Jaqynda «ALJİR» memorialdy-mūrajai keşenınde memleket jäne qoǧam qairatkerı, saiasi quǧyn-sürgın qūrbany Janaidar Säduaqasovtyŋ 125 jyldyǧyna arnalǧan «Ǧibratty ǧūmyr» atty körme aşylyp, döŋgelek üstel mäjılısı öttı.
Şaraǧa Alaş ardaqtysynyŋ tuystary, tarih ǧylymdarynyŋ doktory, professor Bürkıtbai Aiaǧan, tarihşy ǧalymdar Amangeldı Qaşqymbaev, Jabai Qaliev, Qūndyzai Erımbetova, Memleket tarihy instituty ǧylymi aqparat bölımınıŋ basşysy, aqyn Serık Seiıtman, Y.Altynsarin atyndaǧy «BINOM» mektebınıŋ ūstazdary men oquşylary qatysty.
Körmege J.Säduaqasovtyŋ otbasylyq fotosuretterı, türlı memlekettık lauazymdardy atqaru barysynda qol qoiǧan qūjattary, maqalalary men jeke zattary qoiylǧan.
Ǧalymdar qazaq ziialysynyŋ önegelı ömırı men qajyrly qyzmetı turaly tarihi faktılermen, al tuystary estelıkter men ömırbaianyna qatysty tyŋ derektermen bölıstı. Sondai-aq, eldıŋ äleumettık-ekonomikalyq jäne ruhani-mädeni damuyna qosqan ülesı jaily naqty derekter men mälımetter aityldy.
Sol künı «ALJİR» mūrajaiy qūndy jädıgermen tolyqty. Janaidar Säduaqasovtyŋ tuǧan bauyrynyŋ ūrpaǧy Perizat Qūrmanqyzy mūrajai qoryna Janaidar kigen jiletkany syiǧa tartty. Körnektı tūlǧanyŋ kiımın Janaidar Säduaqasovtyŋ kenje ınısı Qūrman Säduaqasūlynyŋ otbasy bügınge deiın közınıŋ qaraşyǧyndai saqtap kelgen.
