«Astana Arena» stadionynda mūnai-gaz salasy jäne būqaralyq aqparat qūraldary ökılderı arasynda şaǧyn futboldan ötken «Elorda-2018» qaiyrymdylyq turnirı märesıne jettı.
Elorda äkımdıgınıŋ qoldauymen ötken turnir Astananyŋ 20 jyldyǧyna jäne «Şell» kompaniiasynyŋ Qazaqstandaǧy 25 jyldyǧyna arnaldy. Is-şaranyŋ ūiymdastyruşylary – «Şell Qazaqstan» kompaniiasy jäne «Elorda Aqparat» mediakompaniiasy.
Jarystyŋ aşylu saltanatyna Astana äkımınıŋ orynbasary Ermek Amanşaev jäne QR Energetika vise-ministrı Maǧzūm Myrzaǧaliev qatysyp, futbol merekesın ūiymdastyruşylarǧa alǧysyn aityp, barlyq qatysuşy komandalarǧa sättılık tıledı.
«Astanada ötetın sport şaralarynyŋ sany jyl saiyn artyp keledı. Mäselen, byltyr 600-den astam būqaralyq sport şarasy ūiymdastyryldy. Bügın bız Otanymyzdyŋ jüregıne, Täuelsızdıgımızdıŋ tıregıne ainalǧan Astanamyzdyŋ 20 jyldyq mereitoiyna arnalǧan jäne «Şell» kompaniiasynyŋ Qazaqstanda jūmys jürgıze bastaǧanyna 25 jyl toluyna orai ötıp jatqan şaraǧa qatysyp otyrmyz. Äuesqoi sportşylar arasyndaǧy osy turnir aldymen salauatty ömır saltyn nasihattasa, ekınşıden, mūnai-gaz salasy men jurnalister qauymy arasynda yntymaqqa däneker bolady dep oilaimyz. Jäne būl jarys Astanamyzda dästürlı türde ötıp tūratyn turnirge ainalady dep senemız» dedı Ermek Amanşaev.
Jarysqa 16 komanda qatysty. Atap aitsaq, Astana qalasy äkımdıgı, QR Energetika ministrlıgı, «Şell Qazaqstan», «Qazmūnaigaz ŪQ» AQ, «ENİ», «Total», «NKOK N.V.», «KPO B.V.», «PSA» JŞS, «Qazaqstan», «Habar», «Egemen Qazaqstan», «Astana TV», «Qazaq radiosy», «Qazinform» jäne «Elorda Aqparat» komandalary bar.
Dop dodasynyŋ finalynda «Habar» jäne «Qazmūnaigaz» komandalary kezdesıp, negızgı uaqytta esep aşylmai, oiyn taǧdyry penalti seriiasynda şeşıldı. Nätijesınde 2:1 esebımen «Qazmūnaigaz» jeŋıp, turnirdıŋ jeŋımpazy atandy.
Al üşınşı oryn üşın bolǧan oiynda QR Energetika ministrlıgınıŋ komandasy «NKOK N.V.» komandasynan 2:1 esebımen basym tüstı.
Sonymen qatar, «Üzdık şabuylşy» atalymymen Astana äkımdıgı komandasynyŋ oiynşysy Aleksandr Semensov marapattalsa, «habarlyq» Aibek Qabylşa «Üzdık qaqpaşy» atandy. Al «Qazmūnaigaz» komandasynyŋ namysyn qorǧaǧan Tamerlan Asanov turnirdıŋ «Üzdık oiynşysy» retınde tanyldy.
Mūnai-gaz salasy komandalarynan jinalǧan jarna – 2 mln teŋge «Speşial Olimpiks Qazaqstan» ūiymyna audaryldy. Būl qarajat 2019 jyly nauryzda BAÄ-de ötetın Dünie jüzılık Jazǧy Olimpiada oiyndaryna mümkındıgı şekteulı jasöspırımderden qūralǧan şaǧyn futboldan Qazaqstan jastar qūramasynyŋ daiyndyǧyna jūmsalady.
Būǧan qosa, chempion bolǧan «Qazmūnaigaz» komandasy da jeŋıp alǧan bas jüldesı – 150 myŋ teŋgenı qaiyrymdylyqqa audardy.
