Nūr-Sūltan qalasy äkımınıŋ orynbasary Mälika Bektūrova Oŋtüstık Koreianyŋ KAIST universitetınıŋ professory Mun Ki Choi bastaǧan ökılderımen kezdestı. Ekı tarap özara ärıptestık ornatu jönındegı memorandumǧa qol qoidy.
Qazır būl oqu orny smart-jobalar, ǧylym, injeneriia, tehnologiia jäne IT salasynda älemge aty äigılı Garvard siiaqty universitettermen bır qatarda tūr jäne patent ielenu sany boiynşa älemde №1 bolyp tabylady.
KAIST Tedjon qalasynda ornalasqan. Onyŋ ırgetasy 1971 jyly kärıs memleketınıŋ bırınşı ūlttyq ǧylymi, zertteu jäne tehnikalyq instituty retınde qalanǧan bolatyn. Sodan berı memleket qarjylandyrady. 2019 jyly oqu orny älemdegı üzdık universitetter reitingınde 40-orynǧa tūraqtady.
Qazırgı kezde KAIST Oŋtüstık Koreianyŋ basty strategiialyq zertteu jobalarynyŋ ortalyǧy bolyp sanalady. Universitettıŋ 400-ge tarta oqytuşylary älemnıŋ bılım beru jäne önerkäsıptık ūiymdarymen tyǧyz qarym-qatynas ornatyp, zertteuler jürgızedı. KAIST aldyŋǧy qatarly europalyq jäne aziialyq universitettermen bırge köptegen halyqaralyq baǧdarlamalarǧa qatysady.
Universitet mamandary Qazaqstanǧa bızdegı smart-jobalardyŋ jaǧdaiymen, infraqūrylymnyŋ deŋgeiımen tanysuǧa keldı. Osy sapar barysynda körgen-tüigenderı arqyly KAIST pen elorda äkımdıgı qandai salalar boiynşa jūmys ıstei alatyndyǧyn anyqtauǧa niettı.
«KAIST – öŋırlık hab, olar bızge ärıptester torabyna enuge mümkındık beredı, sondai-aq özderınıŋ jobalarymen, saraptamalarymen, pıkırlerımen bölısuge daiyn. Bügın olar bızdıŋ jobalardy körıp, qyzyǧuşylyq tanytty, alda ärıptestık bailanystar ornaidy dep senemız. Sondai-aq, qazaqstandyq studentterdıŋ Oŋtüstık Koreiada tehnikalyq mamandyqtar boiynşa tegın oquyna ūsynys jasady. Oqu baǧdarlamasy 3 jylǧa josparlanǧan. Endı bızdıŋ şäkırtter kärıs studentterımen bırge oqyp, ǧylymi zertteuler jürgızuge qatysatyn bolady. Professorlarynan därıs alady» dedı Nūr-Sūltan qalasy İnnovasiiany damytu ortalyǧynyŋ bas menedjerı Daniiar Qūrmanbaev.
Däulet ASAUOV
