Qazaqstannyŋ eŋbek sıŋırgen qairatkerı, Tatarstannyŋ halyq suretşısı, Qazaqstan Körkemöner akademiiasynyŋ akademigı, Fransiia Körkemöner akademiiasynyŋ laureaty, Qytaidyŋ Han-Şan men Şan-Tao universitetterınıŋ qūrmettı professory Kamil Mullaşevtı öz basymyz «Süiınbike-hanbike» kartinasy arqyly tanydyq.
Ärıptesımız Näzira Baiyrbektıŋ «Süisıntıp ötken Süiınbike» maqalasy gazetımızde jaryq körıp, sol materialdyŋ ärlenuıne qoldanylǧan suretke nazar audarǧanbyz. Söitsek, onyŋ avtory Kamil aǧamyz eken. Beineleu önerınıŋ keskındeme, grafika, dizain, müsın janrlarynda jäne säulet önerınde de qoltaŋbasyn qalyptastyrǧan qylqalam şeberınıŋ önerge salǧan oljasy az emes bolyp şyqty.
Suretşı otyz jasynda orda būzdy dep aitsaq, qatelese qoimaspyz. 1974 jyldan berı respublikalyq, bükılodaqtyq, halyqaralyq deŋgeide ūiymdastyrylatyn körmelerge qatysyp keledı. Kamil Mullaşevtıŋ kartinalaryn da osy künderı Qazaqstannan bölek, Lihtenştein, Fransiia, Angliia, Amerika, Kanada, Resei, Türkiia, Qytai, Japoniia elderındegı jidalardan tabuǧa bolady.
1984 jyly Parijdıŋ ataqty Grand-Pale zalynda keŋes önerınıŋ 100 şyǧarmasyna arnalǧan körmede «Aq dala üstınde», «Jastyq», «Bidai tasqyny» atty qazaqstandyq suretşınıŋ bır ansambl qūryp tūrǧan üş suretı talǧamşyl fransuzdardy taŋǧaldyryp, Fransiia suretşıler akademiiasynyŋ kümıs medalın jeŋıp aldy.
Kamil Mullaşevtıŋ mänerın mūnaraly Mäskeu de tanidy. Suretşınıŋ özı Resei astanasyndaǧy V. Surikov atyndaǧy körkemsuret institutynyŋ tülegı ekenın aita keteiık. Sol özı oqyǧan Mäskeudegı jer jüzıne äigılı Tretiakov galereiasyna onyŋ student künınde salǧan «Taŋ» suretı jäne bertınırekte qaǧaz betıne tüsken «Jer jäne uaqyt. Qazaqstan» triptihı qoiylǧan.
Jalpy, Kamil Mullaşev bırın-bırı tolyqtyryp tūrǧan üş suretten ǧajap ansambl qūrudyŋ şyn şeberı. Joǧarydaǧy «Aq dala üstınde», «Jastyq», «Bidai tasqyny» men «Jer jäne uaqyt. Qazaqstan» suretterı triptih bolyp sanalady. Suretşı byltyr Qazaq handyǧynyŋ 550 jyldyǧyna arnap tamaşa tartu jasady. Onyŋ sol kezde salǧan «Ūly köş», «Er Abylai», «Elbasy» atty kartinalar siklınıŋ biylǧy Qazaqstan Respublikasy Täuelsızdıgınıŋ 25 jyldyǧy kezındegı män-maŋyzy odan saiyn artyp otyr.
«Ūly köşte» Kerei men Jänıbek handar bastaǧan keruennıŋ körınısın qapysyz köz aldyna äkeletın kartina kelesıde qazaqtyŋ däuırlegen şaǧymen jalǧasady. Qazaq tarihynda alar orny orasan Abylai han men Qazaqstannyŋ Tūŋǧyş Prezidentı Nūrsūltan Nazarbaevtyŋ beinelerı de memleketımızdıŋ osy künderge deiın ötken jolyn aişyqtap tūr.
Kamil Mullaşevtıŋ «Qypşaq qyzy», «Şopan», «Daladaǧy jelde», «Meiırım şuaǧy», «Halyq änderı», «Adam jady» kartinalary, «Aqyn Sara» portretı qazaq tūrmysy men tüsınıgıne jaqyndyǧymen qūndy.
Qoryta aitqanda, qytai elınde tuyp, qazaq jerınde ösıp-jetılgen suretşınıŋ memleketımızdıŋ mädenietıne sıŋırgen eŋbegı mol. Biyl «Ūly köş», «Er Abylai», «Elbasy» atty triptihı Qazaqstan Respublikasynyŋ Memlekettık syilyǧyna ūsynylyp otyr eken. Suretşınıŋ eŋbegın komissiia müşelerı ädıl baǧalaidy dep oilaimyz.
Amanǧali QALJANOV
