Dumandy dala dauysy
«Qazmedia ortalyǧynyŋ» kinokonsert zalynda Qazaq radiosynyŋ halyqaralyq «Dala dauysy» radiofestivalınıŋ gala-konsertı öttı. Elımızdıŋ jäne türkıtıldes elderdıŋ 130-dan astam düldülderınıŋ qatysuymen jetı aiǧa sozylǧan baiqau özınıŋ märesıne jettı. Osy uaqyt ışınde tyŋdarmandardyŋ meilınşe köp dauysyna ie bolǧan jiyrma bes änşı būl halyqaralyq bäigenıŋ jeŋımpazy atanyp, arnaiy syi-siiapatqa ie boldy.
«Dästürlı än» jäne «Estradalyq än» atalymdary boiynşa Qydyrälı Bolmanov, Qaraqat Äbıldina, Dosymjan Taŋatarov, Jūbanyş Jeksenūly, Gülnūr Orazymbetova sekıldı tanymal änşıler jeŋımpaz atandy. Al, Qytaidan kelgen qandastarymyz ejelgı qazaq änderın tamyljyta oryndasa, türkiialyq duet «Saryala qaz» halyq änımen köpşılık qūrmetıne bölendı. Kärıs jıgıtterınen qūralǧan kvartet qazaq änın naqyşyna keltıre şyrqady. Būl baiqau, tüptep kelgende, būqaralyq aqparat qūraldary ışındegı baiyrǧy da qarapaiym, jedel de qoljetımdı türı sanalatyn radionyŋ tek ötkır söz ben ūşqyr oidyŋ ǧana emes, sonymen qatar äsem änımen de tūŋǧiyqta tolyqsyp jatqan sezımderdı oiatyp, halyqtyŋ jıgerın janyp, ruhyn köteretın dumandy habarlardyŋ arnasy ekendıgın körsetıp berdı. Qazaqstan Respublikasy Mädeniet jäne aqparat ministrı Darhan Myŋbaidyŋ qūttyqtau sözın jetkızgen Aqparat jäne mūraǧat komitetı töraǧasynyŋ orynbasary Quat Boraş ta baiqaudyŋ maŋyzdylyǧyna toqtaldy.
«Dala dauysy» halyqaralyq baiqauynyŋ jeŋımpazdaryn marapattauǧa Parlament deputattary, öner qairatkerlerı, märtebelı şeteldık qonaqtar, biznes ökılderı jäne Bas redaktorlar kluby da qatysty.
Hamit ESAMAN