Nūr-Sūltan qalasynda ındettı jūqtyru qaupı küşeidı. Sebebı bas qalada karantin talaptary jiı-jiı būzyluda. Mäselen, soŋǧy üş aptada 5224 nysanda karantin erejelerı saqtalmaǧan. Sol sebepten elorda aumaǧynda naqty şaralar qabyldau jönınde şeşım şyǧaryldy. Demek, qiyn kezeŋnen aman-esen ötu üşın qalanyŋ ärbır tūrǧyny men qonaǧy saqtyq, tazalyq erejelerın qataŋ saqtauy tiıs.
Covid-19 ındetın jūqtyru qaupınıŋ joǧarylauy men nauqastar sanynyŋ artuyna bailanysty qalalyq ştab otyrysynda bırqatar qosymşa şekteuler qabyldandy. Karantindık şaralar 14 qazannan bastap küşıne enedı. Būl turaly elorda äkımı Altai Kölgınov mälım ettı.
«Bırınşıden, jergılıktı atqaruşy organ qyzmetkerlerı men olardyŋ kvazimemlekettık sektorynyŋ kemınde 60 paiyzy qaşyqtan jūmys rejimıne auysady. Adam köp jinalatyn jeke ūiymdar jūmysşylardy qaşyqtan jūmys rejimıne auystyruy qajet. Indettı jūqtyrudyŋ negızgı oşaqtary – ūjymdyq (eŋbek) oşaqtar. Jūmys oryndarynda sanitarlyq-epidemiologiia talaptarynyŋ qataŋ saqtaluyn baqylau qajet.
Ekınşıden, kafe, meiramhana, bar, ashana jäne basqa da qoǧamdyq tamaqtanu nysandarynyŋ jūmys uaqyty 22 saǧatqa deiın (9:00-den 22:00-ge deiın) qysqartylady. Jūmys künderı de, demalys künderı de. Toltyryluy 30 orynnan artyq emes. Notariustardyŋ, advokattyq keŋselerdıŋ, buhgalterlerdıŋ, konsaltingtıŋ, jyljymaityn mülık jäne jarnama agenttıkterınıŋ, sot oryndauşylarynyŋ, turoperatorlardyŋ jäne t.b. jūmys kestesı saǧat 18-ge deiın (9:00-den 18:00-ge deiın). Jūmys künderı de, demalys künderı de.
Azyq-tülık emes tauarlar men zattardy satatyn butikterge tek jūmys künderı 18 saǧatqa deiın jūmys jasau rūqsat etıledı. Monşa, basseinmen qamtylǧan saunalardyŋ jūmys kestesı: jūmys künderı 8:00-den 21:00-ge deiın, senbı jäne jeksenbı künderı 9:00-den 19: 00-ge deiın. Aldyn-ala jazylu mındettı. Jeksenbıde qoǧamdyq kölıktıŋ jūmysy toqtatylady. Avtobustar dezinfeksiialanady.
Üşınşı. Polisiia departamentı sanitarlyq därıgerlermen bırlese kündelıktı reidter jürgızıp, sanitarlyq talaptardy ūstanu boiynşa zaŋbūzuşylyq faktılerın anyqtau jūmysyn küşeituı qajet.
Reidter köptegen nysandardyŋ sanitarlyq-epidemiologiialyq talaptardy qataŋ saqtalmai jatqandyǧyn körsetıp otyr. Ūiymdar epidemiialyq talaptardy bırneşe ret būzǧan faktıler boldy. Mūndai residivisterdıŋ qyzmetı toqtatylady» dep jazdy Altai Kölgınov instagram paraqşasynda.
