Elbasy şyrşasynyŋ şuaǧy
Keşe Oquşylar saraiynda el Prezidentı Nūrsūltan Nazarbaevtyŋ atynan Jaŋa jyldyq şyrşa öttı. Astana qalasynyŋ äkımı Äset İsekeşevtıŋ qatysuymen ötken merekelık keşke 9 ben 13 jas aralyǧyndaǧy 200 oquşy qatysty.
Prezident şyrşasyna kelgen qonaqtardy ışte öleŋ aityp, bi bilegen kışkene balalar kütıp aluda, ışkı dälızde är mekteptıŋ oquşylary kelgen qonaqtardy öz önerlerımen qūşaq jaia qarsy aluda. Qabyrǧada qys mezgılındegı Astana körınısterı beinelengen.Ülken zal ertegıdegı han saraiyndai jap-jaryq, ortada zäulım şyrşa. Zaldyŋ tör jaǧynda ülken LED ekrandar. Ülken sahnada da bi bastaldy. Bimen bırge aspannan «aqşa qar» jaua bastady. Bi bıte bergende ädemı äuen oinap, sahnaǧa jürgızuşıler şyǧady. Teatrlandyrylǧan qoiylymnyŋ basty keiıpkerı biyl Qabanbai batyr boldy. Balalardyŋ qoşemetımen ortaǧa şyqqan Qabanbai batyr da büldırşınderge ystyq yqylasyn bıldırıp, Qazaqstannyŋ täuelsızdık alǧaly berı jetken jetıstıkterı, tabystary turaly jan-jaqty baiandady. Elordamyz – Astana turaly äŋgıme de äserlı aityldy. Būdan soŋ oquşylar ertegıler elınıŋ qonaqtarymen bırge Astanaǧa saiahat jasady. Keştıŋ qoiuşy-rejisserı Qazaqstan Respublikasynyŋ halyq ärtısı, Q.Quanyşbaev atyndaǧy Memlekettık akademiialyq qazaq muzyka-drama teatrynyŋ körkemdık jetekşısı Talǧat Temenov boldy.
Sondai-aq, elımızdıŋ bas şyrşasyna arnaiy şaqyrtumen kelgen balalar Elbasy Nūrsūltan Nazarbaevtyŋ qūttyqtauyn tyŋdady.
– Qymbatty balalar, men senderdı, sender arqyly barşa qazaqstandyq balalardy kele jatqan Jaŋa jylmen qūttyqtaimyn!
Biylǧy jyl bärımız üşın airyqşa jyl boldy. Täuelsızdık arqasynda bızdıŋ Otanymyz jyldan-jylǧa örkendei tüsude. Qazır dünie jüzı qazaq elın qūrmetteidı. Sender osyndai erekşe elde ösıp kele jatqan baqytty ūrpaqsyŋdar. Zerdelı de zerek, bılımdı bolyŋdar. Bolaşaqtaryŋ baiandy bolsyn, – degen Memleket basşysynyŋ aqjarma tılegı är balanyŋ jadynda ūzaq uaqyt saqtalyp qalary anyq.
Ata-anasynyŋ qamqorlyǧynsyz qalǧan balalar, erekşe qajettılıkterı bar balalar, az qamtylǧan otbasynan şyqqan balalar qatysqan şyrşa merekesıne qala basşysy Äset İsekeşev te keldı. Şahar basşysy balalarmen bırge şyrşany ainaldy.
Būdan özge merekelık baǧdarlama şeŋberınde balalardy ertegı älemındegı keiıpkerlerdıŋ qatysuymen şou-qoiylymdar, jaŋajyldyq syilyqtar (kiım-keşek satyp aluǧa «H&M» dükenınen 85 myŋ teŋgege sertifikat), tättı üstel (är balaǧa jeke qorapta şyryndar, toqaştar, kämpitter, jemıster), «Happylon» oiyn-sauyq ortalyǧyna berıletın joldamalar berıldı.
Būdan soŋ büldırşınder äsem şyrşanyŋ janyna qaita jinalyp, jūmbaq şeştı, türlı oiyn oinady.
Sondai-aq, balalar būl künı «EKSPO-2017» Körmesı aumaǧynda ornalasqan «Nūr Älem» sferasyna ekskursiia jasap, estelık suretterge tüstı.
Daniel Iýrekli, №66 mekteptıŋ 2-synyp oquşysy:
– Oqu ozatymyn. Äsırese, matematika pänın qatty jaqsy köremın. Mektepte ūiymdastyrylatyn şaralarǧa belsene qatysamyn. Bas şyrşaǧa kelgenımdı maqtan tūtamyn. Keştıŋ ötuıne mümkındık bergen Elbasyna, qala äkımıne, mekteptegı ūstazdaryma rizaşylyǧymdy bıldıremın.
Güljan RAHMAN