Jaqynda redaksiiaǧa balasy qaladaǧy Jambyl Jabaev atyndaǧy №4 mektep-gimnaziiasynda oqityn bır aǧamyz qoŋyrau şaldy. Ol kısınıŋ aituynşa…jä, sol kısınıŋ sözın däl keltıreiık. «Inım, osy mektepke kün saiyn balamdy sabaqqa alyp baramyn. Qaibır jyly däl bılım ordasynyŋ ırgesınen qūrylys jūmystary bastalyp, keiın ol aiaqsyz qaldy. Sonyŋ «eskertkışı» bolyp, soraiǧan kran tūr. Jeldı künderı osy krannyŋ jük kötergış qūraldary şaiqalyp, mektep ǧimaratyna qūlap ketetındei körınedı. Sondyqtan osy krandy alyp tastaudyŋ bır amaly bar ma?» dep ötınışın aitty.
Sodan būl jaǧdaidy öz közımızben köru üşın atalǧan bılım ūiasyna ädeiılep bardyq. Būl oqu ordasy qaladaǧy barlyq bılım oşaqtarynyŋ qara şaŋyraǧy dese de bolady. Jüz on jyldan astam tarihy bar. Bır baiqaǧanymyz, mekteptıŋ territoriiasy öte tar. Maŋaiynda bos jatqan jer joq.
Aitqandai, qoŋyrau şalǧan aǧamyzdyŋ şyryldap aitqan janaiqaiy oryndy eken. Mektep ǧimaratyna tönıp, qisaiyp tūrǧan krandy körıp, özımızde şoşyp qaldyq. Osy mäselenıŋ jai-japsaryn bılu üşın bılım ūiasyna kırgende aldymyzdan mektep direktorynyŋ şaruaşylyq jönındegı orynbasary Zäure Äbdırahmanova jolyqty. Būl kısı de atalǧan jaǧdaimen jaqsy tanys. «Bız būl problemany köterdık. Baiqoŋyr audanynyŋ äkımdıgı bıledı. Olar bır ai būryn bızge «şeşımın tabamyz» dep jauap bergen. Endı sony kütıp otyrmyz» dedı ol.
Qazır būl qūrylys nysany tolyǧymen bıtpegen. Jūmysy toqtap tūr. Qojaiyndary da belgısız. Sondyqtan bızge olarmen tıldesudıŋ retı kelmedı. Jalpy, būl problemany şeşu üşın mekteptıŋ ata-analar qamqorşylar keŋesınıŋ töraiymy Svetlana Smaiylova jan salyp jügırıp jür eken. Baiqoŋyr audany äkımınıŋ qabyldauynda bolypty.
«Audan basşysy Erlan Kanalimov sözımdı jerge tastamai krandy özı kelıp kördı. Barlyq jaǧdaimen tanysty. Būl mäselemen ainalysuǧa orynbasaryna tapsyrma berdı. Būryn kran maşinasynyŋ jük kötergış qūraldary būdan da biık bolatyn. Qaita, olardy jinap, şamaly tüsırdı. Endı krandy mülde alyp tastasa dep otyrmyn. Būl problemany şeşu – jalǧyz Baiqoŋyr audanynyŋ äkımdıgıne bailanysty emes. Būǧan qalalyq qūrylys salasyna jauap beretın mekemelerdıŋ de qatysy bar. Qojaiyndarynyŋ tabylmai otyrǧandyǧy da ony bögep otyr. Degenmen, aiaqsyz qalady dep oilamaimyn. Biyl bızdıŋ ūsynysymyz boiynşa Baiqoŋyr audanynyŋ äkımdıgı mektep ǧimaratyn tolyq qorşap berdı. Olarǧa sol qamqorlyǧy üşın raqmet aitamyz! Endı osy krannan qūtylsaq jaqsy bolar edı. Äitpese, köŋılımız tynşymai tūr» dedı qamqorşylar keŋesınıŋ töraiymy.
Qalai bolǧanda da, ata-analar öz balalarynyŋ qauıpsızdıgı üşın «krannan qaşan qūtylamyz?» dep beker dabyl qaǧyp otyrǧan joq. Bügınde būl mektepte 2000-nan asa bala oqidy. Al adam ömırı – bärınen qymbat! «Saqtansaŋ –saqtaimyn» degen bar. Endeşe, būl mäsele köpke sozylmai tezırek şeşılgenı jön.
