Elımızdıŋ densaulyq saqtau jüiesındegı jaqsy özgerısterdıŋ bırı – «Kezeksız emhana jobasy». Būl Astanada, sonyŋ ışınde qalalyq №5 emhanada sättı jüzege asyrylyp jatyr.
Qazırgı uaqytta Astana qalasynda halyq sanynyŋ ösuıne bailanysty qala emhanalary bırneşe ese artyq jüktememen jūmys ıstep otyr. Ärine, qalada aşylǧan jaŋa emhanalar jüktemenı edäuır azaitty. Degenmen de, kezektı azaitu üşın qosymşa jobalar kerek ekenı tüsınıktı.
Elordanyŋ №5 emhanasy osydan ekı jyl būryn «Kezeksız emhana» jobasyn qolǧa alyp, ony sättı jüzege asyryp keledı. Qazırgı taŋda därıgerge kıru üşın sarylyp ūzaq tūratyn adamdardyŋ qatary siregenın baiqauǧa bolady. Atalmyş emhananyŋ otbasylyq densaulyq saqtau bölımınıŋ meŋgeruşısı Ūltuǧan Abdrahmanovanyŋ aituynşa, jobanyŋ arqasynda kez-kelgen adam call – ortalyq arqyly telefonmen habarlasyp nemese onlain türde tırkelıp, därıgerdıŋ qarauyna jazyla alady. Ol üşın ūzaq-sonar kezekke tūrudyŋ qajetı joq. Adam jazylǧan uaqytynda keledı de, därıgerge kıre beredı. Elektrondy jüiege auysudyŋ basty artyqşylyǧy emhanadaǧy kezektıŋ sireu jäne syrqattanuşylar uaqytynyŋ ünemdeluınde eken.
Osy emhananyŋ kömegıne qalalyqtar ǧana emes, Aqmola oblysynyŋ Talapker, Qajymūqan auyldarynyŋ tūrǧyndary da jügınedı. Būndai jaǧdaida emdeluşı ötınış bıldırıp, emhanaǧa aldyn-ala tırkeluı qajet. Sodan keiın emdeluşı men emhana arasynda zaŋdy türde kelısım-şart jasalady.
Aldyn-ala jazyludyŋ taǧy bır artyqşylyǧy – därıger aldyna kelgen emdeluşı jaiynda ǧalamtordaǧy arnaiy jüie arqyly tolyq aqparat ala alady. Iаǧni, emdeluşınıŋ jeke densaulyq paraǧynyŋ elektrondy nūsqasy emdeluşıler bazasynda saqtalady. Keluşı därıgerge qaralǧan saiyn syrqat tarihy medisinalyq aqparat bazasyna mındettı türde engızılıp otyrady. Al nauqastyŋ kartochkasy emdeluşınıŋ özınde bolady. Bügınde №5 qalalyq emhanasynyŋ elektrondy jüiesınde 67 myŋnan asa adam tırkelıptı. Mūndai jüie därıgerdıŋ jūmysyndaǧy qaǧazbastylyqty da edäuır azaitqan körınedı.
Jūrtşylyqqa elektrondy nūsqada qyzmet körsetuge köşe bastaǧan №5 qalalyq emhananyŋ materialdyq-tehnikalyq bazasy da tolyqqandy. Barlyq därıger bölmelerı kompiutermen jabdyqtalǧan. Keleşekte emdeluşılerge elektrondy jüiede qyzmet körsetu aiasy keŋeie tüsedı deidı mamandar.
Bota JÄKEN ,
L.Gumilev atyndaǧy Euraziia ūlttyq universitetınıŋ studentı
