Keşe elordadaǧy Mahambet Ötemısūly atyndaǧy Oquşylar saraiynda Nūr-Sūltan qalasy äkımınıŋ atynan az qamtylǧan jäne köpbalaly otbasylardan şyqqan, eleulı jetıstıkterge jetken balalarǧa jaŋa jyldyq syilyq tapsyru şarasy öttı.
Būǧan deiın dästürlı türde ülken saltanatpen toilanatyn merekelık şara biyl pandemiia jaǧdaiyna bailanysty erekşe türde ūiymdastyryldy. Balalarǧa jaŋa jyldyq syilyqty Aiaz ata men Aqşaqar sanitarlyq normalardy saqtai otyryp, üilerıne arnaiy jetkızıp tabystady. «Bügın qala äkımınıŋ atynan 450 balaǧa merekelık syilyqtar tapsyrdyq. Karantindık şekteulerge bailanysty jaŋa jyldyq şyrşalar ötkızılgen joq. Bıraq oǧan qaramastan bız balalardy quantudy jön kördık. Syilyq jiyntyǧynyŋ ışınde qala äkımınıŋ atynan qūttyqtau aşyq haty, üstel oiyndary men tättıler, sondai-aq kiım dükenderıne sertifikattar bar. Otbasylardy taŋdau barysynda mektep janynan qūrylǧan qamqorşylyq keŋes ūsynys berdı» dedı Bılım basqarmasynyŋ tärbie jūmysy jäne qosymşa bılım beru bölımı basşysy Aqmaral Hon.
Jyl saiyn Aiaz atany asyǧa kütıp, taqpaǧyn aituǧa asyǧatyn qamköŋıl bala men tılekşı ata-analar da igı bastamaǧa quanyp, öz tılekterın aitty. «Balamnyŋ jetken jetıstıkterı men talpynysyn eskerıp, merekemen qūttyqtap kelıp jatqan barşa Bılım basqarmasynyŋ qyzmetkerlerıne alǧys aitamyn. Mūragerdıŋ mektepte közge tüsıp onlain bolsa da äkım şyrşasyna qatysyp, syilyq alǧanyna quanyştymyn» dedı köpbalaly ana Ümıt Seisembaeva.
Aiaz ata men Aqşaqar oquşylardyŋ üiıne tosynnan barsa da, balalardyŋ olarǧa körsetetın önerlerı daiyn eken. «Men öskende elımdı älemge tanytatyn azamat bolǧym keledı. Mektepte matematikadan jäne basqa pänderden ǧylymi jobalarǧa qatysyp jürmın. Barşa qazaqstandyqtarǧa densaulyq pen tabys tıleimın. Jaŋa jyl är otbasyǧa baqyt äkelsın. Karantin talaptaryn saqtai otyryp ötkızılgen şyrşa keşı maǧan ūnady. Sebebı bärı tez jäne qyzyqty boldy» dedı Jambyl Jabaev atyndaǧy №4 mektep-gimnaziiasynyŋ oquşysy Mūrager Satan.
Aita keteiık, barlyq bılım beru ūiymdarynda bekıtılgen şaralar josparǧa säikes onlain formatta ötkızıledı.
