Elorda tūrǧyndarynyŋ därıger qauymyna degen ıltipaty, sonymen qatar mūqtaj adamdarǧa qoldau bıldıruı artyp keledı.
Astanalyqtardyŋ niet-piǧylynan da şyǧar, bas qalanyŋ ortalyq köşelerınde COVID-19 – ǧa qarsy küresken 40-tan asa därıgerdıŋ suretı bar bilbordtar paida boldy. Būl – medisina qyzmetkerlerıne pandemiia kezındegı qajyrly eŋbegı üşın körsetılgen qūrmet. Osylaişa, şara bastamaşylary därıgerlerge qajyrly eŋbegı men ındetpen küreste ömırın saqtap qalǧany üşın alǧys bıldıredı.
Būl ıltipat Qūrban ait kezınde tıpten aiqyn körındı. Qala tūrǧyndary arasynan belsenıp şyqqan azamattar qaiyrymdylyq şarasyn ötkızıp, medisinalyq mekemelerge ystyq taǧam taratty. Jergılıktı bilık rūqsat etken oryndarda bır mezette bırneşe qazanǧa palau basyldy. Ūiymdastyruşylar mereke bolǧan soŋ, qūrbandyq malynyŋ etın paidalandy. Qūrbandyq malynyŋ etı men basqa da azyq-tülık önımderın auqattylarmen qatar qarapaiym adamdar da äkelıp berıp jatty. Daiyn as tamaqtanuǧa yŋǧaily boluy üşın arnaiy ydystarǧa salyndy. Ony auruhana qyzmetkerlerıne jetkızıp beru ısımen erıktı jastar jäne belsendı top müşelerı ainalysty.
Sondai-aq būl künderı qaladaǧy 1500 mūqtaj adamǧa ystyq tamaq taratyldy. İgı ıstıŋ sanitarlyq talapqa sai boluyn medisina qyzmetkerlerı qadaǧalap otyr. As daiarlauǧa känıgı aspazdar, täjıribelı mamandar qatysty, as-su qaladaǧy meiramhanalardyŋ bırınıŋ ashanasynda äzırlendı.
– Jūmys auyr emes. 4 aspazymyz, ekı kömekşımız bar. As mäzırın qalalyq äkımdıkpen bırlese otyryp jasadyq. Bırınşı asqa sorpa, ekınşısıne qoiu taǧam, oǧan qosa salat äzırlengen. Onyŋ tūtynuǧa qauıpsız ekenın sanitar därıgerler osy jerde tekserıp baryp, qorytyndysyn beredı,– deidı aspaz Aigül Särsenbaeva.
Sanitar därıger Damira Nūrannyŋ aituynşa, mūqtaj jandarǧa taratylatyn taǧamdar barlyq sanitarlyq talaptar saqtala otyryp äzırlengen. Sanitar mamandar as-sudyŋ önımderın qūramynan bastap, taǧam daiarlauşy jäne taratuşy adamdardyŋ arnaiy kiımderıne deiın tügel qadaǧalaidy. Barlyǧyna medisinalyq kıtapşa, bettūmşalarynyŋ boluy talap etıledı. Daiyn as tek osydan keiın ǧana tūtynuşylarǧa jol tartady.
– Tek qana taǧam taratyp qoimastan, jaǧdaiy tömen otbasylardy et önımderımen qamtamasyz etıp otyrmyz. Et taratuǧa 500-ge juyq erıktıler men avtoerıktıler kömektestı. Ystyq tamaqty taratuǧa 200 erıktı üles qosty. Qūrban ait merkesı kezınde demeuşıler qoldauymen üş künde 8100 adamǧa tamaq ülestırıp ülgerdık. Ystyq as bırınşı kezekte Nūr-Sūltandaǧy 12 stasionardyŋ qyzmetkerlerıne jetkızıledı. Būl tızımde qarttar men balalar üiı de bar,– dedı «Astana jastary» jastar resurstyq ortalyǧy basşysynyŋ orynbasary Aian Ermentaev.
İä, bıle bılsek, adamdardyŋ jeke basy siiaqty, tūtas qoǧamnyŋ da qasietı qysyltaiaŋ şaqtarda synalady. Sol kezde taǧdyr tezıne synbaǧandar odan beter şyŋdalyp, şirai tüsedı, al bopsany kötere almaǧandar qūrdymǧa ketedı. Odan keiın qaita tūryp, ömır köşıne ılesulerı neǧaibyl.
Aty jaman ındet qazaq üşın kürdelı syn boldy, osyndaida halqymyzdyŋ auyzbırşılıgınıŋ nyǧaia tüsuı, bır-bırıne degen bauyrmaldyq sezımderınıŋ arta tüskenı quantady.
Şalǧai auyldardyŋ tūrmysy belgılı, eldı mekenderdıŋ jetpei jatqan «joǧy» köp. Äsırese atalmyş ındet kezınde auyldaǧy aǧaiyn därı-därmekke öte zäru bolyp qaldy. Osy qysyltaiaŋ şaqta astanalyqtar tuǧan auyldaǧy aǧaiyn-tumalaryna da qajettı därılerın, basqa da kerek-jaraqtaryn tauyp berıp, sälemdeme jıberıp jatyr. Halqymyzdyŋ «Yntymaǧy berık elge qaiǧy da jolamaidy» degen naqyly osyndaida aitylsa kerek. Osynau auyrtpalyq künderı ūltymyzdyŋ ūnjyrǧasy tüsıp ketpei, kerısınşe etek-jeŋın qamtap, bır-bırıne degen kömek-qolǧabysyn arttyruy öte quanyşty jait.
