Prezident sailauy 2019
EŊBEK MİGRASİIаSYN RETTEUGE NAZAR AUDARDY
Qazaqstan käsıpodaqtar qauymdastyǧynyŋ atynan Qazaqstan Respublikasynyŋ Prezidenttıgıne ümıtker Amangeldı Taspihovtıŋ senımdı ökılderı Qostanai oblysynda halyqpen kezdestı.
Qostanai oblystyq käsıpodaqtar qauymdastyǧy filialynyŋ töraǧasy A.Düisekenov söilegen sözınde A.Taspihovtıŋ eŋbek jäne qoǧamdyq qyzmetı jönınde äŋgımelep berdı. Sonymen qatar, ümıtkerdıŋ sailau aldyndaǧy baǧdarlamasymen tanystyrdy. Būl baǧdarlamada jūmysşylardyŋ eŋbek qūqyqtaryn qorǧauǧa, eŋbek migrasiiasyn retteuge erekşe nazar audarylǧan.
BALALARDY ǦALAMTORDYŊ KERI ÄSERINEN QORǦAIYQ
Jaqynda QR Prezidenttıgıne ümıtker Jambyl Ahmetbekovtıŋ senımdı ökılderı J.Nūräliev pen «Halyq kommunisterı» fraksiiasynyŋ deputaty İ.Smirnova Tarazdaǧy oblystyq qazaq drama teatrynda belsendı jastarmen jäne Qazaqstan kommunistık jastar odaǧynyŋ müşelerımen kezdestı.
J.Nūräliev ümıtkerdıŋ sailaualdy baǧdarlamasyn tanystyru barysynda bügıngı jastardyŋ ūstanymdary men moraldyq tärbiesın tılge tiek ettı. Ol öz sözınde halyqşyl kommunisterdıŋ internasionalizmnıŋ, euraziiaşyldyq ideianyŋ jaqtauşysy ekenın atap öttı. Jiyn soŋynan ümıtkerdıŋ senımdı ökılderı jastardy sailauǧa qatysuǧa şaqyrdy.
SAILAUŞYLAR ÖZ PIKIRLERIN ORTAǦA SALDY
Juyrda Jambyl oblysynda QR Prezidenttıgıne ümıtker Ämırjan Qosanovty qoldauǧa baǧyttalǧan kezektı ügıt-nasihat ıs-şaralary öttı.
Oblystyq ştabta ümıtkerdıŋ senımdı ökılderı Taraz qalasynyŋ tūrǧyndarymen kezdestı. Basqosuǧa jiyrmaǧa juyq adam qatysty. Söz tızgının oblystyq sailaualdy ştabynyŋ basşysy Baqytjan Mahaşev ūstady. Kezdesu barysynda Ämırjan Qosanovtyŋ sailau aldyndaǧy baǧdarlamasynyŋ negızgı baǧyttary talqylandy. Sailauşylar öz pıkırlerın ortaǧa saldy.
KOLLEDJDEGI KEZDESU
«Aq jol» partiiasynyŋ atynan Prezidenttıkke ümıtker Daniia Espaeva sailaualdy ştabtyŋ jetekşısı Azat Peruaşevpen bırlesıp, elordadaǧy gumanitarlyq-zaŋ kolledjınıŋ oqytuşylary jäne studentterımen kezdestı.
Emen-jarqyn jüzdesude jastar öz ömırı turaly äŋgımelep, ärtürlı sūraqtar qoidy. Äsırese, Daniia Espaevanyŋ biznestı qoldau jönındegı bastamalary studentterdı de qyzyqtyrdy. Öitkenı olardyŋ köpşılıgı oqu ornyn tämamdap, ülken ömırge attanǧanda öz käsıbın aşpaqşy.
Kolledjde bolaşaq zaŋger, audarmaşy jäne pedagogtar bılım alady. Olardyŋ arasynda basqa qalalardan kelgender köp.
TOQAEVQA TAIQAZAN JOLDADY
Keşe Qazaqstan Prezidenttıgıne ümıtker Qasym-Jomart Toqaevtyŋ respublikalyq qoǧamdyq ştabynyŋ müşelerı Türkıstan oblysynda jūrtşylyqpen kezdestı.
Ştab müşelerı saparyn Türkıstan qalasynyŋ jaŋadan salynyp jatqan äkımşılık-ıskerlık ortalyǧynan bastady. Qūrylys nysanyna arnaiy kelgen olar qūrylysşylarmen kezdesıp, Q.Toqaevtyŋ cailaualdy baǧdarlamasynyŋ baǧyttaryn tüsındırdı. Is-şara barysynda türkıstandyq ziialy qauym ökılderı Q.Toqaevqa öŋır tūrǧyndarynyŋ atynan halyqtyŋ 7 amanaty jazylǧan arnaiy hat salynǧan taiqazan joldady.
«ŞARAPAT» ORTALYǦYNA BARDY
«Ūly dala qyrandary» respublikalyq qozǧalysynan Prezidenttıkke ümıtker retınde tırkelgen Sädıbek Tügel Nūr-Sūltan qalasy äkımdıgıne qarasty «Şarapat» äleumettık qyzmet körsetu ortalyǧynda bolyp, ardagerlermen sūhbattasty.
Būl ortalyq alǧaşynda 1989 jyly «Qarttar men mügedekterge arnalǧan medisinalyq-äleumettık mekeme» bolyp qūrylǧan. 2016 jyldan berı atauy «Şarapat» bolyp özgergen ortalyq bügınde 321 adamǧa qyzmet körsetıp keledı. Ortalyq direktory Rysty Baimaǧambetovanyŋ aituynşa, olardyŋ arasynda 2 soǧys ardagerı men olarǧa teŋestırılgen 8 adam jäne 25 tyl ardagerı bar. Qariialar öz kökeiındegı saualdaryn qoidy.
VELOMARAFONǦA QATYSTY
Prezidenttıkke «Auyl» partiiasynyŋ atynan ümıtker Töleutai Rahymbekov öz sailauşylarymen bırge Nūr-Sūltan qalasyndaǧy velomarafonǧa qatysty.
Botanikalyq baqtaǧy auqymdy şaraǧa 300 adam qatysty. Qatysuşylar 20 şaqyrym jol jürdı. Töleutai Rahymbekovtıŋ sailaualdy baǧdarlamasynda jastardy qoldauǧa, olardy ruhani jaǧynan jetıldıruge erekşe män berılgen. «Ärine, denı sau, ruhy azat jäne quatty ūltty tärbieleu üşın elımızde sportty damytuǧa köŋıl bölgenımız abzal» deidı ümıtker.