Elordada memleketten qaitarymsyz grant alyp, käsıbın döŋgeletıp otyrǧan köpbalaly, jalǧyzılıktı, erekşe balalary bar analardyŋ qatary ösıp keledı. «Bilimall» bılım beru ortalyǧynyŋ direktory jäne Strong mothers NS QQ basşysy Raigül SERIKBAEVA – solardyŋ qatarynda.
Ol – köpbalaly ana. Alǧaş ret 2016 jyly özı tūratyn Öndırıs şaǧyn audanynda aǧylşyn tılınen sabaq bere bastaǧanda balalaryn türlı üiırme men qosymşa sabaqqa bergısı keledı, bıraq sol audanda ol kezde oqu ortalyǧynyŋ bolmauy, qalanyŋ basqa audandaryndaǧy ortalyqqa baryp-keludıŋ bırşama qarajatty qajet etetını oiyndaǧysyn jüzege asyruǧa qolbailau bolyp, bıraz qinalǧany bar. Köpbalaly otbasydan şyqqan balalardyŋ qoljetımdı qosymşa bılım aluyna mümkındıgı joq ekenın oilap, olarǧa qol ūşyn sozyp, mümkındıgınşe kömektesudı arman ettı. Söitıp, özı sekıldı köpbalaly jäne jaǧdaiy tömen otbasylardyŋ balalary üşın oqu ortalyǧyn aşu turaly oi jetegınde jürıp, memleket tarapynan berıletın grantqa ümıtker retınde konkursqa qatysady. Osylaişa, aldymen 2019 jyly, keiın 2021 jyly «Biznestıŋ jol kartasy-2025» biznestı qoldau men damytudyŋ memlekettık baǧdarlamasy aiasynda qaitarymsyz grant ūtyp alyp, sol qarajatpen armandaǧan oqu ortalyǧyn aşady. Köp ūzamai ortalyqqa tehnika men jabdyqtar satyp alyp, ısın döŋgelete beredı. Kışıgırım kabinette tuǧan jaqsy ideia jalǧasyn tauyp, äleumettık käsıpkerler qataryna qosylady.
– «Biznes bastau» jobasy jaiynda äkımdıkte ötken jinalystar men äleumettık jelılerden estıp-bıldım. Joba boiynşa ekı ailyq kursta oqyp bılımımdı jetıldırdım. 2019 jyldyŋ jeltoqsan aiynda joba boiynşa alǧaşqy grantymdy ielendım. Odan keiın 2021 jyldyŋ şılde aiynda grantqa taǧy da ötınış berıp, memleketten qaitarymsyz 5 mln teŋge jeŋıp aldym. Bügıngı taŋda Astananyŋ barlyq audanynda ortalyǧymyzdyŋ 4 bölımşesı bar. Olar Q.Kemeŋgerūly, 11; R.Qoşqarbaev, 39; Ş.Uälihanov, 3 jäne J.Moldaǧaliev, 2 mekenjaiynda ornalasqan. Eŋ aldymen kışıgırım oqu ortalyǧyn aştym. Qosymşa sabaqqa keletınder sany köbeiıp, ortalyq dami tüstı. Qajettı oqu-materialdyq qūraldardy alyp, ortalyǧymyzdyŋ ekınşı bölımşesın aşuǧa bekındım. Al qalǧan ekı bölımşenı memlekettık grant nätijesınde aştym, – dedı Raigül Serıkbaeva.
Bügıngı taŋda oqu ortalyǧynda şamamen 15 mūǧalım jūmys ısteidı. Olardyŋ qatarynda «Jastar praktikasy» baǧdarlamasy boiynşa jūmys ısteitın jastar da, zeinetaldy jastaǧy jäne zeinetker ūstazdar da bar.
Bılım beru ortalyǧy jetekşısınıŋ aituynşa, mūndaǧy oqu aqysy ekı türge jıkteledı. Onyŋ bırı – jeŋıldık boiynşa, al ekınşısı – jalpy baǧa boiynşa. Köpbalaly otbasy üşın mūnda ülken jeŋıldık qarastyrylǧan. Būl ortalyqta mektepke daiyndyq, ūzartylǧan kün toby, dombyra, şahmat, matematika, qazaq tılı, orys tılı, aǧylşyn tılı, vokal, fortepiano üiırmelerı jūmys ısteidı. Sonymen qatar jylyna tört ret köpbalaly analarǧa aǧylşyn tılı jäne sifrlyq sauattylyq kursy ötedı.
– Elordadaǧy köpbalaly, jalǧyzılıktı jäne erekşe qajettılıgı bar bala ösırıp otyrǧan analar bırıgıp, «Astananyŋ myqty analary» – Strong Mothers NS atty qoǧamdyq qor aştyq. Bızdıŋ qoǧamdyq qordyŋ basty maqsaty – halyqtyŋ äleumettık osal toptaryndaǧy balalardyŋ, mümkındıgı şekteulı balalardyŋ äleuetın aşu, köpbalaly analar men erekşe balalardy tärbielep otyrǧan äielderdı qoldau arqyly Qazaqstannyŋ damuyna järdemdesu. Sonymen qatar osy qoǧamdyq qor arqyly az qamtylǧan otbasylarǧa, köpbalaly, jalǧyzılıktı, mümkındıgı şekteulı balalardy ösırıp otyrǧan analarǧa aqparat, qūjat tūrǧysynan qoldau körsetu, demeuşıler men serıktesterdıŋ kömegımen azyq-tülık sebetın taratyp beru, osy toptaǧy otbasylardyŋ balalaryn 50 paiyz jeŋıldıkpen öz mekememızde oqytudy basty maqsat etıp otyrmyz. Alǧa qoiǧan mındetımız ben atqarar şaruamyz köp. Balalarymyzdyŋ bolaşaǧy üşın bärımız bırlesıp, bırıge küş jūmyldyrsaq, alǧa qoiǧan barlyq maqsat-mejege sürınbei jeterımız aqiqat, – dedı äleumettık käsıpker.
Öz balalarynyŋ tärbiesımen ainalysa jürıp, özge balalardyŋ da bılımdı boluy üşın aianbai ter tögıp, käsıbın döŋgeletıp kele jatqan Raigül Vladimirqyzy şarşau degendı mülde bılmeidı. Ünemı ızdenıs üstınde. Qaitsem balalardyŋ bolaşaǧy jarqyn, keleşegı kemel bolady dep jarǧaq qūlaǧy jastyqqa timei, tynym tappaidy. Özı süietın käsıppen ainalysu arqyly igılıktı ısterdıŋ ūiytqysy bolyp jürgen jannyŋ jas analarǧa, jūmyssyz jürgenderge aitary da joq emes.
– Jas analarǧa jäne qyz-kelınşekterge aitarym: eşteŋeden qorqudyŋ qajetı joq. Aldyŋyzǧa maqsat qoidyŋyz ba, sol maqsatqa sai jūmys ısteuge talpynyŋyzdar. Jūmysyŋyzǧa adal bolyp, bar küş-jıgerıŋızdı maqsatyŋyzǧa jetu jolynda jūmsasaŋyz, eŋbektıŋ tättı jemısın, ülken nätijesın köresız. Tek alǧa ūmtylu kerek, – dedı Raigül Serıkbaeva.
