Astanada VI Qazaqstan Respublikasy Prezidentınıŋ kubogy üşın ötken halyqaralyq turnir märesıne jettı. Bairaqty bäsekede 15 eldıŋ myqty boksşylary synǧa tüstı. Tört salmaqta qyzdar qolǧap tüiıstırse, er jıgıtter 10 salmaqta jekpe-jekke şyqty.
Jyl saiyn ūiymdastyrylatyn jarystyŋ deŋgeiı edäuır köterılgenı baiqaldy. Bırınşıden, jarysqa qatysuşylar arasynda Olimpiada oiyndarynyŋ, älem chempionatynyŋ chempiondary men jüldegerlerı köp boldy. Ekınşıden, turnirdıŋ jülde qory basqa elderde ötetın osyndai halyqaralyq jarystardan äldeqaida qomaqty boldy. Atap aitqanda, baǧaly syilyqtarmen qatar jeŋımpazdar 2000 (AQŞ) dollar, kümıs jüldegerler – 1500 dollar, al üşınşı orynǧa ılıngender 500 dollar kölemınde syiaqy aldy.
Al jarystyŋ özıne keler bolsaq, negızınen, qazaq boksşylary basymdyq tanytty deuge bolady. Qyzdar bäsekesınde astanalyq Säniia Sūltanqyzy (57 kelı) öte jaqsy öner körsettı. Jaqynda ǧana Qazaqstan chempiony atanǧan Säniia būl jarysta da barlyq jekpe-jekterınde qaisarlyq tanytty. 60 kelı salmaqta Qazaqstannyŋ eŋbek sıŋırgen jattyqtyruşysy Berık Marjyqbaevtyŋ şäkırtı Rimma Volosenko aiqyn basymdylyqpen top jardy. Onyŋ öz salmaǧynda küştı ekenıne kümän bolmady.
Qyzdar boksynda eŋ jeŋıl salmaqta Japoniia aruy Namiki Sukumi jeŋımpaz atandy. Künşyǧystyŋ qyzy jartylai finalda bızdıŋ ekı dürkın älem chempionymyz Nazym Qyzaibaidy toqtatqan edı. Al auyr salmaqta Rio olimpiadasynda qola medal alǧan Dariǧa Şakimova kümıstı qanaǧat tūtuǧa mäjbür boldy. Şvesiianyŋ būrymdy boksşysy Lav Holgerson qazaq qyzynyŋ jolyn bögedı.
Al erler saiysynda «jan alyp, jan berısken» jekpe-jekter köp boldy. 48 kelıde Qazaqstan qūramasynyŋ bırınşı jäne ekınşı nömırlı boksşylary altyn üşın aiqasqa şyqty. Temırtas Jüsıpov Jomart Erjannan ailasyn asyra bıldı. 52 kelıde almatylyq Änuar Mūzaparov filipindık Ladon Rogendı jeŋdı. 56 kelı salmaqta älem chempiony Qairat Eraliev chempion atandy. Ol jartylai finalda Olimpiada oiyndarynyŋ chempiony özbek boksşysy Şahobiddin Zoirovty jeŋgen bolatyn. Al finalda osyǧan deiın astanalyq halyqaralyq därejedegı sport şeberı Iliias Süleimenovten basym tüsken AQŞ boksşysy Diuk Reigendı tıze büktırdı. Qairat pen Diuk byltyr älem chempionatynyŋ finalynda da kezdesken bolatyn. 64 kelıde qazaqstandyq Bekdäulet İbragimov, 69 kelıde Aslanbek Şynbergenov top jardy. 75 kelı salmaqta ekı myqty boksşymyz qolǧap tüiıstırdı. Älem chempionatynyŋ finalisı Äbılhan Amanqūl men belgılı boksşy Erık Äljanov arasynda ötken öte tartysty aiqasta jas älem chempiony basymdyq tanytty. 81 kelıde Özbekstan myqtysy Bektemır Melkuziev pen bızdıŋ jas boksşy Bek Nūrmaǧanbet şaiqasty. Būl jekpe-jekte özbek boksşysy jeŋımpaz atandy. Bıraq qalyŋ janküier Bektıŋ önerıne täntı bolǧany sonşalyq, oryndarynan tūryp qoşemet bıldırdı. 91 kelıde qazaqtyŋ taǧy bır jas jıgıtı keremet töbeles körsettı. Atap aitqanda, Abzal Qūttybekov osyǧan deiın bızdıŋ Vasilii Levittı jeŋgen Resei boksşysy Sadam Magomedovty tızerlettı. Al eŋ auyr salmaqta Qazaqstan chempiony, älem chempionatynyŋ kümıs jüldegerı Qamşybek Qoŋqabaev reseilık Maksim Babanindı ter şyǧarmai-aq ūtty.
Sonymen, bır apta boiy qalyŋ janküierdı arbaǧan Prezident kubogy üşın ötken halyqaralyq turnir de märesıne jettı. Endı osy jarysta jüldeger atanǧan qazaq boksşylarynan ūlttyq qūrama jasaqtalyp, aldaǧy tamyz aiynda İndoneziiada ötetın Aziia oiyndarynda el namysyn qorǧaityn bolady.
