Jeksenbı künı «Qazaqstan» ortalyq konsert zalynda elordanyŋ 20 jyldyǧy aiasynda «Astana» II Düniejüzılık teatr festivalınıŋ şymyldyǧy türıldı. Festival Qazaqstannyŋ Eŋbek erı, KSRO halyq ärtısı, Memlekettık syilyqtyŋ laureaty Asanälı Äşımov bastaǧan qazaqstandyq ärtıster men Europa men Aziiadan kelgen qonaqtardyŋ qyzyl kılemmen jürıp ötu saltanatymen aşyldy.
– Astananyŋ 20 jyldyǧy aiasynda ötıp jatqan osy jyl teatr qauymyna ülken meiram, halyqqa quanyş syilap otyr. Biyl elorda merekesı şeŋberınde 5 teatr festivalı, 2 kinofestival ūiymdastyrylady. Mūny öner toiy dep esepteuge bolady. Būl örkendı elımız basşylarynyŋ bızge jasaǧan ūly qamqorlyǧy dep bılem. Mūhtar Äuezovtıŋ «Önersız el – el emes» dep aitqany bar. Önerdı qūrmettegen adam – baqytty adam» dedı festivaldıŋ aşylu saltanatynda Asanälı Äşımov. QR Mädeniet jäne sport ministrlıgı, Qazaqstan teatrlary assosiasiiasy, «Qazaqkonsert» memlekettık konserttık ūiymy ekınşı jyl qatarynan ūiymdastyryp otyrǧan festivalge 12 memlekettıŋ teatrlary qatysyp jatyr. Qazaqstannan M.Äuezov atyndaǧy Qazaq memlekettık akademiialyq drama teatry, Q.Quanyşbaev atyndaǧy Memlekettık akademiialyq qazaq muzykalyq drama teatry jäne Ǧ.Müsırepov atyndaǧy balalar men jasöspırımderge arnalǧan memlekettık akademiialyq teatry, «Astana Miuzikl» teatry qoiylymdaryn ūsynady. Osylarmen qatar «Piccolo di Milano» teatry (İtaliia), «1927» teatry (Ūlybritaniia), «Meno Fortas» (Litva), «Warszawa» (Polşa), Täuelsız internasionaldy «11» teatry (Germaniia), Ş.Rustaveli atyndaǧy Gruziia memlekettık akademiialyq teatry (Gruziia), Beijıŋ halyqtyq körkem teatry (Qytai), Özbek ūlttyq akademiialyq drama teatry (Özbekstan), Lensovet atyndaǧy Sankt-Peterburg akademiialyq teatry, Mäskeu guberniialyq teatry (Resei), Ş.Termichikov atyndaǧy Şu oblystyq teatry (Qyrǧyzstan) qatysuda. «Astana Miuzikl» teatrynyŋ «Qyz Jıbek» etno-folklorlyq miuziklın körermender tamaşalap ülgerdı. Q.Quanyşbaev atyndaǧy Memlekettık akademiialyq qazaq muzykalyq drama teatry keşe juyrda premerasy ötken U.Şekspirdıŋ «Otello» tragediiasyn ūsyndy. M.Äuezov atyndaǧy Qazaq memlekettık akademiialyq drama teatry Ǧarifolla Esımnıŋ «Taŋsūlu» spektaklın, Ǧ.Müsırepov atyndaǧy balalar men jasöspırımderge arnalǧan memlekettık akademiialyq teatry G. Hugaevtyŋ qoiylymyn körsetedı. Festival, jalpy, 28 mausymǧa deiın jalǧasady. Sonyŋ aiasynda drama, tragediia, komediia syndy är aluan janrdaǧy spektaklderdı tamaşalauǧa bolady.
Qoiylymdar qala teatrlary men «EKSPO» qalaşyǧyndaǧy Energiia-Holda, Beibıtşılık jäne kelısım saraiynda körsetıledı. Qazylar alqasyna belgılı teatr mamandary Asanälı Äşımov (Qazaqstan), Ionas Vaitkus (Litva), David Asatiani (Fransiia), Beatris Pikon-Vallen (Fransiia), David Papava (Ūlybritaniia) şaqyryldy. Festivaldıŋ basty qonaǧy – Oskar syilyǧynyŋ iegerı, dünie jüzıne belgılı kino jäne teatr aktrisasy Jiulet Binoş. Ol Astanada şeberlık sabaqtary men şyǧarmaşylyq keşın ötkızedı.
Amanǧali QALJANOV
