Syilyqqa, jöndeu jūmystaryna, interaktivtı taqtaǧa, synyp qoryna dep sūralatyn mekteptegı aqşa jinau mäselesı talai ata-ananyŋ jüikesın jūqartyp keledı. «Mekteptegı jemqorlyq qaidan şyǧady?» degen saualǧa jauap ızdegen «Astana – adaldyq alaŋy» jobasynyŋ mamandary arnaiy zertteu jürgızıp, nätijesın jariialady.
Ata-analar komitetın taratu kerek
Elordada qolǧa alynǧan jemqorlyqqa qarsy strategiialar basqa aimaqtarǧa ülgı bolatyny anyq. «Astana – adaldyq alaŋy» jobasynyŋ közdegen maqsaty da sol – tūrmystyq jemqorlyqty joiyp, azamattarǧa barynşa qolaily jaǧdailar jasau. Osy rette bılım beru jüiesındegı jemqorlyqty anyqtau maqsatynda qalalyq Bılım basqarmasynyŋ jäne oǧan baǧynatyn ūiymdardyŋ soŋǧy tört aidaǧy qyzmetıne taldau jürgızıldı. «Taldau jürgızuge sybailas jemqorlyq amaldarynyŋ, «jasyryn» memlekettık qyzmetterdıŋ, normativtık qūqyqtyq aktılerdegı jäne äkımşılık kedergılerdegı qaişylyqtardyŋ boluy sebep boldy» deidı QR Memlekettık qyzmet ısterı jäne sybailas jemqorlyqqa qarsy ıs-qimyl agenttıgınıŋ Astana qalasy boiynşa departament basşysy Jazira Jylqyşieva.
Joba aiasynda qoǧamdyq ūiymdarmen bırlesıp oquşylardyŋ ata-analary arasynda äleumettık saualnama jürgızılgen. Nätijesınde bılım beru mekemelerınde mekteptıŋ nemese synyptyŋ qosymşa qajettılıkterı üşın jiı aqşa jinalatyndyǧy anyqtalǧan. Negızınen, aqşa jinau ata-
analar komitetı arqyly jüzege asyrylady. Bır sözben aitqanda, qyzmetı reglamenttelmegen ata-analar komitetı tūrmystyq jemqorlyqtyŋ tuyndauyna basty sebep bolyp otyr. Sol üşın joba keŋsesı Bılım jäne ǧylym ministrlıgıne ata-analar komitetınıŋ qyzmetıne tyiym salu jönınde ūsynys engızıp otyr. Ūsynystyŋ qanşalyqty qoldau tabatyny aldaǧy uaqytta belgılı bolmaq.
Direktorlar jauapqa tartyldy
Jalpy bılım beru mekemelerındegı kez kelgen tärtıp normativtık qūqyqtyq aktılermen retteletını belgılı. Qabyldau, auysu, granttar bölu, jataqhanadaǧy oryndardy anyqtau jäne taǧy basqa prosester tiıstı normativtık qūqyqtyq aktılerde anyq körsetılgen.
«Sifrlandyru äkımşılık kedergılerdı joiuǧa yqpal etedı. Degenmen bügıngı taŋda bızde barlyq räsımder sifrlanbaǧan. Nätijesınde lauazymdy tūlǧalar öz ökılettılıkterın asyra paidalanyp jatady. Şamadan tys qūjattar men reglamenttelmegen aqparat talap etıledı. Oqu jylynyŋ qarsaŋynda bız Halyqqa qyzmet körsetu ortalyǧy ūsynatyn qyzmetterge taldau jürgızdık. Mektepterdıŋ qajetsız qūjattardy talap etuı saldarynan atalmyş ortalyqta kezekte tūrǧan ata-analardyŋ sany jetıp artyldy. Būl jönınde tiıstı aqparat Bılım basqarmasyna jıberıldı. 5 mektep direktoryna qatysty tärtıptık şaralar qabyldanyp, 10 direktorǧa qataŋ eskertu jasaldy» deidı Jazira Jylqyşieva. Onyŋ aituynşa, jataqhanalarǧa zaŋsyz ornalastyru, qarjylyq kömek körsetu, balabaqşalarda aqyly oryn auystyru turaly derekter de anyqtalǧan. Osylaişa bılım beru mekemelerınde keibır zaŋdylyqtar saqtalmai otyrǧany qynjyltady.
Biudjet qarajaty aşyq bola ma?
«Barlyq bılım beru mekemelerı jaŋa oqu jylyna saqadai sai, qarjy bölındı. Eşqandai mektepte aqşa jinalmasyn!». Būl – jaŋa oqu jyly bastalar tūsta Bılım jäne ǧylym ministrlıgı taratatyn jattandy aqparat. Degenmen artynşa kıtap, däpterge deiın satyp aluǧa mäjbür bolǧan şarasyz ata-analardy köremız. Eger memleket bılım beru mekemelerı üşın jetkılıktı qarjylandyrudy qamtamasyz etse, ata-analardan qosymşa qarjy jinauyna ne sebep? Biudjetten bölınetın qarjynyŋ jūmsaluyn kım baqylaidy?
Jazira Jylqyşievanyŋ aituynşa, qarajat barlyq qajettılıkterge bölınedı. «Aqparatqa qol jetkızu turaly» zaŋda bılım beru mekemelerınıŋ biudjet qarajatyn internet-resurstarda jäne basqa da qoljetımdı saittarda jariialau qajettılıgı jönınde mındettemelerı bar. Är adam qarjynyŋ qaida jūmsalatyny turaly bıluı qajet. Degenmen bızdıŋ elde atalmyş talaptardyŋ oryndaluy saqtalmai otyr. Sondyqtan «Astana – adaldyq keŋsesı» bılım beru mekemelerınıŋ internet-resurstaryn säikestendıru boiynşa bırqatar ūsynystar beruge daiyn.
P.S: Tamyz aiynyŋ soŋynda Bılım basqarmasynyŋ vedomstvolyq baǧynysty ūiymdarynyŋ basşylary jeke jauapkerşılık pilottyq qūjatyna qol qoidy. Endı aqşa jinau, zaŋdy būzu, qyzmettıŋ aşyqtyǧyn saqtamau derekterı anyqtalǧan jaǧdaida, direktorlarǧa qatysty tiıstı şaralar qabyldanatyn boldy. Al oquşylar men ata-analardyŋ qūqyqtary būzylǧan jaǧdaida 55-68-73, 55-68-83, 8 775 160 32 senım telefondaryna habarlasqan jön.
