1994 jylǧy 7 nauryzda Aqmola qalasynyŋ I şaqyrylymdaǧy mäslihat deputattarynyŋ sailauy öttı. Oǧan qalanyŋ 26 sailau okrugınen 83 ümıtker qatysty. Nätijesınde mäslihat qūramyna 6 ūlt ökılı, 20 er adam, 6 äiel sailandy. Deputat bolǧan 24 adamnyŋ joǧary bılımı bar, tek 2-uınıŋ ǧana orta arnaiy bılımı boldy. Alǧaşqy şaqyrylym deputattarynyŋ qatarynda 4 pedagog, 5 därıger, 6 käsıpker bolǧanyn bıreu bılse, bıreu bılmeidı. Mäslihat töraǧasy bolyp Aleksandr Mironov sailandy. Iýrii Uvarov tekseru komissiiasynyŋ töraǧasy boldy. Nikolai Meşeriakov, Vladimir Kaminskii, Balhiia Süleimenova, Anatolii Ostrovskii tūraqty komissiialardyŋ töraǧalary qyzmetın atqardy.
I şaqyrylym deputattarynyŋ aldynda astanalyqtarmen özara ıs-ärekettı jönge keltıru, qoldanystaǧy zaŋnama men elımızdıŋ Konstitusiiasyna säikes şeşıluı tiıs özektı mäselelerdı anyqtau mındetı tūrǧan edı. I şaqyrylymdaǧy qalalyq mäslihattyŋ 47 sessiiasy öttı, osy jiyndarda 260 mäsele talqylandy. Atap aitarlyǧy, alǧaşqy mäslihat qabyldaǧan normativtık aktıler jas elordamyzdyŋ damuyndaǧy tüitkıldı mäselelerdıŋ barynşa dūrys jäne qolaily şeşu joldaryn pysyqtap, ony äzırleuge mümkındık berdı.
I şaqyrylymdaǧy mäslihat Qazaqstan Respublikasy Prezidentınıŋ jäne Ükımetınıŋ qarauyna Qazaqstan Respublikasy elordasynyŋ atauyn özgertu turaly, sondai-aq bas qalada Almaty, Saryarqa audandaryn qūru turaly ūsynys engızdı. Qaladaǧy ekı audannyŋ şekarasy belgılendı. Sonymen qatar I şaqyrylymdaǧy mäslihattyŋ şeşımımen Qazaqstan Respublikasynyŋ Tūŋǧyş Prezidentıne «Astana qalasynyŋ qūrmettı azamaty» ataǧy berıldı.
25 deputat sailandy
1999 jyly 10 qazanda Astana qalasynyŋ II şaqyrylymdaǧy mäslihat deputattarynyŋ sailauy öttı. Būl jolǧy saiasi nauqanǧa 25 sailau okrugınen 147 ümıtker qatysty. Osy 147 adamnyŋ 37-sı saiasi partiialardyŋ, 8-ı qoǧamdyq bırlestıkterdıŋ ökılı boldy, 96 adam özın-özı ūsyndy. Saiyp kelgende, 147 ümıtkerdıŋ arasynan II şaqyrylymǧa 25 deputat sailandy. Olardyŋ qatarynda 7 äiel, 18 er adam boldy, deputattardyŋ bärınıŋ joǧary bılımı bar, al 10 deputat «Otan» respublikalyq saiasi partiiasynyŋ müşesı boldy. Mäslihat qūramyna 5 därıger, 3 pedagog, 12 kommersiialyq qūrylymdardyŋ jūmysşylary sailandy. Sonyŋ ışınde 5-euı ötken şaqyrylymnyŋ deputattary bolatyn. Būl şaqyrylymda mäslihat töraǧasy qyzmetın ekı adam – Aleksandr Demidov pen Vera Lukianes atqardy. Sailaubek Baibolov tekseru komissiiasynyŋ töraǧasy boldy. Al Nikolai Meşeriakov, Ämırjan Älpeiısov, Baqyt Syzdyqova, Bolat Quanyşev tūraqty komissiialardy basqardy.
II şaqyrylymdaǧy deputattardyŋ basty qyzmetı jas astananyŋ belsendı qūrylys kezeŋımen, elordada ekonomikalyq jäne äleumettık reformalardy jürgızumen erekşelendı. Sessiialarda deputattar astanany abattandyru, qajettı infraqūrylymdy daiyndau, tūrǧyn üi qūrylysy, joldardy jöndeu siiaqty mäselelerdı şeşumen ainalysty. Deputattar elorda tūrǧyndary üşın qolaily jaǧdai jasauǧa, astanalyqtardyŋ äl-auqatyn arttyruǧa baǧyttalǧan äleumettık jäne ekonomikalyq damu baǧdarlamalaryn bekıttı. Olardyŋ ışınde kölık infraqūrylymyn jetıldıru, eskı tūrǧyn üilerdı jedeldetıp būzu, şaǧyn käsıpkerlıktı damytu men qoldau, ipotekalyq nesieleudı jäne tūrǧyn üi qūrylysyn ılgerıletu, 2010 jylǧa deiıngı Astana qalasynyŋ ortalyqtandyrylǧan jylumen qamtamasyz etu jüiesın damytu jäne taǧy basqa özektı ūzaqmerzımdık baǧdarlamalar bolǧany mälım.
Astana qalasy mäslihatynyŋ 2001 jylǧy 23 mamyrdaǧy şeşımımen japon säuletşısı Kise Kurakavanyŋ basşylyǧymen japon halyqaralyq yntymaqtastyq jönındegı agenttıgınıŋ zertteuşıler toby jasaǧan Astana qalasyn damytudyŋ bas jospary maqūldanyp, Qazaqstan Respublikasynyŋ Ükımetıne bekıtuge ūsynyldy. Jalpy alǧanda, II şaqyrylymdaǧy qalalyq mäslihat 50 sessiia ötkızıp, sol jiyndarda astanalyqtar üşın asa maŋyzdy 256 mäselenı talqylady. Älbette, mūnyŋ bärı qazır tarih bolyp qaldy.
33 baǧdarlama bekıtıldı
2003 jylǧy 20 qyrküiek pen 12 qazanda Astana qalasynyŋ III şaqyrylymdaǧy mäslihat deputattarynyŋ sailauy öttı. Deputattyqqa 25 sailau okrugınen 177 ümıtker ūsynyldy. Sonyŋ ışınde 54-ı saiasi partiialardan, 6-uy qoǧamdyq bırlestıkterden, 117-sı özın-özı ūsynuşylardan boldy. III şaqyrylymda sailanǧan mäslihat deputattarynyŋ qatarynda 4 ūlt ökılı, 6 äiel, 19 er adam boldy. Osy joly mäslihat qūramynda 2 ǧylym doktory men 1 ǧylym kandidaty eŋbek ettı. 11 deputat memlekettık mekemelerdıŋ, ärtürlı käsıporyndar men ūiymdardyŋ qyzmetkerı bolatyn. Sonyŋ ışınde 11 adam – kommersiialyq qūrylymdardyŋ jūmysşysy, 12 adam – II şaqyrylymnyŋ deputaty. Būl şaqyrylymda mäslihat töraǧasy qyzmetın Vladimir Redkokaşin atqardy.
2004 jyly el Parlamentı «Jergılıktı memlekettık basqaru turaly» zaŋǧa tüzetuler engızıp, qabyldady. Būl tüzetuler mäslihattyŋ ökıletın odan ärı naqtylap berdı. Deputattyq korpustyŋ aldynda jergılıktı özın-özı basqaru salasyndaǧy kürdelı mäselelerdı şeşuge qosymşa mümkındıkter tetıgı aşyldy. Deputattar belsendı jūmys jürgızıluı tiıs baǧyttardy naqtylap, qarapaiym halyqtyŋ ötkır problemalaryn şeşudıŋ oŋ amal-ädısın tapty. Osydan keiın Astana tūrǧyndary halyq qalaulylarynyŋ kömegıne jügınuge belsendılık tanytty. Būl qala basşylyǧy jürgızıp otyrǧan saiasattyŋ dūrystyǧyn, tiımdılıgın aŋǧartty.
III şaqyrylymdaǧy qalalyq mäslihattyŋ 51 sessiiasy ötıp, 413 mäsele talqylandy. Sonyŋ ışınde bas qalany äleumettık-ekonomikalyq damytuǧa arnalǧan 33 öŋırlık baǧdarlama bekıtıldı. Olardyŋ qatarynda 2005-2007 jyldarǧa arnalǧan tūrǧyn üi qūrylysyn damytuǧa arnalǧan baǧdarlama, Astanada qoǧamdyq tärtıp pen qūqyqtyq mädeniettı qamtamasyz etu jönındegı baǧdarlama bar. Sondai-aq elordadaǧy mūqtaj azamattardyŋ jekelegen sanattaryna äleumettık kömek körsetu erejesı, abattandyru, sanitarlyq jabdyqtau, jinau jūmysyn ūiymdastyru jäne Astana aumaǧynda tazalyqty qamtamasyz etu qaǧidalary, jasyl köşetterdı kütıp ūstau men qorǧau qaǧidalary bekıtıldı. Astana qalasy äkımdıgı men mäslihatynyŋ 2008 jylǧy 7 jeltoqsandaǧy bırlesken şeşımımen 6 şılde Astana künı bolyp belgılengenın bılemız. Mäslihat tarihy – elordanyŋ jylnamasy.
