Astana – bükıl Qazaqstannyŋ jetıstıgı. Bız HHI ǧasyrda ǧalamat dünienı bırge jasadyq. Adamzat tarihynda mūndai qalalar eşqaşan 20 jyldyŋ ışınde salynbaǧan. Al bız saldyq!
Nūrsūltan NAZARBAEV,
Qazaqstan Respublikasynyŋ Tūŋǧyş Prezidentı
Sät saiyn zymyrap ötıp bara jatqan uaqyt adamzat tarihynyŋ jaŋa bır betterı bolyp jazylyp qalyp jatyr. Qazaq elınıŋ sol uaqyt uysyndaǧy tarihynyŋ eŋ bır bai da mazmūndy betterı täuelsızdık tarauy bolar, bälkım?! Keler jyly el täuelsızdıgıne 30 jyl tolǧaly otyr. Osy kezeŋde bır ǧasyrdyŋ aiasyna da syia bermes jaǧdailardy köz kördı. Eŋ bastysy, älemdık abyroily memleketterdıŋ bırı bola bıldık! 
Osy oraida Qazaqstan Respublikasynyŋ Prezidentı Qasym-Jomart Toqaevtyŋ respublikalyq «Egemen Qazaqstan» jäne «Aiqyn» gazetterıne (2 säuır, 2019 jyl) bergen «Barymyz da, baǧymyz da – Täuelsızdık» atty sūhbatynda: «Nūrsūltan Äbışūly Nazarbaev täuelsızdıktıŋ alǧaşqy jyldarynan bastap jaŋa memlekettılık jasaudyŋ barlyq tauqymetın basynan ötkerdı. Qiyndyqqa toly osy jolda tolaǧai tabystarǧa qol jetkızdı. Qazaq elın törtkül düniege äigılep, barşa älemge moiyndata bıldı. Täuelsız elımızdıŋ bügıngı ösıp-örkendeuı, erteŋgı damu keleşegı Nazarbaev esımımen tyǧyz bailanysty» degen pıkırın alǧa tarta söiler bolsaq, bügıngı elordamyz – keşegı Selinograd, odan keiıngı Aqmola, al qazırgı Nūr-Sūltan qalasy – Tūŋǧyş Prezidentımızdıŋ aqyl-parasatymen jäne el bolaşaǧyn alystan boljaǧan kemeŋgerlıgınıŋ arqasynda ornaǧan şahar!
Qazaqstannyŋ astanasyn Almatydan Saryarqa töskeiıne auystyru turaly oidy eŋ alǧaş Nūrsūltan Nazarbaevtyŋ aitqany da este. Şynyn aitqanda, jüregımız auzymyzǧa tyǧyldy. Neǧylǧan jaŋa astana?! Ekonomika bolsa qūldyrap jatyr, halyq jūmyssyz, künkörıstıŋ özı auyrlai bastaǧan tūsta astanany köşırıp ne körındı? Osy saryndaǧy köŋıl küidıŋ bolǧany jasyryn da emes. Alaida soǧan qaramastan elordany auystyru turaly Qazaqstan Respublikasy Joǧarǧy Keŋesı 1994 jyly 6 şıldede şeşım qabyldady da, astanany resmi köşıru 1997 jylǧy 10 jeltoqsanda jüzege asqan bolatyn. Mıne, sol bır tarihi sätke de 23 jyl!
Aqmolalyqtar Almatydan kelgen alǧaşqy köştı Saryarqanyŋ saqyldaǧan sary aiazy men ūli soqqan boranymen qarsy alyp edı. «Jyly jaqqa üirengen almatylyqtar köp ūzamai keiın qaityp ketedı älı» dep oilaǧanymyz da boldy. Alaida bar qiynşylyqtarǧa qaramastan jäne de Nūrsūltan Nazarbaevtyŋ jeke basynyŋ barynşa qajyry men qairatynyŋ arqasynda astana salyna bastady. Al endı qazır qarap otyrsaŋyz, sengıŋ-aq kelmeidı! Öitkenı köŋıldegı de, kökeidegı de, köz aldymyzdaǧy da astana – Nūr-Sūltan qalasy tap bır būrynnan bar, mäŋgılık ornap baiaǧydan tūrǧan qala siiaqty jürek tükpırınde qūtty bır quanyş bolyp jatqandai körınedı!
Täuelsız el bolyp qalyptasqan ekı on jyldyqtyŋ aralyǧynda, kök kümbezınıŋ ūşar basynda kök bairaǧy asqaq jelbırep tūrǧan däl mynadai Aqordaly astana salyp alu mümkın be edı? Mümkın bolmasa da, Qazaq elınıŋ elordasy, astanasy salyndy! Älemde Qazaq elınıŋ astanasy bar! Sol bügıngı Nūr-Sūltan qalasy özınıŋ taŋǧajaiyp keskın-kelbetımen de, ärlengen sänımen de qazır dünie älemın taŋdandyryp ta, tamsandyryp ta otyrǧandyǧy aqiqat!
Täuelsızdıktıŋ baiandy taǧdyry Nūrsūltan Nazarbaevtyŋ taǧdyry, al Elbasynyŋ taǧdyry tūtas bır halyqtyŋ, barşa qazaqstandyqtardyŋ taǧdyry bolyp qalyptasty. Mäŋgılık eldıŋ astanasyn Tūŋǧyş Prezidentımız körıktı, ırgesı berık, eŋsesı biık, bırlıgı myzǧymas, yntymaǧy arzymas, yrysy tausylmas, berekesı ketpes, yryzdyǧy ortaimas, däuletı şaiqalmas, älem aldyndaǧy jüzı jarqyn, sözı ötımdı, aibyny asqaq bolsyn degen perzenttık te, prezidenttık te, adal oiymen bardan joqty qūrap degendei bärın de jasady!
Bügıngı astanamyz – qasiettı qazaq jerıne jüregıne syiǧan tūtas älemdı öz elı men halqyna degen şeksız süiıspenşılıgınıŋ belgısındei etıp öz dalasyna qondyryp, ornyqtyra bılgen Nūrsūltan Nazarbaevtyŋ özındık bır älemı!
Täuelsız elımız üşın Nūrsūltan Nazarbaev Esıldıŋ boiyna el qondyryp, alǧaşqy qazyǧynan bastap özı qaǧyp, bügıngı aidyndy da aibyndy Aqordaly astanany düniege äkelgendıgı bızdıŋ, iaǧni Qazaq elınıŋ Mäŋgılık el bola alatyndyǧyn däleldep, osyǧan eŋ äuelı öz jūrtynyŋ da, odan qaldy dünie jūrtynyŋ da közderın jetkızıp, ilandyra bılgen ūlylyǧy edı!
XXI ǧasyrdaǧy Qazaq elın jäne ata-babalarymyz üşın ǧasyrlar boiy arman bolǧan täuelsızdıgımızdı bügıngı astanasyz köz aldyŋyzǧa elestetıp bır baiqaŋyzşy! Auzyŋyzdyŋ dämı kırmes edı!
Bügıngı el astanasy – Nūr-Sūltan qalasy el täuelsızdıgınıŋ lüp-lüp soǧyp tūrǧan jüregı emes pe?!
Halqymyzdyŋ barlyq ūly mūrattarynyŋ Bäiterek bolyp tereŋge tartqan tamyry, jaiqalǧan japyraǧy emes pe?!
Bügıngı el astanasy – Nūr-Sūltan qalasy döŋgelengen dünienıŋ qazaq ielenıp otyrǧan qasiettı bır jerıne ornatylǧan älemnıŋ tört būryşynan da közge tüsıp körıner, altyn tūǧyrly, eŋ zaŋǧar da eŋ biık, eŋ abzal da, eŋ bır azbaityn, tozbaityn mäŋgılıgı jolynda myŋ ölıp, myŋ tırılgen qazaq üşın soǧylǧan ūly eskertkış!
Sol ūly da qasiettı, kielı eskertkıştı qazaq halqy üşın tūrǧyzyp bergen Elbasy Nūrsūltan Nazarbaevtyŋ öz halqynyŋ aldyndaǧy perzenttık te prezidenttık paryzyna ämända adal bolyp kele jatqandyǧyn jäne de öz halqy üşın nebır közsız erlıkke bara alatyn, batyl da batyr bola alatyn tektı de bır airyqşa dara da dana qasietın aiǧaqtap tūr!
Jer mäŋgılık bolar, el bolsa! El mäŋgılık jasar, er bolsa! Er mäŋgılık jasar, el bolsa! Mıne, mäŋgılıktıŋ bar tūtastyǧy osyǧan kelıp saiary da bar. Alaida osy mäŋgılıkterdı baiandy etu jolyndaǧy alǧaşqy qadamdar Elbasy üşın oŋaiǧa tüstı me? Ärine, oŋaiǧa soqpady! Soǧan qaramastan, ol Qazaqstannyŋ özındık damu jolyn qalyptastyrdy. El şetı men jer şegıne eşkımnıŋ köz alartpauyn aŋdady, şekaranyŋ qauıpsızdıgın qamdady. San ūlt ökılderınen qūralǧan eldıŋ bırlıgı men yntymaǧyn oilady. Esıldıŋ boiyna el qondyryp, dünienıŋ tört būryşyna esıgı aiqara aşylǧan «Mäŋgılık el» qaqpasy bar Qazaq elınıŋ astanasyn saldy!
Būl künderı Nūr-Sūltan qalasynyŋ aumaǧy ǧana qanat jaiyp, ūlǧaiyp bara jatqan joq, elordamyzdyŋ jer jahandaǧy abyroiy da, ızgılıktı ısterı de ūlǧaiyp, ösıp, däuırlep barady. Bärın de qūtty qylsyn!
Jabal ERǦALİEV, jazuşy-dramaturg,
Qazaqstannyŋ eŋbek sıŋırgen qairatkerı
