«Qazaqstan» ūlttyq arnasynan 12 qyrküiekten bastap är düisenbı-beisenbı aralyǧynda «Aiman-Şolpan» telehikaiasy körsetılude. 100 bölımnen tūratyn film dünie esıgın aşqan sätten ömır joldary ekı airylǧan, äleumettık jaǧdaiy ekı türlı otbasynda tärbie alǧan egız qyzdar Aiman men Şolpan taǧdyry turaly baiandaidy.
Oqiǧa jelısıne bas keiıpkerlerdıŋ qoǧamda alatyn orny, ömırge degen ärtürlı, tıptı qarama-qaişy közqarasy men oi-tüisıgı arqau bolǧan. Söitıp, ekı otbasyndaǧy türlı uaqiǧalar şielenısı elımızdegı otbasy institutyn jäne otbasy qūndylyqtaryn nyǧaituǧa jetelep, qoǧamnyŋ türlı äleumettık toby arasynda özara syilastyq pen özara tüsınuşılık ideiasyn nasihattaidy.
«Keiıpkerlerdıŋ aty nege Aiman men Şolpan? Būl – kımnıŋ bolsyn esınde saqtalatyn esımder. Al qazaq halqyna tıpten jaqyn. Ärbır qazaqtıldı körermen, qazaqtyŋ tabiǧatyn tüsınetın adam üşın būl esımder öte tanys. Sondyqtan film taqyryby beker taŋdalmady» deidı «Qazaqstan» RTRK» AQ basqarma töraiymy Nūrjan Mūhamedjanova.
Telehikaiada basty rölde Aiman men Şolpan beinelerınde aktrisa Saltanat Baqaeva körınedı. «Film tüsırılımınıŋ aldynda bızdı ekı ülken mäsele oilandyrdy. Bas keiıpkerlerdıŋ rölıne egız qyzdardy alaiyq pa, älde qos rölge bır aktrisany taŋdaiyq pa dep bas qatyrdyq. Tıptı daulasuǧa deiın bardyq. Aitylǧan pıkırlerdı eskerıp, egız qyzdardyŋ arasynda 80 jūpqa röl oinatyp kördık. Alaida eşqaisysy köŋılımızden şyqpady. Sodan keiın aktrisalardyŋ arasynda kasting jariialadyq. Solardyŋ ışınde Saltanattyŋ oiyny talǧamymyzǧa sai keldı. Bır-bırıne kereǧar rölderdı ol tamaşa alyp şyqty. Tüsıru jūmystaryn qysqa merzımde – tört ai ışınde aiaqtadyq. Bıraq būl jait sapaǧa äser etpedı dep oilaimyn» deidı filmnıŋ prodiuserı Rustam Azamatov.
Saltanat Baqaevanyŋ özı de tüsırılımnen alǧan äserımen bölıstı. «Būl men üşın ülken joba boldy. Osyndai filmde basty röldı somdau bırınşı ret enşıme tidı. Telehikaia arqyly özımdı ekı qyrynan da tanytuǧa mümkındık aldym. Film bügıngı kündegı özektı mäselelerdı tereŋnen qozǧaidy. Qazır qoǧamda säbilerdı perzenthanadan şyǧarmai auystyryp jıberu nemese satu jaǧdailary jiı oryn alatyn bolypty. Telehikaia sol aşy şyndyqty äşkereleidı» deidı aktrisa.
Nūrjan Mūhamedjanovanyŋ aituynşa, jaŋa televiziialyq mausymda telearna körermenderıne otandyq 8 jaŋa telehikaia, jalpy alǧanda, 200 bölımnen tūratyn kontent ūsynylady. Olardyŋ arasynda Qazaqstan Respublikasy Täuelsızdıgınıŋ 25 jyldyǧyna arnalatyn «Şekara şebınde» filmı, «Iŋkär jürek» telehikaiasynyŋ jalǧasy, «Süie bılseŋ» atty jastarǧa arnalǧan serial, Almatynyŋ simvolyna ainalǧan aport almasyn nasihattaityn «Qyzyl alma» telehikaiasy, t.b. jobalar bar.
Amanǧali QALJANOV
