Meiırım şuaǧyna şomyldy

Qazaqstan» ortalyq konsert zalynda «Alǧys aitu» künıne orai «Myŋ alǧys» atty qaiyrymdylyq konsertı öttı. Keştı «Qazaq radiolary» JŞS ūiymdastyrdy.

Meiırım şuaǧyna şo­­mylǧan keş öte äser­lı boldy. Ömırde adamǧa qaiyrymdy boludan, qamqorlyq jasaudan artyq ızgılıktı ıs joq. Oǧan taǧy bır közımız jettı. Şara barysynda türlı taǧdyrlardy bastan keşken keiıpkerlerdıŋ armandary jüzege asty. Mäselen, on tört jyl suqaraŋǧy qalyp, anasynyŋ jüzın bır körsem dep armandaǧan Dürdananyŋ emıne Qazaq radiosynyŋ efirınen şyǧatyn «Jan jyluy» baǧdarlamasy arqyly ekı million teŋge qarjy jinalǧan. Sonyŋ kışkentai arudyŋ emıne şipasy tiıp, Dürdana dertınen aiyqty. Onyŋ sol künı änşı Gülnūr Orazymbetovamen bırge än salsam degen oiy da oryndaldy. Kökşetaudaǧy Qoşqarbai auylynda tūratyn bır otbasy balalar üiınen 11 jetkınşektı asyrap alǧan. Osyndai sauapty dü­nie­ge qadam basqan ata-anany sahnaǧa şyǧaryp, qoşemet körsettı. Odan keiın «Barmysyŋ, bauyrym!» baǧdarlamasy arqyly sūrau salyp, otyz jyldan berı kezdespegen äskerdegı dostar sahnada qauyşty. Äsırese, jiyrma ekı jyl boiy bırın-bırı körmegen ana men balanyŋ kezdesuı jinalǧandardy erekşe tolqytty. Zalda közıne jas almaǧan adam qalmady.

Jalpy, keştıŋ maqsaty tu­ǧannan qos janary suqaraŋǧy bır jasar Armannyŋ şeteldegı emıne üş million teŋgedei qarjy jinap beru bolatyn. Byltyr qyrküiek aiynda «Jan jyluy» baǧdarlamasyna Armannyŋ anasy Meruert Aidarälieva habarlasyp, kömek sūraǧan eken. Endı, mıne, osy maqsat oryndaldy. Baldyr­ǧannyŋ dertıne jūmsalatyn qarjy jinaldy. Şaraǧa qazaqtyŋ jüregı keŋ jomart aza­mattary da qatysyp, olar qaiy­rymdylyq şarasyna öz ülesterın qosty.

Keş barysynda Qaraqat Äbıldina, Jūbanyş Jeksenūly, Elena Äbdıhalyqova, Marjan Arapbaeva, Tamara Asar, Qūrmaş Mahan, Roza Älqoja, Medet pen Klara Salyqovtar, Sündet Baiǧojin sekıldı öner jūldyz­dary än şyrqap, jinalǧandardyŋ köŋılderın köterdı.

Azamat ESENJOL