Elordalyq mädeniet salasynyŋ ökılderı E.Rahmadiev atyndaǧy memlekettık akademiialyq filarmoniiasynda Parlament Mäjılısınıŋ deputaty Amanjol Ältaimen kezdestı.
«Mädeniet salasyndaǧy özektı mäseleler» taqyrybynda döŋgelek üstel türınde ötken kezdesuge Nūr-Sūltan qalasyndaǧy E.Rahmadiev atyndaǧy memlekettık akademiialyq filarmoniiasy, «Atameken» Qazaqstan kartasy» etno-memorialdyq keşenı, M.Gorkii atyndaǧy memlekettık akademiialyq orys drama teatry, qalalyq ortalyqtandyrylǧan kıtaphanalar jüiesı, «Astanalyq sirk», t. b. memlekettık mädeniet ūiymdarynyŋ jetekşılerı men ökılderı qatysty. Mädeniet salasynyŋ maitalmandary özderın tolǧandyrǧan özekjardy, ötkır mäseleler jaily söz tiegın aǧytty.
Qyzmetkerlerdı tolǧandyratyn basty mäsele – jalaqynyŋ basqa tartsa aiaqqa jetpeitındei azdyǧy ekenıne airyqşa toqtalǧan sala mamandary osydan tuyndaityn bırqatar mäselenı sausaqpen sanap körsettı: jas, qajettı mamandardy jūmysqa tartu qiynǧa soqsa, daiarlanǧan, tısqaqty mamandar basqa salaǧa auysyp, jaiy kelse, şetel asyp ketıp jatyr. Sūranys azaiǧandyqtan, JOO-da mamandyq baǧyty qysqarǧan, rejisserler men kompozitorlardyŋ da qatary siregen.
Döŋgelek üstelge jinalǧandar bazalyq-lauazymdyq jalaqynyŋ mardymsyzdyǧy, mamandardyŋ tūraqtamauy, jas mamandarǧa arnalǧan jataqhanalardyŋ jetımsızdıgı, daiyndyq bazasynyŋ tapşylyǧy, mädeniet salasynyŋ erekşelıgın eskermeuden memlekettık satyp alu jüiesınde tuyndaǧan kemşılıkter, kıtap qory men kıtaphanaşy müddesın qorǧaityn zaŋnyŋ bolmauy, mädeniet mekemelerın basqaru jüiesın jetıldıru men jaŋartudyŋ zärulıgı, arena ärtısterınıŋ zeinetke şyǧu jasyn tömendetudıŋ qajettıgı, t. b. mäseleler boiynşa Mäjılıs deputatynyŋ aldynda aǧynan jarylyp, mädeniet jäne öner qyzmetkerlerınıŋ mūŋ-mūqtajyn jetesıne jetkıze aitty.
Özı de önerdıŋ qainaǧan ortasynan şyqqan aitysker aqyn, Mäjılıs deputaty Amanjol Ältai döŋgelek üstelde ortaǧa tüsken ūsynystar men köterılgen mäselelerdı Ükımettıŋ qūlaǧyna jetkızuge uäde berdı. Mädeniet pen öner salasynyŋ ökılderı köpten berı aitylyp jürgen mäselenıŋ «baiaǧy jartas – sol jartas» küiınde qalmai, naqty şeşu tetıkterı erterek äzırlense eken degen tılekpen tarasty.
Erlan MAZAN
