Memleket basşysy Nūrsūltan Nazarbaevtyŋ Jarlyǧymen 1997 jyldyŋ 10 jeltoqsanynan bastap Aqmola qalasy Qazaqstan astanasy bolyp jariialandy. Osy künı elorda Alatau bauraiynan Arqa tösıne köşırıldı. Būl atauly künge orai biyl Astana äkımdıgı «Elorda jūldyzy» syilyǧyn taǧaiyndady. «Astana» konsert zalynda būdan bylai jyl saiyn tapsyrylatyn atalmyş syilyqtyŋ alǧaşqy iegerlerın marapattau saltanaty öttı.
Keiıngı tört-bes jylda elordada «Astana Ballet», «Astana Opera» teatrlary boi köterdı. Būl öner ūjymdary qazır Astananyŋ daŋqyn alysqa asyryp otyr. Alǧaşqysy Mäskeu, Sankt-Peterburg, Beijın, Parij, Vena, Seul, Budapeşt, Baku, Niu-Iork syndy älemnıŋ ırı astanalary men qalalarynda tabysty öner körsettı. Ekınşısı juyrda ǧana İtaliia halqyn önerımen tamsandyryp, «Abai» operasymen Memlekettık syilyqty ielendı. «Elorda jūldyzy» syilyǧy aldymen osy teatrlardyŋ basşylaryna tapsyryldy.
«Biyl Astananyŋ 20 jyldyǧy aiasynda köptegen şaralardy ötkızdık. Olardyŋ basy bır jyl būryn osy «Astana» konsert zalynda bastaldy. Jyl boiy ötken şaralardy bügıngı keşpen tüiındep otyrmyz. Būl keştıŋ bır erekşelıgı osyndai. Elbasynyŋ astanany köşıru turaly tarihi şeşımınıŋ maŋyzy barşaŋyzǧa mälım. 20 jyl ışınde elordamyz şaǧyn oblys ortalyǧynan älem astanalarymen iyq tırestıretın qalaǧa ainaldy. Osy uaqyt aralyǧynda qalada Astana brendı bolatyn ūjymdar aşyldy. «Elorda jūldyzy» syilyǧy elordanyŋ damuyna üles qosyp kele jatqan ūjymdarǧa tapsyrylady. Qala äkımı retınde osy syilyqty tapsyru men üşın zor märtebe. Osydan 20 jyl būryn men de jas maman retınde poiyzǧa otyryp, borandy taŋda Aqmolaǧa keldım. Sodan berı qalada köp dünie özgerdı» dedı Astana äkımı Baqyt Sūltanov.
Halqymyzdyŋ būlbūl änşısı, KSRO jäne Qazaqstannyŋ halyq ärtısı Bibıgül Tölegenovaǧa alǧaşqy lekte «Astana qalasynyŋ Qūrmettı azamaty» ataǧy berıldı. Bibıgül Ahmetqyzy öz önerımen älı künge deiın elımızdıŋ, elordanyŋ mereiın tasytyp keledı. Biyl 6 şılde künı Astananyŋ 20 jyldyq mereitoiyna arnap bas qalada konsertın ötkızdı. «Mädeniettıŋ damuyna ölşeusız üles qosqany üşın» atalymynda «Elorda jūldyzy» syilyǧy daŋqty änşıge tapsyryldy.
Byltyr Astanada «EKSPO-2017» halyqaralyq mamandandyrylǧan körmesı dürıldep ötkenı mälım. Üş aidyŋ ışınde körmenı 178 elden 4 millionnan astam turist tamaşalady. Onyŋ ışınde 20 memlekettıŋ basşylary boldy. «Astana EKSPO-2017» ūlttyq kompaniiasy da laureat atandy.
Nazarbaev universitetı Astananyŋ ǧana emes, Qazaqstannyŋ ūlttyq brendıne ainaldy. Bılım salasyndaǧy «Elorda jūldyzy» syilyǧy osy joǧary oqu ornyna būiyrdy.
Medisina salasy da nazardan tys qalǧan joq. Qazır elordadaǧy 6 zamanaui medisina ortalyǧy medisinalyq klasterdı qūrap otyr. Astanaǧa em alu üşın özge öŋırlerden keletın pasientter ülesı ötken jyly 60 paiyzǧa juyqtady. Älemnıŋ 30 memleketınen kelgen emdeluşıler sany 400-den asty. Osy saladaǧy syilyq «Ūlttyq neirohirurgiia ortalyǧy» AQ basqarma töraǧasy Serık Aqşolaqovqa tapsyryldy.
Sport salasyndaǧy «Elorda jūldyzy» syilyǧyn «Astana» futbol kluby, «Barys» hokkei kluby jäne «Astana» velokomandasy ielendı. Ötken jyly 10 jyldyǧyn atap ötken «Jastar» teatry men Mäskeude ötken Köŋıldı tapqyrlar klubynyŋ joǧary ligasy oiyndaryna qatysyp, chempion atanǧan «Sparta-Nomad Astana» komandasy atalmyş syilyqtyŋ iegerı atandy. Saltanatty şarada laureat atanǧan öner ūjymdarymen qatar Qairat Baekenov, aǧaiyndy Jügınısovter, t.b. önerpazdar öner körsettı.
