Kongress-holda halyq kompozitory, aqyn, änşı İmanjüsıp Qūtpanūlynyŋ ömırı men şyǧarmaşylyǧyna arnalǧan «Ua, aǧaiyn, men bolamyn qazaqtyŋ İmanjüsıbı» atty ädebi-sazdy keş öttı. Belgılı rejisser, QR eŋbek sıŋırgen qairatkerı Bolat Ūzaqov sahnalaǧan keşke astanalyq jäne elımızdıŋ är şalǧaiynan kelgen ärtıster qatysty.
Keş ūiymdastyruşylary «Jasynda toptan asyp, menmensıgen talaidyŋ köŋılın basqan», Aqan men Bırjannan qalǧan sal-serılık dästürdı ūstanyp, zamanyna iılmegen tūlǧanyŋ beinesın barynşa aşuǧa tyrysty. Ol üşın İmanjüsıp tuǧan, jürgen jerlerden önerpazdar elordaǧa şaqyrtyldy. Mäselen, onyŋ ömırbaianynda kındıgı kesılgen jer retınde Pavlodar oblysynyŋ Aqsu audany körsetılıp tūr. Sol siiaqty Kereku öŋırınen Astanaǧa arnaiy kelgen änşı-ūstaz, osydan üş jyl būryn Pavlodar qalasynda ötken İmanjüsıp Qūtpanūlynyŋ 150 jyldyǧyna arnalǧan baiqaudyŋ bas jüldegerı Medǧat Manapov İmanjüsıptıŋ änderın qūiqyljytty.
«Bızdıŋ äulette İmanjüsıp änderın aitu dästürı üzılgen emes. Atam sol kısınıŋ «Saryarqa» änın el jiı esti bermeitın nūsqasymen oryndaityn. Jiyn-toilarda aitatyn jalǧyz änı osy boldy jäne bır qyzyǧy būl nūsqasyn atamnan basqa eşkım oryndamaityn edı. Aşarşylyq kezınde arǧy atam Manap bai auylynan Ombyǧa qudalanǧan eken. İmanjüsıp änderıne degen süiıspenşılık, elge degen saǧynyştan tuyndaǧan bolsa kerek. «Bürkıt ūstap basyŋa bır şyǧaiyn, közıme bır körınşı Ereimentau» deitın joldary bar ǧoi. Tuǧan jerın aŋsaǧanda qiialdap aityp otyratyn körınedı. İmanjüsıp änderı solai bala kezden boiymyzǧa sıŋıp qaldy» deidı änşı.
Ötken ǧasyrdyŋ basynda quǧynǧa tüsken İmanjüsıp Öskemenge, odan soŋ Jetısu öŋırıne jer audarylady. Şūbaraǧaş, Oijailau, Lepsı, Qapalda tūrǧan būdan bırneşe ret jauap alynady. Almatydan konsertke kelgen Qazaq memlekettık qyzdar pedagogikalyq universitettıŋ oqytuşysy Gauhar Saparbaeva İmanjüsıp änderındegı erekşelıkterdı tarqatyp berdı. Alatau bauraiynan Astanaǧa at şaldyrǧan Doshan Odamanov Qūtpanūlynyŋ quatty änderıne saldy.
Quǧynnan oralǧan İmanjüsıp Syrdariia guberniiasynyŋ Şielı bolysyn bırşama uaqyt panalaǧany belgılı. Qyzylordadan şaqyrtylǧan Seitımhan Älımhan da öner körsettı.
Astanalyq İranǧaiyp Küzembaev, şymkenttık Nūrlan Esenqūl, kökşetaulyq Bisara Bakenova syndy aitysker aqyndar İmanjüsıp ruhyndaǧy ötkır sözderdı aityp, körermenderdıŋ delebesın qyzdardy.
Sondai-aq, keşke qatysqan Q.Quanyşbaev atyndaǧy memlekettık akademiialyq qazaq muzykalyq drama teatrynyŋ ärtısterı Jänıbek Mūsaev pen Altynai Nögerbek İmanjüsıp ömırınen bır ädemı körınıstı qoidy. Konsertte öner körsetkenderdı Astana qalasy memlekettık akademiialyq filarmoniiasynyŋ simfoniialyq orkestrı süiemeldep otyrdy.
Amanǧali QALJANOV
