady.
Būl qaladaǧy qazaq mektepterı jappai jabylyp, balabaqşalarda büldırşınder taza orys tılınde tärbielengen, qazaq tılınıŋ qoldanys aiasy tarylyp, ūlttyq dästürımız ben mädenietımız şettetılgen kez edı. Özı düniege kelgen Aqmola oblysynyŋ Aqköl audanyndaǧy Aqsu kentınde ol tūsta özge ūlt ökılderı öte köp bolatyn. Solardyŋ ortasynda jürıp, özge tılde emın-erkın söilep össe de, üidegı äke men ana tärbiesınıŋ yqpalymen qazaqtyŋ tılı men dılın berık ūstanǧan qarşadai qyz balabaqşada jürıp-aq özınıŋ azan şaqyryp qoiǧan atyn ondaǧylardyŋ «Gulia» nemese «Galia» dep özgertıp aituyna jol bermedı. Äkesı – Ūly Otan soǧysynyŋ ardagerı Ǧaziz Arystanūly Qazaq KSR tüstı metallurgiia ministrlıgıne qarasty Aqsu, Jolymbet, Bestöbe ken oryndarynda ǧūmyr boiy partiialyq jäne basşylyq qyzmet atqarǧan el azamaty edı. Qarapaiym qazaqy qasiet pen ūlttyq müdde tūrǧysyndaǧy sanany balalarynyŋ boiyna darytqan anasy Sarjan Äbenqyzy ekeuı ekenı anyq.
Orta mekteptı üzdık bıtırıp, Selinograd qalasyndaǧy medisina institutynda oqyp jürgende de talai talantty qazaq jastarynyŋ orys tılın bılmegendıgınen bolaşaǧyna balta şabylyp, tauy şaǧylǧanyn közımen kördı. Jalpy sabaqtar, negızınen, orysşa ötetın ol tūsta şalǧai auyldardan qazaq mektepterın üzdık bıtırıp kelgen studentterdıŋ köbı tıldı tüsınbeitının ūstazdarǧa aşyp aita almaityn. Sonyŋ saldarynan olardyŋ oqu ülgerımı kürt naşarlap ketkenı, olarǧa institut basşylyǧy tarapynan tiısınşe kömek körsetılmegenı, iaǧni qosymşa sabaqtardyŋ ötkızılmeuı ony bei-jai qaldyrmady. Söitıp, 2-kursty oqyp jürgen kezınde, nebärı 18 jasynda medisina institutynyŋ qabyrǧasynan «Oian, qazaq!» atty jastar ūiymyn qūryp, ūlttyq bolmysymyzdyŋ bolaşaǧy men tuǧan tılımızdı saqtap qalu üşın qolynan kelgenınşe küresedı. Qazaqtyŋ tılı men mädenietıne, ūlttyŋ salt-dästürı men ädet-ǧūrpyna qysym körsetudıŋ toqtatyluyn talap etken student, talai märte qūqyq qorǧau mekemelerı qyzmetkerlerımen jüzdesude bolǧanyna qaramastan, alǧan betınen qaitpai, el ükımetınıŋ saiasatyn moiyndaitynyn, tek Qazaq KSR-ınıŋ negızgı zaŋyna säikes qazaqtyŋ tılı, dästürı men mädenietınıŋ qūqyǧyn qorǧau talaptaryn qoiǧanyn aşyp aitady. Aqyry qaisar qyz qoǧamdaǧy teŋsızdıktı, jergılıktı jastardyŋ özgelerden kem emes ekenın däleldeumen bolady.
Joǧary oqu ornyn oidaǧydai aiaqtaǧan jas maman bar ǧūmyryn süiıktı ısı – densaulyq saqtau ısıne arnady. Aldymen Selinograd oblysy Jolymbet qalalyq auruhanasynyŋ terapiia bölımşesınde meŋgeruşı, 1978-1989 jyldary Astanadaǧy №2 qalalyq emhana bas därıgerınıŋ emdeu jūmysy jönındegı orynbasary bolyp eŋbek ete jürıp, öz jerınde ögeisıgen ūlttyq kadrlar üşın kürestı toqtatpady.
Elordadaǧy №6 emhananyŋ jaŋadan aşylǧan kezı de däl keşegıdei köz aldynda. Bas därıger bolyp baruǧa ūsynys tüskende, qūrylysy bıtpegen ǧimarattyŋ qalqiǧan qabyrǧalary ǧana tūrǧan edı. Tabiǧatynan tyndyrymdy jan köp oilanbastan senımdı aqtauǧa bılek sybana kırısedı. Emhanaǧa jetekşılık etumen qosa, qūrylysşy mamandyǧyn igeruge tura kelse de eşteŋeden tartynbai, el igılıgı jolynda erlermen bırdei ıs tyndyrady.
Qūrmettı demalysqa şyqqanǧa deiın 22 jyl eŋbek etken osy emhananyŋ özıne etene jaqyn, tym ystyq körınuı de sondyqtan bolsa kerek. Bastapqyda 40 myŋnan asa tırkelgen tūrǧyndardyŋ sany soŋǧy kezde 90 myŋ adamǧa deiın jetse de, jūmysty tiımdı üilestırıp, tūrǧyndarǧa medisinalyq kömek körsetu sapasyn jaqsarta tüsedı. Sol jyldarda ūjymnyŋ bırneşe ret salalyq baiqauǧa qatysyp, Astana qalasyndaǧy eŋ üzdık emhananyŋ bırı retınde marapatqa ie boluy, söz joq, bılıktı basşynyŋ eŋbekqorlyǧy men bılgırlıgınıŋ jemısı. Keiın osy emdeu mekemesı üşın bes qabatty jaŋa ǧimarat salynǧanda, bas därıger zeinetke şyqqanşa onyŋ qūrylysynyŋ basy-qasynda jürdı.
Köp jylǧy ölşeusız eŋbegı eskerusız qalmady. KSRO jäne Qazaqstan Respublikasynyŋ memlekettık nagradalarymen, «Qūrmet» ordenımen, «Eren eŋbegı üşın» jäne basqa da mereitoilyq medaldarmen, Qazaqstan Respublikasy Prezidentınıŋ alǧys hattarymen, äkımdıktıŋ jäne qalalyq Densaulyq saqtau basqarmasynyŋ qūrmet gramotalarymen marapattaldy. QR därıgerlerınıŋ I jäne II sezderınıŋ delegaty. Medisinalyq jurnaldarda jäne merzımdı basylymdarda 30-dan astam maqalasy jariialandy. Bügınde Güljan Ǧazizqyzy – «Ardagerler ūiymy» RQB ortalyq keŋesı ardagerler densaulyǧyn qorǧau jönındegı tūraqty komissiia töraǧasynyŋ orynbasary.
Otaǧasy Bäduan İmaşūly – osy öŋırge belgılı qalamger. Aqmola oblystyq «Arqa ajary» gazetınde 40 jyldan asa eŋbek etken «Qazaqstannyŋ qūrmettı jurnalisı». Olardyŋ basty bailyǧy – balalary. Bır kezderı elordada ūiymdastyrylǧan «Mereilı otbasy» baiqauynyŋ jüldegerı bolǧan ūldary Aidar, Aidyn, Aibek pen kelınderı Gülnär, Äsel, Aijan ata-ana abyroiyn asqaqtatyp, qara şaŋyraqty şattyqqa toltyrsa, solardan örbıgen nemerelerı köz quanyşyna ainalyp otyr.
Sanaly ǧūmyryn densaulyq saqtau salasyn damytuǧa arnaǧan qoǧam qairatkerı, bılıktı därıger ötken ömırıne, taǧdyr-talaiyna şükır etedı. «Alǧys alǧan arqalanar» demekşı, ainalasyna meiırım şaşyp, adamdardyŋ alǧysyna bölengen apaidyŋ älı de körer qyzyǧy köp bolyp, ǧūmyry ūzaq bolǧai!
