Meiırımdı därıger
Bükıl sanaly ǧūmyryn jüregı qalaǧan mamandyqqa arnap, boiyndaǧy jıgerı men qairatyn, bılımı men bılıktılıgın bır salaǧa jūmsaityn adamdar bolady. Mūndai adamdarǧa halyqtyŋ da qūrmetı erekşe. Sondai qadırlı azamattyŋ bırı joǧary sanatty därıger Taŋsyqbai Küsemısov edı.Soŋǧy bes jylda Nūr-Sūltan qalasy äkımdıgınıŋ «Qarttarǧa, mügedekterge jäne mügedek balalarǧa arnalǧan oŋaltu ortalyǧy» mekemesınıŋ bas därıgerı bolǧan Taŋsyqbai Seitaiūly bükıl sanaly ömırın, atap aitqanda 47 jyl boiy densaulyq saqtau salasynda eleulı eŋbek ettı. Aq halatty abzal azamattyŋ öz mamandyǧyn jan-tänımen süietınıne bırge jūmys ıstegen kezımızde san märte köz jetkızgen edık.
Bas därıger mındetın atqara jürıp, terapevt retınde ärbır nauqastyŋ jaǧdaiyn bıluge meiılınşe köŋıl bölıp, olarǧa syrqattan emdeludıŋ joldaryn tüsındırıp, aityp otyratyn. Solai bola tūra qaramaǧyndaǧy medisina qyzmetkerlerıne talapşyl edı. Sol talapşyldyǧynan jas mamandar köp närse üirenıp, jauapkerşılıkpen jūmys ısteuge ūmtylatyn.
Bükıl ömırın densaulyq saqtau salasyna arnaǧan Taŋsyqbai Seitaiūly 1949 jyldyŋ 2 şıldesınde Soltüstık Qazaqstan oblysy, Sergeev audany, Baluan auylynda düniege keldı. 1966 jyly Petropavl qalasyndaǧy qazaq mektep-internatyn bıtırıp, sol jyly Almaty memlekettık medisinalyq institutyna oquǧa tüsedı. 1972 jyly «Emdeu ısı» mamandyǧy boiynşa diplom alyp, eŋbek jolyn tuǧan jerınde, atap aitqanda oblystyq auruhanada anesteziolog-reanimatolog därıger bolyp bastaidy. Keiınnen jedel järdem därıgerı, qalalyq №1 qalalyq bırıktırılgen auruhanasynyŋ emdeu bölımı boiynşa bas därıgerdıŋ orynbasary, bas därıger qyzmetın atqarady. 2002 jyly osy auruhana «Densaulyq jyly» aiasynda ötkızılgen respublikalyq baiqauda jüldelı üşınşı orynǧa ie boldy. 2003 jyldan berı bılıktı därıger ärı ūiymdastyruşy bolǧan T.Küsemısov Petropavl qalasy boiynşa Densaulyq saqtau departamentınıŋ basşysy qyzmetın atqardy. Keiınnen «Oblystyq tuberkulezge qarsy dispanser» memlekettık mekemesınde, Aqqaiyŋ audandyq auruhanasynyŋ bas därıgerı boldy.
Taŋsyqbai Seitaiūly densaulyq saqtau jäne salauatty ömır saltyn nasihattau salasyndaǧy erekşe jetıstıkterı üşın QR «Densaulyq saqtau ısınıŋ üzdıgı», «Käsıpodaqtarǧa sıŋırgen eŋbegı üşın» tös belgılerımen, «Qazaqstan Respublikasyna 10 jyl» medalımen marapattalǧan.
Täjıribelı därıger-ūiymdastyruşy 2015 jyldan bastap osy uaqytqa deiın Nūr-Sūltan qalasy äkımdıgınıŋ «Qarttarǧa, mügedekterge jäne mügedek balalarǧa arnalǧan oŋaltu ortalyǧynyŋ» bas därıgerı bolyp jūmys ıstedı. Osynda kelıp emdeletın nauqastardyŋ rizaşylyǧyna bölenıp, därıger degen qasiettı mamandyqtyŋ abyroiyna laiyq eŋbek ete bıldı. Köpşılıkten bas därıgerımız jaily jyly pıkırler estuşı edık.
«Bızdıŋ şipajaidyŋ bas därıgerı Taŋsyqbai Küsemısov öte jaqsy azamat edı. Ortalyqqa kelgen ärbır adamnyŋ densaulyǧynda syr bar ekenın jete ūǧynyp, qajettılıkpen aldyna barǧanda, asyqpai tyŋdap, keŋesın berıp, jıgerlendırıp jıberetın. Äsırese, Auǧan soǧysynda bolǧan jıgıtterge «Sender soǧysty körgensıŋder, senderge erekşe kütım kerek dep kötermelep jüretın. Osyndai meiırımdı, bılımdı, bılıktı därıgerdıŋ qaitys bolǧanyn estıgende köŋılımız tüsıp kettı» deidı jauynger-internasionalist Ǧalym Qojabekov.
Densaulyq saqtau salasyna erekşe eŋbek sıŋırgen, därıger degen abyroily ataǧyna sai ömır sürgen Taŋsyqbai Küsemısov esımı, arjarqyn didary onymen bırge jūmys ıstegen ärıptesterınıŋ esınde mäŋgılık saqtala bermek. Ömırın adamdardyŋ densaulyǧyn saqtauǧa arnaǧan aq halatty abzal azamattyŋ otbasy men ūrpaǧyna amandyq tıleimız.
Arystan DJANǦAZİEV,
Nūr-Sūltan qalasy äkımdıgınıŋ «Qarttarǧa,
mügedekterge jäne mügedek balalarǧa
arnalǧan oŋaltu ortalyǧy» memlekettık
mekemesınıŋ direktory