Halyqtyŋ jyl saiyn ösuı jäne joldardaǧy trafiktıŋ ūlǧaiuy eskerıle otyryp, elordada keşendı kölık shemasynyŋ tūjyrymdamasy bekıtıldı. Atalǧan qūjat qaladaǧy kölıktıŋ 10 jäne odan da köp jylǧa arnalǧan bırtūtas tehnikalyq paiymyn äzırleuge mümkındık beredı. Būl turaly keşe qalalyq mäslihat otyrysynda «City Transportation Systems» JŞS basqarma töraǧasy Bekmyrza İgenberdinov aitty.
KKS arqyly sonymen qatar jaŋa köpırler, jol aiyryqtary sanyn arttyru, köşelerdı keŋeitu, qoǧamdyq kölıktı bırşama jaŋǧyrtu jūmystary qarastyrylady.
«Qalanyŋ bas josparynda kölık damuy bölımı bar, bıraq uaqyt talaby men urbanizasiiany, jaŋa syn-tegeurınderdı eskersek (kölık-auysyp otyru toraptary, būrylu alaŋdary, jaiau jürgınşıler, baǧdarşamdar jäne t. b.), keşendı kölık shemasynyŋ damuyn jeke bölıp qarastyru qajet. Älemdık täjıribede qalalyq jäne kölıktık josparlau – qala qūrylysynyŋ özara bailanysty jäne özara täueldı elementterı» dedı B.İgenberdinov.
Kölık kompaniiasynyŋ basşysy qalada kölıkterdı basqaratyn ūiymdar arasyndaǧy üilestıru jūmystaryn küşeitu qajettıgın de atap öttı.
«Būdan basqa negızgı köşeler men özen arqyly qosylatyn joldar sanyn arttyru qajet. Tūrǧyn üi kvartaldarynyŋ qūrylysyn kölıkke qoljetımdılıktı eskere otyryp josparlau kerek. Joǧaryda aitylǧandardy eskere kele, qalalyq kölıktı basqaru salasyndaǧy strategiialyq qūjat – keşendı kölık shemasyn jasau eŋ dūrys şeşım bolady» dep atap öttı ol.
Keşendı kölık shemasy elordada qalalyq kölıktı ūiymdastyru men basqaruǧa qatysty qoldanystaǧy qūqyqtyq jüienıŋ olqylyqtaryn anyqtap, jer paidalanu men qalalyq kölıktı josparlaudy, osy salaǧa tartylǧan organdardyŋ funksiialary men ökılettıkterın bırıktıredı. Qūjatta sonymen qatar qoǧamdyq kölık, jol-kölık infraqūrylymy, jol qozǧalysyn ūiymdastyru, kölık aǧyndaryn basqaru, tūraq keŋıstıgı jäne t. b. salalardaǧy problemalardy şeşu joldary ūsynylady.
Keşendı kölık shemasynyŋ tūjyrymdamasyn qalalyq mäslihat bekıttı. Ükımet jäne QR İndustriia jäne infraqūrylymdy damytu ministrlıgımen bırlesıp qarjylandyru közderı kelısıledı, būdan ärı keşendı kölık shemasyn ıske asyru qolǧa alynady. Shemany äzırleumen qatar Nūr-Sūltan qalasynyŋ aumaǧyn 2025 jylǧa deiın damytu baǧdarlamasyndaǧy nysanaly körsetkışterdı qarastyru qajet.
