5 tamyzda Rioda HHHI jazǧy Olimpiada oiyndary bastalady
Erteŋ Rio-de-Janeiroda HHHI jazǧy Olimpiada oiyndarynyŋ jalauy köterıledı. Törtkül dünie tört jyl boiy taǧatsyzdana kütken bairaqty jarysta 207 elden 10 myŋnan asa atlet synǧa tüsedı. Dübırlı dodada Qazaqstan namysyn 104 sportşy qorǧaityn bolady.
Rio-de-Janeiro alaŋdaryndaǧy jarystar 5-21 tamyz aralyǧynda ötedı.
ALTYN ÜŞIN AIQAS
Rio oiyndary – täuelsız Qazaqstannyŋ derbes memleket retınde qatysyp otyrǧan altynşy Olimpiadasy. Osyǧan deiıngı qatysqan barlyq oiyndardan qazaqstandyq sportşylar jüldesız qaitqan emes. Eŋ bastysy, är jarystan enşımızge altyn medal būiyrdy. Demek, Qazaqstan saiypqyrandary Braziliiaǧa da altyn üşın aiqasqa attanary aiqyn.
Braziliiaǧa Qazaqstan qūramasy aldyn ala josparlanǧan qūramda qatysa almai otyr. Onyŋ ärtürlı sebepterı de joq emes. Atap aitqanda, bırneşe sportşymyz jaraqat alularyna bailanysty dübırlı jarysqa qatysa almaityn boldy. Osy rette, eŋ ökınıştısı, ärine, tört bırdei Olimpiada oiyndary chempiondarynyŋ Rio-de-Janeiro oiyndarynan şettetılgenı boldy. Doping dauyna ılıkken İlia İlin, Maia Maneza, Zülfiia Chinşanlo jäne Svetlana Podobedova endı tek janküierler qatarynan körınedı. Rio-de-Janeiro oiyndaryna Qazaqstan komandalyq oiyn sporty türlerı boiynşa eşqandai jarysqa qatyspaidy. Olimpiadalyq ırıkteu turnirlerınde baq synaǧan futbol, voleibol, su doby, basketbol, regbi qūramalary nätijelı körsetkış körsete almady.
BASTY ÜMITIMIZ – BOKS QŪRAMASYNDA
Rio-de-Janeiroǧa attanǧan sportşylarymyzdyŋ qatarynda jeŋıl atletterımızdıŋ qatary köp. Jeŋıl atletikanyŋ bırneşe türınen synǧa tüsetın 26 sportşymyzǧa ümıt artamyz. Olardyŋ ışınde London oiyndarynyŋ chempiony Olga Rypakova bar. Üş qarǧyp sekıruden soŋǧy jarystarda täp-täuır nätije körsetıp jürgen jerlesımızge janküierler de senımmen qaraityny sözsız.
Basty ümıtımız boks qūramasynda ekenın jasyrmaimyz. Öitkenı, boksşylar ǧana är Olimpiada oiyndarynan bırneşe jüldemen oralyp jür. Braziliiaǧa Qazaqstan ūlttyq qūramasy bırınşı ret tolyq qūramda bara jatyr. Erler bäsekesınde 10 boksşymyz şarşy alaŋǧa şyqsa, äielder bäsekesınde ekı būrymdy qyzdarymyz baq synaityn bolyp otyr. Boksty aitqanda aldymen altyn medal jaiynda söz qozǧaitynymyz da anyq. Būl joly da, qūdaiǧa şükır, jeŋıs tūǧyrynyŋ eŋ biık satysyna köterıletın jıgıtterımız joq emes. Atap aitar bolsaq, älemdık reitingte köş bastap jürgen Bırjan Jaqyp (49 kelı), Daniiar Eleusınov (69 kelı), Ädılbek Niiazymbetov (81 kelı) jäne eŋ auyr salmaqta aiqasatyn İvan Dychko syndy jıgıtterımızdıŋ qaisysy bolsa da altyn jüldeger atanuǧa jarap tūr. Basqa salmaqtaǧy boksşylarymyzdyŋ da jüldege qol sozuǧa mümkındıgı bar. Tüptep aitqanda, Qazaqstan boksşylaryna artylatyn jauapkerşılık te, senım de salmaqty bolmaq.
Küreske kelsek, grek-rim baluany Nūrmahan Tınäliev pen Almat Kebısbaev, äielder küresınde beldesetın Giuzel Maniurova jüldegerler qatarynan körınıp qalady degen ümıttemız. Bır aitarlyǧy, bügınde Astanada tūratyn Giuzel Maniurova – osyǧan deiıngı ekı Olimpiada oiyndarynda kümıs medal alǧan myqty baluannyŋ bıregeiı. 2004 jyly Resei atynan, 2012 jyly Qazaqstan atynan jarysqa tüsken bolatyn. Mümkın üşınşı olimpınde altynǧa qoly jeter me eken?!
EL NAMYSYN QORǦAITYN ELORDALYQTAR
Braziliiaǧa attanǧan Qazaqstan qūramasy sapynda 18 astanalyq sportşy bar. Elorda sportşylary toǧyz sport türınen synǧa tüsetın bolady.
El namysyn qorǧaityn elordalyq sportşylardyŋ bairaqty bäsekege tyŋǧylyqty daiyndyq jürgızuıne Astana qalasynyŋ dene şynyqtyru jäne sport basqarmasy tarapynan jan-jaqty jaǧdai jasaldy. Bügınde barlyq sportşylar Rioǧa attanyp kettı.
Sonymen, Olimpiada jüldesı üşın saiysqa tüsetın astanalyqtarǧa sättılık tılei otyryp, olardyŋ esımderın qūrmetpen atap ötudı jön kördık. Rio-de-Janeiro şarşy alaŋynda boksşylar Daniiar Eleusınov pen Vasilii Levit, tennis kortynda Iаroslava Şvedova men Galina Voskoboeva, grek-rim küresı kılemınde Almat Kebısbaev pen Dosjan Qartikov, äielder küresınde Giuzel Maniurova men Jūldyz Eşimova, qazırgı bessaiysta Elena Potapenko men Pavel İliaşenko, baidarka jäne kanoe jarysynda İnna Klinova, Zoia Ananchenko jäne Oleg Tokarniskii, jüzude Ekaterina Rudenko, jeŋıl atletikada Florida Menianova, üstel tennisınde Kirill Gerasimenko el namysyn qorǧaityn bolady.
Ǧalym QOJABEKOV