«Astana» konsert zalynda körnektı kompozitor, Qazaqstannyŋ halyq ärtısı, Memlekettık syilyqtyŋ laureaty Myŋjasar Maŋǧytaevtyŋ şyǧarmaşylyǧyna arnalǧan «Qazaqstanym menıŋ» keşı öttı. Nūr-Sūltan qalasy memlekettık akademiialyq filarmoniiasy Qazaq orkestrınıŋ XXII konserttık mausymynyŋ jabyluy aiasynda ötken konsertte kompozitordyŋ tuyndylary şyrqaldy.
Myŋjasar Maŋǧytaev «Otyrar» operasyn, «Qozy men Baian» baletın, simfoniialyq jäne horǧa arnalǧan poemalardy, oratoriialardy, bırneşe küidı, körkem jäne derektı filmderge, spektaklderge arnalǧan muzyka jazdy. Al onyŋ än-romanstary üş jüzden asyp jyǧylady.
Osy keşte kompozitordyŋ kürdelı tuyndylary oryndalmasa da, änderı men küilerı şaryqtady. Ol Nūrsūltan Älımqūlov pen Nūtfolla Şäkenov, Saǧi Jienbaev, Tūmanbai Moldaǧaliev, Mūzafar Älımbaev, Qabdykärım Ydyrysov, İsrail Saparbai syndy aqyndarmen şyǧarmaşylyq bailanysta boldy.
Al alǧaşqy änderınıŋ bırı – «Saǧynyş». Aitjan Baiǧojaev sözın jazǧan būl ännıŋ alǧaşqy oryndauşysy, kompozitormen jetı jyl konservatoriiada bırge oqyǧan kümıs kömei, jez taŋdai änşı, Qazaqstannyŋ halyq ärtısı Nūrǧali Nüsıpjanov. Nūrǧali aǧa būl keşke arnaiy qatysyp, osy tuyndymen qatar kompozitor özıne amanattap ketken «Maitöbe – taudyŋ töresı» (sözın jazǧan Näzıken Alpamysqyzy) änın tamyljyta şyrqady.
Sonymen bırge konsertte Qazaqstannyŋ eŋbek sıŋırgen ärtısı Baǧdat Sämedinova, Qazaqstannyŋ eŋbek sıŋırgen qairatkerlerı Gülzira Bökeihan, Bibıgül Janūzaq, Qaiyrjan Berdıbai, Mädeniet salasynyŋ üzdıkterı Arailym Rahym, Künsūlu Tūrlybekova, Nūrai Tanabaev, Mädeniet qairatkerı Estai Mūqaşev, respublikalyq jäne halyqaralyq baiqaulardyŋ laureattary Aizada Kaponova, Altynbek Äbılda, Şahrizada Tynyştyq öner körsettı.
Keş soŋynda Myŋjasar Maŋǧytaevtyŋ jary Svetlana Ramazanqyzy konserttı ūiymdastyruşylarǧa, barlyq önerpazdarǧa, körermenderge alǧysyn aitty.
