Keşe Memleket basşysy Nūrsūltan Nazarbaev Astanadaǧy «Beibıtşılık qabyrǧasy» atty jaŋa monumenttıŋ aşylu saltanatyna qatysty. Elımızdıŋ törınen – Täuelsızdık alaŋynyŋ körnektı tūsynan, «Qazaq Elı» monumentınıŋ ırgesınen boi kötergen nysandy elordanyŋ 20 jyldyǧyna Aqtöbe oblysy tartu ettı. Jaŋa keşen 29 tamyz – Halyqaralyq iadrolyq synaqtarǧa qarsy äreket künı aşyldy. Öitkenı osy jobanyŋ negızıne Qazaqstan Prezidentınıŋ «Älem. XXI ǧasyr» atty antiiadrolyq manifesınıŋ ideiasy engızılgen. Aita ketelık, osydan tura 27 jyl būryn el Prezidentınıŋ Jarlyǧymen Semei iadrolyq poligony jabylǧan bolatyn. Būl kün küllı älemdegı eŋ ırı iadrolyq qaruy bar memlekettıŋ bırınıŋ odan bas tartu prosesınıŋ bastaluy edı.
«Qazaqstan tek poligondy ǧana japqan joq, sondai-aq älem boiynşa törtınşı iadrolyq qaru-jaraqtan bas tartty. Osylaişa, bız bükıl adamzattyŋ senımıne ie boldyq!» dep mälımdedı Nūrsūltan Nazarbaev saltanatty räsımde söilegen sözınde. Prezident öz sözınde jer şaryndaǧy adamzatty, halyqtardy, ükımetterdı iadrolyq qaruǧa qarsy bırıgıp küresuge ündedı.
Saltanatty räsımge qatysqan Aqtöbe oblysynyŋ äkımı Berdıbek Saparbaev mūndai nysandy salu aqtöbelıkter üşın zor qūrmet ekenın aitty. «Bız osy monument arqyly Qazaqstannyŋ jäne Prezidentımızdıŋ 27 jylda beibıtşılıktı saqtauǧa qandai üles qosqanyn körsettık» dedı äkım jurnalisterge bergen tüsındırmesınde.
Säuletşılerdıŋ oiynşa, bırtūtas bolyp bırıktırılgen qabyrǧa jer betındegı halyqtardy qorǧap tūratyn japyraq tärızdı şatyrdy beineleidı. Ärı dästürlı türık qūryltaiynyŋ belgısımen ūlttardy ūiystyryp, bır şaŋyraqtyŋ astyna jinaidy. Metall men tabiǧi tastardan tūrǧyzylǧan keşen üş bölıkten tūrady. Bırınşı bölıgı – bölşekteu men oqşaulaudy, ekınşısı – ümıt, erkındık pen täuelsızdıktı, üşınşısı beibıtşılık pen ūltaralyq kelısımdı saqtauǧa aparatyn joldy beineleidı. Monumenttıŋ jalpy ūzyndyǧy – 111 metr, enı – 18,4 metr, biıktıgı – 17,5 metr.
Atap aitarlyǧy, «Beibıtşılık qabyrǧasynyŋ» tūrqy joǧary tözımdı şoiynnan jasalǧan. Ony tūrǧyzuǧa jalpy aumaǧy 6000 tekşe metr bolatyn 1200 tonna granit paidalanylǧan. Körgen adamnyŋ bırden baiqaityny, monumentte älemnıŋ 51 tılınde «Beibıtşılık» degen söz jazylǧan. Avtorlar jobanyŋ körnekı mazmūnyna ǧana emes, onyŋ funksionaldyǧyna da erekşe nazar audarǧan. Mysaly, aspaly şatyrdyŋ aşyq panelderınde 2,5 mln jaryq nüktesı bar 616 tekşe metrdı alyp jatqan alyp LED-jüie ornatylǧan. Ol kez kelgen ülken kölemdegı sandyq keskınderdı taratuǧa mümkındık beredı. Qandai da bır körınıstı ekranǧa şyǧaru europalyq önım öndıruşılerdıŋ eŋ soŋǧy ülgıdegı beine, audio jäne kommutasiialyq jabdyqtar ornatylǧan serverlık bölmelerde jüzege asyrylady. Demek, būl taŋǧajaiyp art-nysan saiasi, mädeni-būqaralyq, aqparattyq şaralardy, lazerlık jäne basqa da şoulardy ötkızetın tamaşa orynǧa ainalady. Qūny 1,8 mlrd teŋge tūratyn alyp nysan aqtöbelık kompaniialar men käsıpkerlerdıŋ qarajatyna salynǧan.
