Elordalyq erıktıler

Äleumettık jelılerden «Astanada joǧalyp ketken studenttı ızdeuge erıktıler toby jinalyp jatyr» nemese «Aiazdy künderı erıktıler toŋǧan astanalyqtarǧa ystyq şai berdı» degen igılıgı mol aqparattardy jiı oqyp jatamyz. Osydan ke­iın baryp köpşılıktı volonter jastar turaly mälımet qyzyqtyrary anyq. Jaqynda mūndai qaiyrymdy jandardyŋ basy-qasynda jürgen elorda äkımdıgınıŋ «Astana jastary» kommunaldyq memlekettık mekemesınıŋ bölım basşysy Elvira Esmūhanovamen bailanysqanymyzda, jūrtşylyqtyŋ alǧysyna bölenıp jürgen top turaly bıraz jaitqa qanyq boldyq.

Tötenşe jaǧdailarda kömektesedı

Astana äkımdıgıne qarasty «Astana jastary» KMM erıktıler qozǧalysyn damytuǧa arnalǧan arnaiy bölım jūmys ısteidı. Būl bölımnıŋ qūrylǧanyna bes jylǧa taqau uaqyt bolǧan, iaǧni 2014 jyldan berı jastar event-volonterlık, äleumettık volonterlık, eco-volonterlık jäne sporttyq ıs-şaralarǧa arnalǧan volonterlık bolyp tört baǧytta jūmyldyrady eken. Dälırek aitqanda, event baǧyty halyqaralyq deŋgeidegı jiyndarǧa arnalsa, keiıngısınde jastar äleumettık maŋyzy bar bastamalarda qyzmet etedı. Al eco bölımınıŋ erıktılerıne tabiǧatty aialap, qorşaǧan ortany qorǧau mındetı tapsyrylar bolsa, soŋǧy sporttyq ıs-şaralarda dopingtık baqylau jūmysy qosa berılgen körınedı.
«Jaqynda bes balasynan bır tünde aiyrylǧan ananyŋ jaǧdaiy bükıl eldı jylatty. Osyndai qaiǧyly oqiǧaǧa bailanysty biyldan bastap qosymşa tötenşe jaǧdailarǧa arnalǧan volonterlık baǧyty qosylǧaly tūr» dep Elvira Esmūhanova aldaǧy jospar turaly oi bölıstı.

Volonterler jasyna şek qoiylmaidy

Qazırgı uaqytta erıktıler bazasynda 2500 adamnyŋ mälımetı tırkelse, onyŋ 300-ı tūraqty bailanysta eken. Qoǧamdyq jūmystarǧa belsendı aralasu üşın ädette 14-17 jas aralyǧyndaǧy jastar niet bıldıretın körınedı. Sebebı būl – olardyŋ bıluge, köruge, jaŋa ortamen aralasyp, bos uaqytty tiımdı paidalanuǧa ūmtylatyn kezeŋı. Erıktılerdıŋ jas şamasyna eşqandai şekteu bolmaidy. Sol siiaqty bos uaqyttarynda ortalyqqa kelıp, türlı mäseleler talqylanatyn körınedı. Volonter jastardyŋ jeke ömırı, sabaǧy, keide uaqytynyŋ tyǧyz bolatyny belgılı. Sondyqtan qandai da bır ıs-şara ötkızılmes būryn bärınıŋ kelısımımen yŋǧaily uaqyt taŋdalady.
«Jastarǧa būl qyzmettıŋ qyr-syryn üiretetın, tärbie­lep, oqytatyn mekeme bar ma?» degen sūraǧymyzǧa qazır «Volonterler mektebı» jūmys ıstep tūrǧanyn aitty. Mūnda türlı salanyŋ mamandary şaqyrylyp, konfliktologiia, psihologiia sabaqtaryn oqytyp, qalanyŋ körıktı jerlerınıŋ tarihy turaly, özge elderdıŋ azamattarynyŋ mentalitetın zertteu boiynşa därıster ötıp qana qoimai, alǧaşqy medisinalyq kömek körsetudıŋ joldaryna deiın üiretedı eken. Mūnyŋ bärı volonterlık kezındegı qiyndyqtardyŋ aldyn aluǧa yqpal etedı.

Özge tıldıŋ bärın bıl…

Astana jahandyq jiyndardyŋ ordasyna ainalyp kele jatqany jasyryn emes. Bas qalamyzda älem nazary auǧan EKSPO körmesı, Siriia boiynşa bırneşe kelıssöz, özge de ıs-şaralar joǧary deŋgeide öttı. Mıne, osyndai jahan halqy bas qosqan saltanatty kezdesulerde şet tılderın bıletın jastardyŋ kömegı zor. Kelgen jūrtty tırkeu­den ötkızıp, olarǧa jön sıltep otyru, sūraqtaryna jauap beru erıktılerdıŋ moinyna artylady.
«Şyny kerek, mūndai kezdesulerde şet tılın meŋgergen erıktılerdıŋ kömegı köp tiıp jatady. Ūiymdastyruşylar audarmaşy jaldap äure bolmaidy. Öz kezegınde jastar şeteldıktermen aralasyp, jaŋa tanys tauyp qana qoimai, meŋgergen tılderın jetıldıre tüsedı» dedı mekeme qyz­metkerı.

Qarttarǧa – qamqorlyq

Al bos uaqytta «Qamqorlyq mekenjaiy» atty äleumettık jobasy ıske asyrylady. Būl joba aiasynda erıktıler jalǧyz tūratyn zeinetkerlerdı, Ūly Otan soǧysynyŋ ardagerlerın merekemen qūttyqtap, köŋıl küilerın köteruge ūmtylady. Eger jer üide tūrsa, aulasyn qysta qardan, jazda kül-qoqystan tazartu da nazardan tys qalmaidy. Būǧan qosa jazda eko şaralar ūiym­das­tyrylyp, özenderdıŋ jaǧasyn retke keltıru, aǧaş otyr­ǧyzu jūmysy jürgızıledı eken.

Kömek qolyn sozady

Elvira Esmūhanovamen al­ǧaş habarlasqanymyzda erıktılermen bırge aiazdy künı jūrtşylyqqa ystyq şai taratyp jürgenın aityp, keiınırek sūhbattasuymyzdy ötıngen edı. Äŋgımenıŋ yŋǧaiy kelgende osy sūraǧymyzdy qoiǧan edık, qystyŋ qahary küştı aiazyn bır sät ūmytu üşın osyndai ıs-şaralar jiı ūiym­dastyrylatynyn aitty. Oǧan ūiymǧa müşe erıktılerden bölek, «A35» dep atalatyn kolledj studentterınen qūralǧan top kömektesedı eken.
«Volonterlık jetkınşekterdıŋ boiyndaǧy jalqaulyqtan aryluǧa kömektesedı, özgelerge kömek körsetuden azamattyŋ adamgerşılık sezımderı oianady. Biyl Elbasy Nūrsūltan Nazarbaev jariialaǧan Jastar jyly aiasynda erıktıler qozǧalysyna erekşe män berıp otyr. Būl – ūiymymyzǧa müşe jandardyŋ eŋbegınıŋ elengenı. Olar tegın jūmys ıstese de, qoǧamnyŋ damuyna äser etıp otyr» deidı «Astana jastary» KMM bölım basşysy.

Jastar saraiy erıktıler ortalyǧyna ainalady

Elordada qaiyrymdylyqpen ainalysatyn jastar jetkılıktı. Olardyŋ bırı jan-januarlarǧa arnalǧan tūraqtarda jūmys ıstese, endı bırı, joǧaryda aitylǧandai, joǧalǧan jandardy ızdeuge järdemdesedı. Taǧy bırı medisinalyq mekemeler men qarttar üiınde qyzmet körsetedı. Sondai-aq elımızde ūlttyq volonterlık jelı de jüzege asyrylyp jatyr. «Mūndai auqymy keŋ ūiymnyŋ ǧimaraty bar ma?» degenımızde bölım basşysy: «Astana jastary» KMM qazırgı uaqytta Saryarqa audany äkımdıgınıŋ ǧimaratynda ornalasqan. Degenmen juyq arada Jastar saraiy jastar jinalatyn ortalyqqa ainalyp, erıktıler ūiymynyŋ qaramaǧyna berıledı» dedı.
Būl mekeme memlekettık sektorlarmen tyǧyz qarym-qatynasta bolǧandyqtan, 2017 jyly bükıl älem köz tıkken EKSPO körmesınde 1500 erıktı qyzmet körsetıptı. Nebärı üş aidyŋ ışınde elordadaǧy auruhanalardan bastap, teatr, polisiia bölımşelerımen bırge jūmys ıstep, 90-nan asa nysan volonterlerdıŋ qaramaǧynda bolǧan. Būl da jön degen oida qaldyq. Sebebı körme kezınde şeteldıkter pavilondardy ekı-üş saǧat qana aralasa, ärı qarai qalanyŋ özge de körıktı tūstaryn tamaşalau­ǧa ketetını anyq. Mıne, osylaişa EKSPO-nyŋ joǧary deŋgeide ötuıne, kelgen turisterdıŋ, elımızdıŋ är aimaǧynan kelgen jūrttyŋ Astanany barynşa jaqsy jaǧynan köruıne jastardyŋ qosqan ülesı zor bolǧanyn bıldık. EKSPO-dan bölek, Art Fest-2016, G-Global-2018, MuzTV syilyǧy, Gravitasiia-2015, Triatlon-2018 sekıldı auqymdy şaralardyŋ joǧary deŋgeide ötuıne erıktıler qozǧalysy ūiytqy bolǧan.
Äŋgımenıŋ oraiy kelgende aita keterlıgı, osydan 8 jyl būryn Astanada ötken Aziada oiyndary kezınde şeteldıkterge laiyqty qyzmet körseterlık ūiymdardyŋ joqtyǧy aitarlyqtai sezılıp, sonyŋ saldarynan erıktılerdı mektep oquşylary arasynan ırıkteuge tura kelgen. Sol tūsta bır ǧana №48 mektep-liseiınen 50-ge juyq oquşy şeteldık qonaqtarǧa qyzmet körsetkenı älı esımızde.
Qoryta aitar bolsaq, Memleket basşysy öskeleŋ ūrpaqty qoldau maqsatynda 2019 jyldy Jastar jyly etıp jariialady. Elımızdıŋ bolaşaǧy jıgerlı, bılımdı, bäsekege qabılettı ūrpaqtyŋ qolynda ekenı, keleşekte el tızgının ūstaityn azamattar bügıngı jastar bolatyny anyq. Al «Astana jastary» kommunaldyq memlekettık mekemesı Qazaqstannyŋ güldenuıne, onyŋ ışınde künı keşe ǧana arqa törıne qonys audarǧan bas qalamyzǧa dünie jüzınıŋ nazar saluyna özındık ülesın qosyp jatqanyn erekşe aityp ötkendı jön kördık.