2021 jyldyŋ basynda Astana qalasy mäslihatynyŋ şeşımımen Almaty audanyna qarasty A36 köşesıne qoǧam jäne memleket qairatkerı, ırı tūlǧa, zaŋger ǧalym, Qazaqstan Respublikasy Ūlttyq ǧylym akademiiasynyŋ akademigı, Qazaqstanǧa eŋbegı sıŋgen ǧylym qairatkerı Salyq Zimanovtyŋ esımı berıldı.
Myna düniede biık parasatymen, asyl qasietımen adamdyqtyŋ ziialy ülgısın körsetken qazaq zaŋ ǧylymynyŋ abyzyna ainalǧan alyp tūlǧany bır kezderı Qanyş Sätpaev «Salyq Zimanov – Qazaqstanda zaŋ ǧylymdarynyŋ negızın qalauşy» dep baǧalaǧan edı. Jaratuşy özı bergen toqsan jylǧa sozylǧan maǧynaly ǧūmyrynyŋ jetı jylyn qandy şaiqasta ötkerıp, odan keiıngı ızdenıspen ötken jyldary Qazaqstan men Ortalyq Aziianyŋ basqa da aimaqtarynda ūlttyq memleketterdıŋ qalyptasuy men damuyna, Qazaqstan Respublikasynyŋ memlekettık täuelsızdıgıne, t. b. özektı mäselelerge arnalǧan zertteulerın jazyp qaldyrdy.
Bılıktı zaŋger maman retınde egemendık, täuelsızdık jolyndaǧy Qazaqstannyŋ halyqaralyq qatynasyn zaŋdastyryp, qazaq tılıne memlekettık märtebe beru, prezidenttık basqaru institutyn engızu, qūqyqtyq-demokratiialyq reformalardy jürgızu ısıne belsene aralasty. Qazaqstan memleketı men qūqyǧynyŋ tarihyn, ūlttyq memleket qūrylymynyŋ teoriialyq mäselelerın zertteude jaŋa ǧylymi baǧyt qalyptastyryp, ädıl sotty qamtamasyz etu üşın respublikada sot müşelerınıŋ qatysuymen «biler alqasyn» engızuge basşylyq jasady.
Qazaqstan Respublikasy qūrylǧannan keiın S.Zimanovtyŋ ǧylymi jäne qoǧamdyq-saiasi qyzmetınıŋ jaŋa, jemıstı kezeŋı bastaldy. Qazaqstannyŋ Joǧarǧy Keŋesı köptegen jaŋa zaŋdy qabyldauǧa tiıs boldy. Osy jauapty tarihi kezeŋde Salyq Zimanov bılımdılık, qairatkerlık qyrymen tanyldy. Qazaq memlekettıgı men qazaq halqynyŋ tarihynda şeşuşı röl atqarǧan «Qazaq KSR-nıŋ memlekettık egemendıgı turaly deklarasiianyŋ» (25.10.1990) jobasyn daiyndau jönındegı komissiiany basqardy. El tarihyndaǧy ekınşı bır asa maŋyzdy saiasi aktınıŋ – «Qazaqstan Respublikasynyŋ memlekettık täuelsızdıgı turaly» konstitusiialyq zaŋnyŋ (16.12.1991) jobasyn daiyndau jönındegı komissiianyŋ jetekşı müşelerınıŋ bırı boldy. Ol Joǧarǧy Keŋestegı Qazaqstan Respublikasy jaŋa Konstitusiiasynyŋ jobasyn äzırleu jönındegı konstitusiialyq komissiianyŋ müşesı boldy, mūnda ol sarapşylar tobyn basqardy.
S.Zimanov 10 tomdyq «Qazaqtyŋ ata zaŋdary» ensiklopediiasyna ǧylymi jetekşılık jasady. Elge qyzmetı üşın Qazaqstan Respublikasy Prezidentınıŋ «Beibıtşılık pen ruhani kelısım» (1993), «Qazaqstan» memlekettık syilyqtarynyŋ (2002) laureaty atandy. «Parasat» ordenımen (2002), ekı ret «Otan soǧysy», «Qyzyl Jūldyz» ordenderımen jäne medaldarmen marapattalǧan.
