Bügınde tüzeu mekemesınen şyqqandardyŋ bırazy köp ūzamai qaita qylmysqa ūrynyp, temır torǧa qamalyp jatady. Jyl basynan berı Astanada qaita qylmys jasau oqiǧasy boiynşa 23 faktı tırkelgen.
Osyndai oqiǧalardyŋ aldyn alu maqsatynda Astana qalasynda ışkı ıster organdarynda esepte tūrǧan tūrǧyndarmen arnaiy kezdesuler ötkızılıp tūrady. Kezdesuge jūmyspen qamtu jäne äleumettık ortaǧa beiımdeu ortalyǧynyŋ mamandary şaqyrtylyp, esepte tūrǧan azamattarǧa tüsındırme jūmystary jürgızıledı.
Keşe Almaty audandyq Işkı ıster basqarmasynda osyndai taǧy bır kezdesu bolyp öttı. Kezektı şaraǧa esepte tūrǧan, būryn sottalǧan nemese şartty türde merzımınen erte bosatylǧan 150-ge juyq azamat şaqyrtylypty. Kezdesude «Beiımdeu tehnologiialary men tūjyrymdamalary» qoǧamdyq qorynan kelgen ökılder äleumettık mäseleler boiynşa jäne qūqyqtyq keŋester berse, Astana qalasynyŋ Jūmyspen qamtu ortalyǧy mamandary eŋbek naryǧyndaǧy bos jūmys oryndarymen tanystyrdy.
– Bügınde Almaty audandyq Jergılıktı polisiia qyzmetınde 458 adam esepte tūr. Tüzeu mekemelerınen şyqqan azamattar bırden qoǧamǧa sıŋısıp kete almaidy. Sol sebeptı, biylǧy jyldan bastap mūndai azamattarmen profilaktikalyq sūhbattar, kezdesuler ötkızudı qolǧa alyp otyrmyz. Beiımdelu jolynda qoldan kelgenşe kömekter körsetıledı. Mäselen, ötken alty aidyŋ ışınde 139 esepte tūrǧan azamat alkogol jäne esırtkı täueldılıgınen aryltu kursynan ötkızıldı. Mūndai azamattardyŋ köbısı keleŋsız jaittarǧa jiı tap bolyp jatady. Ondai sätte kımge jügınuge bolatynyn bılmeidı ärı būryn ıstı bolǧandyqtan, olardy eşkım jūmysqa almaidy. Sosyn amalsyz ūsaq qylmysqa nemese qūqyq būzuşylyqqa baruyna tura keledı. Ötkızıp jatqan şaranyŋ basty maqsaty da osy – qoǧamdyq beiımdeluge kömektesu, – deidı Almaty audandyq IIB Jergılıktı polisiia qyzmetı basşysynyŋ orynbasary, polisiia podpolkovnigı Arman Aitybekov.
Bürkıt NŪRASYL
