Astanada Prezident Qasym-Jomart Toqaevtyŋ töraǧalyǧymen TMD-ǧa müşe memleketter basşylary keŋesınıŋ şaǧyn qūramdaǧy otyrysy öttı. Qasym-Jomart Toqaev TMD-ǧa müşe memleketter basşylary keŋesınıŋ otyrysyna qatysu üşın kelgen delegasiia jetekşılerıne rizaşylyǧyn bıldırdı.
– Eŋ aldymen, Qazaqstannyŋ TMD ūiymyna töraǧalyǧy aiasyndaǧy bastamalaryna qoldau bıldırıp, osy künderı Astanada ötıp jatqan halyqaralyq ıs-şaralarǧa belsendı qatysqandaryŋyz üşın alǧys aitamyn. Bügıngı otyrysqa Keŋes müşesı retınde Türıkmenstan Prezidentı, qūrmettı Serdar Gurbangulyūly Berdımūhamedov alǧaş ret qatysyp otyr. Osy jerdegı ärıptesterdıŋ jäne özımnıŋ atymnan Sızge qoş keldıŋız dei otyryp, jauapty memlekettık qyzmetıŋızge tabys tıleimın. Täuelsız Memleketter Dostastyǧyna qatysuşy memleket basşylary keŋesınıŋ kezektı otyrysyn aşyq dep jariialaimyn. Bügın memleket basşylary keŋesınıŋ qarauyna gumanitarlyq serıktestıkke, qauıpsızdıkke jäne yntymaqtastyǧymyzdyŋ basqa da aspektılerıne qatysty maŋyzdy mäseleler ūsynylyp otyr, – dedı Memleket basşysy.
Prezident Dostastyqqa müşe elderdıŋ basşylaryn Qazaqstan byltyr serıktestermen jäne TMD Atqaruşy komitetımen bırge atqarǧan köpjosparly jūmystyŋ negızgı qorytyndylary turaly habardar ettı. Memleket basşysynyŋ aituynşa, Qazaqstan öz töraǧalyǧynyŋ basymdyqtaryna säikes, qazırgı älemdık damu prosesterın eskere otyryp, müşe memleketterdıŋ küş-jıgerın köptegen baǧyttar boiynşa bırıktıruge ūmtyldy.
– Bırlesken jūmystyŋ nätijesınde sauda-ekonomikalyq yntymaqtastyqty keŋeituge, tyǧyz mädeni-gumanitarlyq bailanystarymyzdy saqtauǧa, sondai-aq Dostastyqtyŋ äleuetı men halyqaralyq bedelın arttyruǧa baǧyttalǧan bırqatar maŋyzdy bastamalar ıske asyryldy. Kürdelı ekonomikalyq jaǧdaida Dostastyqtyŋ ekonomikalyq äleuetın nyǧaituǧa jäne TMD-nyŋ 2030 jylǧa deiıngı Ekonomikalyq damu strategiiasynyŋ erejelerın oryndauǧa erekşe nazar audaryldy. Is-şaralar josparynyŋ bırınşı kezeŋın tabysty jüzege asyru ıskerlık belsendılıktı arttyruǧa, özara sauda kölemın ūlǧaituǧa, ekonomikany pandemiiadan keiın qalpyna keltıru ısın jedeldetuge mümkındık berdı. Jahandyq jäne öŋırlık ekonomikanyŋ tūraqsyzdyǧy jaǧdaiynda bız tyǧyz sauda-ekonomikalyq bailanystardy saqtau üşın qolda bar barlyq äleuettı jūmyldyruymyz qajet, – dedı Qasym-Jomart Toqaev.
Prezidenttıŋ pıkırınşe, klimat mäselesı özektı bolyp otyr. Memleket basşysy klimattyŋ özgeruı TMD-nyŋ barlyq derlık elderınde su resurstarymen qamtamasyz etu problemasyn şielenıstıre tüsetının atap öttı.
Otyrys barysynda sondai-aq Äzerbaijan Prezidentı İlham Äliev, Armeniia Premer-ministrı Nikol Paşinian, Belarus Prezidentı Aleksandr Lukaşenko, Qyrǧyzstan Prezidentı Sadyr Japarov, Resei Prezidentı Vladimir Putin, Täjıkstan Prezidentı Emomoli Rahmon, Türıkmenstan Prezidentı Serdar Berdımūhamedov jäne Özbekstan Prezidentı Şavkat Mirziioev söz söiledı.
***
Qazaqstan Prezidentınıŋ töraǧalyǧymen TMD-ǧa müşe memleketter basşylary keŋesınıŋ keŋeitılgen qūramdaǧy otyrysy öttı. Memleket basşysy būl ıs-şara TMD elderınıŋ COVID-19 pandemiiasynan keiıngı alǧaşqy tolyqqandy sammitı ekenın atap öttı.
– Şaǧyn qūramda bız yntymaqtastyǧymyzdy odan ärı nyǧaitudyŋ özektı mäselelerı jönınde jan-jaqty pıkır almastyq, Täuelsız memleketter dostastyǧyn damytudyŋ negızgı basymdyqtaryn aiqyndadyq. Būl COVID-19-dan keiıngı TMD-nyŋ oflain formattaǧy alǧaşqy tolyqqandy sammitı ekenın atap ötkım keledı. Jalpy, astanamyzda qaita bas qosuymyz quanyşty jait, – dedı Qasym-Jomart Toqaev.
Memleket basşylary bırden resmi qūjattarǧa qol qoiu räsımıne köşuge kelıstı.
– Qajettı qūjattarǧa qol qoiylyp jatqanda bız TMD Atqaruşy hatşysy lauazymyn TMD Bas hatşysy lauazymyna özgertu turaly mäselenı şaǧyn formatta talqylaǧanymyzdy jariialaǧym keledı. Atalǧan mäselege qatysty men osyndai ūsynys jasadym. Sebebı keşe bız AÖSŞK Atqaruşy hatşysy lauazymyn Bas hatşy lauazymyna özgertu turaly şeşım qabyldadyq. Būǧan deiın ŞYŪ-nyŋ Atqaruşy hatşysy da Bas hatşy lauazymyna özgertıldı. Negızınde, būl atqaruşy organ lauazymynyŋ märtebesın arttyru üşın maŋyzdy, – dedı Prezident.
Prezident sözın qorytyndylai kele, ötkızılgen sammittıŋ nätijelı bolǧanyn aitty.Sonymen qatar jiynda TMD Bas hatşysy Sergei Lebedev, Resei Federaldyq Jinalysy Federasiia Keŋesınıŋ töraiymy Valentina Matvienko söz söiledı. TMD memleket basşylary keŋesınıŋ töraǧasy, Qazaqstan Prezidentı Qasym-Jomart Toqaev Täuelsız Memleketter Dostastyǧynyŋ gramotasyn memleketaralyq «Mir» teleradiokompaniiasynyŋ töraǧasy Radik Batyrşinge tabys ettı.
Kezdesu soŋynda TMD-ǧa müşe memleket basşylary Mädeniet salasyndaǧy yntymaqtastyqty damytu turaly mälımdemege qol qoidy. Sondai-aq Dostastyqty odan ärı damytuǧa baǧyttalǧan bırqatar qūjat qabyldandy.
