«Halyq sanynyŋ ösuıne bailanysty Astana qalasynyŋ mektepterınde jyl saiyn oquşylar sany ortaşa alǧanda 15-18 myŋ adamǧa köbeiıp keledı. Sol sebepten bırınşı kezekte infraqūrylym mäselesı şeşılude. Öitkenı oquşylar sanynyŋ ösuımen qatar, quattyq jobasynan artyq oqytyp jatqan mektepterdıŋ sany artty» dep mälımdedı keşe Senattaǧy ükımet saǧatynda Astana qalasy Bılım beru basqarmasynyŋ basşysy Änuar Janǧozin. Ol elordada biyl 4 bılım beru nysany paidalanuǧa berılgenın, jyl soŋyna deiın 1200 oryndyq taǧy bır mektep tapsyrylatynyn habarlady.
17 myŋ oquşyǧa oryn tapşy
Qūzyrly basqarma jetekşısı 2018-2019 oqu jyldarynda elordanyŋ 5 mektebı üş auysymdyq jūmys tärtıbıne köşırılgenın jetkızdı. Būdan bölek, taǧy 20 mektepte adam sanynyŋ tyǧyzdyǧy baiqalady. Jalpy, oquşy oryndarynyŋ tapşylyǧy 17 myŋdy qūraidy eken. Būl mäselenı şeşu üşın 2023 jylǧa deiın 120 myŋ oryn daiyndau qajet. Änuar Janǧozinnıŋ aituynşa, maŋyzdy mäsele, eŋ aldymen, jaŋa nysandardy salu men ıske qosu arqyly şeşıledı. «Biyl 4 nysan paidalanuǧa berıldı, jyl soŋyna deiın 1200 oryndyq taǧy bır mektep salynady. Odan bölek, 7 mektep pen 6 japsarlas ǧimarattyŋ qūrylysy jürıp jatyr. Olar 2019 jyly ıske qosylady» dedı ol.
Elordada jekemenşık mektepterdıŋ sany artuda. Resmi mälımet boiynşa 15 sondai mekteptıŋ 8-ıne 3 myŋ orynǧa memlekettık tapsyrys berılgen. Būl mektepterde bır oquşyǧa jylyna 160-tan 250 myŋ teŋgege deiın şyǧyn jūmsalady. Änuar Janǧozin aldaǧy uaqytta olardyŋ (Alpamys, Aqbūlaq-1, «Aqbūlaq damytu ortalyǧy, Ekonomikalyq lisei, Nūrorda, Ortalyq ekonomikalyq mektep, Elordalyq, Spektrum mektebı, Heiliberi) sany köbeietının jetkızdı. «Būl mehanizm bızge jekemenşık mektep salatyn jeke investorlardy köbırek tartuǧa mümkındık beredı. Aldaǧy 3 jylda bız BAE jäne Singapur investorlarynyŋ esebınen 6-7 myŋ oryndy jekemenşık mektepterdı aşudy josparlap otyrmyz» dedı basqarma basşysy.
2023 jylǧa deiın 5 myŋ mūǧalım qajet
Bas qaladaǧy maŋyzdy mäselenıŋ bırı – maman tapşylyǧy. 20 jyldyŋ ışınde elordadaǧy mūǧalımderdıŋ sany 3 myŋnan 16 myŋǧa deiın ösıptı. Alaida balabaqşalar men mektepterde bastauyş synyp mūǧalımderı jetıspeidı. Bügıngı taŋda mūǧalım tapşylyǧy 100-ge juyq adamdy qūraidy. 1500 mūǧalımnıŋ zeinetkerlıkke şyǧuyn jäne jaŋa bılım beru mekemelerındegı bos oryndardy esepke alǧanda, 2023 jylǧa deiın Astanaǧa 5 myŋǧa juyq mūǧalım qajet eken. Būl mälımet te Ükımet saǧatynda aityldy.
Biylǧy oqu jylynda alǧaş ret qala äkımınıŋ bastamasymen joǧary oqu oryndaryna 323 mūǧalım daiarlauǧa grant bölıngen. Sonyŋ ışınde 146-sy – mektepke deiıngı bılım beru mūǧalımderı, 116-sy – bastauyş synyp mūǧalımderı, 61-ı – arnaiy bılım beru ūiymdarynyŋ mūǧalımderı (defektolog, logoped jäne t.b.). Jyl saiyn äkımdık kolledjderdıŋ tülekterın jūmysqa şaqyrady. «Pedagogtardyŋ bılıktılıgın arttyru maqsatynda biyl bılım berudı jetıldıru ortalyǧyn aştyq. Bügıngı taŋda 155 mektep basşylary men orynbasarlary inkliuzivtık, menedjment boiynşa bılım beru kurstaryn oqyp jür. 1500-den asa balabaqşa tärbieşılerı jaŋa baǧdarlama boiynşa kursty tämamdady» dedı Ä.Janǧozin.
Ol bılım beru mekemelerınde balalardyŋ köşbasşylyq qabıletın şyŋdauǧa erekşe köŋıl bölınetının mälım ettı. Būl baǧytta «Jas ūlan» balalar-jasöspırımder ūiymynyŋ rölı erekşe. «Elorda mektepterınıŋ bärınde ūlanbasylar taǧaiyndalǧan. Būǧan qosa, bız Ortalyq sailau komissiiasymen bırlesıp, bılım beru ūiymdaryn basqaratyn köşbasşylar degen jeke organdy sailadyq. Qandai da bır jaŋa bastamany ıske asyratyn kezde bızde jūmys ısteitın oquşylar toby bar» dep tüsındırdı Änuar Qanatūly.
Onyŋ aituynşa, qalada qosymşa bılım beru nysandarynyŋ da sany artuda. «Qazır qalada 36 myŋ oquşyny qamtityn 11 nysan bar. Bıraq būl jetkılıksız. Bızdıŋ maqsatymyz – är balany özı oqityn mektebınde qosymşa bılım berumen qamtamasyz etu» dedı basqarma basşysy.
