Jaqynda auyldan Jyqaŋ kökem kelgen. Būl kısı elden alysqa ūzap şyqpaǧan adam. Ömırınde Arqalyqqa bır-ekı ret qana joly tüsken bolar. Odan basqa şaharǧa at ızın salyp körmegen. Bıraq tırşılıkten tergenı köp. Är närseden oi tüiıp jüredı. Osy joly aikörkem Astanany köreiın dep taban tıreptı. Jaŋa vokzaldan kütıp aldym. Alyp ǧimaratty körıp, taŋdaiyn qaqty. Kölıkke otyrǧannan «al, bala, basta» dep erıktı özıme berdı. Şaharǧa alǧaş kelgen qonaǧymdy alyp, ülken köşeler boiymen jüitki jöneldım. Äuelı, sol jaǧalaudy araladyq. Bas qalanyŋ simvoly sanalǧan «Bäiterektı» körsettım. «Mäŋgılık el» qaqpasyna bardyq. Endı şetınen kertıp köşelerdı tanystyryp kelemın. «Mynau, Älihan Bökeihanovtyŋ, anau Ahmet Baitūrsynovtyŋ köşesı. Ana büiırde Dınmūhamed Qonaev atyndaǧy köşe qalyp barady» dep qoiamyn kökeme. Ol bolsa «oi, arystar-ai» dep riza bolyp, marqaiyp otyr. Bır kezde kökem «Mūstafa Şoqaidyŋ köşesı qaida?» dep qoiyp qaldy. Tılımdı tıstep, ne aitarymdy bılmedım.
Şyndyǧynda, ūltymyzdyŋ ūly tūlǧalarynyŋ bırı, körnektı qoǧam qairatkerı, alaş qozǧalysy kösemderınıŋ bıregeiı, Türkıstan avtonomiiasynyŋ jetekşısı, ömırınıŋ soŋyna deiın azamattyq ūstanymynan taimaǧan qairatkerge egemen eldıŋ ordasynan būiyrǧan köşe qaida edı?! Bılmeseŋız, aitaiyq. Ol – bügıngı qalanyŋ şetındegı būryn «Promyşlennyi» kentı bolǧan, qazır tūrǧyn alap atanǧan audandaǧy ūzyndyǧy 1108,8 metrge sozylǧan köşe. Būnyŋ eskı atauy «Perspektivnyi» bolǧan eken. Qalai tauyp qoiylǧan deseŋızşı?! Jer betınde qazaq degen halyq bar da Mūstafanyŋ aty ölmeitını mälım ǧoi.
Bır jyldary Älihan Bökeihanov pen Ahmet Baitūrsynovqa elordadan eleusız köşe berıldı. Sol kezde ziialylar dabyl qaǧyp, alaştyŋ ardaqty ekı azamatyna sol jaǧalaudaǧy körnekı köşelerdı beru kerek degen mäsele köterdı. Aqyry, būl ıs sätımen jüzege asty. Al Şoqai esımı sol qalpynda qalyp qoidy. Üş Alaş ardaqtysynyŋ köşelerı qatar jatsa aiyp pa? Osyny qalalyq onomostika komissiiasynyŋ müşelerı eskergenı jön edı. Qysqasy, bükıl türkı jūrty töbesıne kötergen Mūstafa atamyz öz elınde ūmyt bolatyn tūlǧa ma?!
