Eŋbek adamy turaly erınbei jazuǧa bolady. Aramyzda özı jüregımen qalaǧan märtebelı mamandyqtyŋ bılgırı atanyp, abyroiy asqan azamattar az emes. Solardyŋ bırı – qaladaǧy qūrylystyŋ damuyna aitarlyqtai üles qosyp, eren eŋbektıŋ iesı atanǧan «Stroikonstruksiia» AQ-nyŋ basşysy, Astananyŋ qūrmettı azamaty Viktor Buller.
Ol basqarǧan kompaniianyŋ tarihy ötken ǧasyrdyŋ orta kezınen bastalady. 1959 jyly «Glavselinpromstroi» temırbeton būiymdar men konstruksiialar kombinaty retınde aşyldy. Viktor Buller alǧaş eŋbek jolyn osy kombinatta armaturalyq sehtıŋ aǧa şeberı bolyp bastaidy. Qandai jūmys ıstese de, tiianaqty oryndaityn besaspap mamannyŋ qabıletın aǧa buyn ökılderı joǧary baǧalaidy. Onyŋ kez kelgen ıstı ūrşyqtai iırıp alyp ketetındıgıne riza bolady.
Keŋes däuırınde talai qūrylystyŋ körkın aşqan kombinat elımız täuelsızdık alǧannan keiın, iaǧni 1992 jyly «Stroikonstruksiia» aksionerlık kompaniiasy bolyp qaita qūryldy. Toqsanynşy jyldardaǧy qiynşylyq bärımızdıŋ esımızde. Tıptı, ataǧy köpke tanylǧan zauyttardyŋ özı tūralap jatty. Sondai kezeŋde bız söz etıp otyrǧan käsıporynnyŋ şaŋyraǧy şaiqalmady. Bılgır basşy men ūtymdy ūiymdastyruşylyq qabılettıŋ arqasynda naryqtyq qatynastyŋ kıltın taba bıldı. Kadrlyq qūramdy saqtap, täjıribelı jūmysşylardy joǧaltpady. «Sol kezdegı basqa kompaniialar sekıldı bızdıŋ zauyt ta qiyn kezeŋdı bastan ötkerdı. Bıraq solai eken dep, qol qusyryp otyruǧa arym jıbermedı. Öitkenı mekemenıŋ artynda qanşama adamnyŋ taǧdyry tūrdy. Sondyqtan jūmys ısteuge, ızdenuge tura keldı» dep ötken künderdı eske alady Viktor Buller.
Bızdıŋ keiıpkerımız Kereku öŋırınıŋ Şarbaqty audanynda düniege kelgen. Balalyq şaǧy soǧystan keiıngı jyldarǧa tap keledı. Eldıŋ ışı qiyndyqtan älı eŋse kötere qoimaǧan kez. «Bala künımnen auyl adamdarynyŋ tynym tappai jūmys ıstegenın körıp östım. Taŋnyŋ atysy men künnıŋ batysynda egıs basy men qyrman arasynda şapqylap jüredı. Sonda da olardyŋ qabaqtarynda kırbıŋ bolmaidy. Bärı de köŋıldı, jadyrap, erteŋgı künge degen senımmen ömır süredı. Men sondai qairaty mol, qajyrly adamdardan ülgı aldym. Özım de eŋbekke jastai aralastym. Sol üşın taǧdyryma rizamyn» deidı ol balalyq şaǧynan üzık syr tartyp.
Bügınde elordanyŋ körkem kelbetı jaiynda köp jazylady. Eŋsesı biık ǧimarattarǧa tamsanyp qaraimyz. Bıraq olardyŋ salynu joldary aityla bermeidı. Qazaqstannyŋ qūrmettı qūrylysşysy Viktor Buller jetekşılık etetın «Stroikonstruksiia» kompaniiasy bas qaladaǧy «Bäiterek» monumentı, Beibıtşılık jäne kelısım saraiy, Täuelsızdık saraiy, «Nūr Astana», «Äzıret Sūltan» meşıtı, «Duman» oiyn-sauyq ortalyǧy, «Sinema Siti», «Mega», «Han Şatyr», Elordalyq sirk, «Alatau», «Qazaqstan» sport keşenderı, Prezidenttıŋ mädeniet ortalyǧy, Ūlttyq kıtaphana, Oquşylar saraiy jäne Opera teatry sekıldı ırı qūrylys jobalaryna belsene atsalysty.
Atalǧan käsıporynmen tyǧyz bailanysta jūmys ısteitın qūrylys kompaniialary ärıptesterı turaly da jyly sözderın aiamaidy.
«Osy zauytpen jūmys ıstegenımızge 10 jyldan asty. Ol – Astanadaǧy şyǧaratyn önımı boiynşa eŋ senımdı kompaniia. Mamandarǧa betondy «Stroikonstruksiia» AQ-nan aldyq desek, tehnikalyq baqylauda basqa sūraq tuyndamaidy. «Bullerlık önımder» nemese «Stroikonstruksiiany» bärı maqtaidy» deidı «Bikom İnjiniring» JŞS-nıŋ basşysy Janat Batpenov.
Qazırgı taŋda kompaniia Europanyŋ eŋ ozyq jelılerımen jaraqtalǧan. Onyŋ şyǧaratyn önımderı elımızdıŋ barlyq aimaqtaryna tanylǧan. Bügınde zauytta 660 adam eŋbek etedı, onyŋ 159-y – äiel, olar köbınese kran jäne dänekerleu maşinalarynda jūmys ısteidı.
Mıne, osyndai eldıŋ igılıgı üşın jan salyp jūmys ıstegen asyl azamat Viktor Bullerdıŋ eŋbegı kım-kımge de ülgı dep aituǧa bolady.
Azamat ESENJOL
