Bas şaharda «Täuelsız elım – tıregım» atty Respublikalyq aqyndar aitysy öttı. Aituly şarany ötkızuge Amanat partiiasy men Astana qalasy äkımdıgı mūryndyq boldy.
Dübırlı dodaǧa talai bäigede top jaryp, jūrtşylyqtyŋ rizaşylyǧyna bölenıp jürgen Aibek Qaliev, Bekarys Şoibekov, Tölegen Jamanov, Bırjan Baituov, Rüstem Aqylbekov bastaǧan on tört aqyn qatysty.
Aitys tızgının ūstaǧan körnektı aqyn, Qazaqstan Respublikasy Parlament Mäjılısınıŋ deputaty Amanjol Ältaev söz saiysyn tamaşalauǧa kelgen aǧaiynǧa alǧysyn aityp, bäigege şapqaly otyrǧan jüirıkterge sättılık tıledı.
Qazylar alqasynyŋ qūramynda Qazaqstannyŋ eŋbek sıŋırgen qairatkerı Abai atyndaǧy Memlekettık syilyqtyŋ laureaty Ǧalym Jailybai, halyq aqyny Äsiia Berkenova, filologiia ǧylymdarynyŋ doktory Qoilybai Asanov, Parlament Senatynyŋ deputaty Nūrtöre Jüsıp, Mäjılıs deputaty Janarbek Äşımjan, Halyqaralyq «Alaş» syilyǧynyŋ laureaty Däuletkerei Käpūly men «Habar Agenttıgı» aksionerlık qoǧamynyŋ basqarma töraǧasy Berık Uäli boldy.
Bas qalada köpten berı mūndai aitys ötpegen edı. Sodan ba, asyl mūramyzǧa susap qalǧan halyqtyŋ qarasy mol boldy.
Jetı jūpqa bölıngen aqyndar aitysqa myǧym daiyndyqpen kelıp, eldıŋ bırlıgı men berekesın, yrysy men yntymaǧyn jyr arqauyna ainaldyrdy. Sahnaǧa alǧaş şyqqan Bekarys pen Tölegen söz qaǧysynda qaǧytpa qaljyŋǧa da erık berıp, arasynda köptıŋ kökeiındegı äleumettık problemalardy aişyqty jyrlarymen öre bıldı. Aitystyŋ ören arǧymaqtaryna ainalǧan Rüstem men Bırjannyŋ saiysynda eldık mäsele söz boldy. Jas aqyndar Beksūltan Orynbasarov pen Aiym Asylbekqyzy aitysy ədemı əzılmen ädıpteldı. Aityskerler elordanyŋ bes audanyn bır jūdyryqqa bırıger bes sausaqqa balap, qazaqylandyru mäselesın söz qyldy. Al aitystyŋ aspanynda aldaspandai jarqyldaǧan beldı aqyndar Meiırbek Sūltanhan men Aibek Qaliev keş körkın qyzdyra tüstı.
«Menıŋ kötergen mäselem Jaŋa Qazaqstanǧa bailanysty boldy. Elde bırqatar özgerıs oryn aldy. Osy töŋırekte «Köp dünienıŋ atyna emes, zatyna män bereiık» degen taqyrypta özektı bolyp tūrǧan Ūlytau oblysy, Jaŋarqa audanyndaǧy äleumettık mäselelerge nazar audaraiyq, jaŋǧyraiyq degen oi negızgı aitpaǧym boldy. Özderıŋız bıletındei, ūlt kösemı Ahmet Baitūrsynūlynyŋ biyl mereitoiy atalyp jatyr. Alaş arysy, ädebiettıŋ atasy dep aitylǧanymen, kösemnıŋ saiasi qairatkerlık qyryn da körsetuge tyrystym» dedı Ūlytau oblysynan kelgen aqyn Tölegen Jamanov.
Atalmyş aitysta bas jüldege – 3 million teŋge, I orynǧa – 2 million teŋge, II orynǧa 1,5 million teŋge jäne III orynǧa 1 million teŋge tıgıldı.
