Elordada alǧaşqy aşylǧan № 1 qazaq balalar muzyka mektebıne şirek ǧasyr toldy.
El täuelsızdıgınıŋ mereitoiymen qatar kelgen öner ordasynyŋ jetken jetıstıgı men tolaiym tabystary turaly tün asyryp söileuge bolady.
Ötken ǧasyrdyŋ seksenınşı jyldardyŋ aiaǧyna taman toqyraudyŋ samaly oŋynan soqty. Ūzaq jyldar boiy sıresıp qalǧan keŋestık saiasattyŋ köbesı sögıldı. Täuelsızdıktıŋ aq taŋy atuǧa jaqyn qalǧan şaq. Däl osyndai almaǧaiyp kezeŋde, dälırek aitqanda, 1991 jyly 9 qyrküiekte qalada alǧaşqy qazaq muzyka mektebı aşyldy. Būl şahardyŋ qazaqy tūrǧyndary üşın de köpten kütken quanyşty jaŋalyq edı. Ärine, onyŋ aşyluy da oŋai bolǧan joq. Oǧan sol kezdegı QR Bılım ministrınıŋ orynbasary bolǧan Şämşä Berkımbaeva, Aqmola qalalyq atqaru komitetınıŋ töraǧasy Amanjol Bölekpaev jäne Jambyl Jabaev atyndaǧy №4 mektep-gimnaziiasynyŋ direktory Janna Baiseiıtova sekıldı ūltjandy janaşyrlar qoldau körsettı. Körnektı kompozitor Kenjebek Kümısbekov aǧamyz da tuǧan elınde muzykalyq mektep aşylsa dep armandapty.
Al, bärınen būryn osy jūmystyŋ basy-qasynda jürıp, ystyq-suyǧyn qatar körgen, muzyka mektebınıŋ alǧaşqy direktory bolǧan, belgılı muzykant, segız qyrly, bır syrly azamat Ospan Süleimenovtıŋ eŋbegın erekşe atap ötken jön. Öitkenı, osyndai igılıktı ıs asyl azamattyŋ jeke ideiasynan bastau alyp, aqyry ūlttyq mūratqa ainaldy.
Alǧaşynda mektepke 50-ge juyq bala qabyldanady. Olar halyq aspaptary men fortepiano bölımınde oqidy. Bastapqyda qiynşylyqtar da az kezdespedı. Muzykalyq aspaptar jetıspedı. Materialdyq baza da tolyq emes. Sonda da öner ūjymy alǧan maqsatynan taiǧan joq. 1992 jyly muzyka mektebıne Säuleş Tölegenqyzy basşylyqqa keledı. Jūmys odan ärı jandana tüsedı. Önerlı ūstazdardyŋ qatary tolyǧady. Jas jetkınşekterdıŋ muzykalyq jäne estetikalyq damuy qalyptasa bastaidy. Mazmūndy keşter ūiymdastyrylady. Sol kezde qyzmet atqarǧan O.Süleimenov, E.Omarova, B.Omarov, M.Näbiev, Q.İmanov, T.Kamiev jäne A.Ämırjanova sekıldı muzykant pedagogtardyŋ eŋbegı eş ūmytylmaidy. Olar joqtan bar jasap, balalardyŋ önerın örge süiredı.
Baiyrǧy qalanyŋ elordaǧa ainaluy öner ūjymyna tyŋ serpın äkeldı. 2000 jyly Astana qalasy äkımdıgınıŋ qoldauymen mektepke jeke ǧimarat berıldı. Ol tolyqtai kürdelı jöndeuden öttı. Uaqyt talabyna sai jaŋa ülgıdegı tehnikalarmen jabdyqtaldy. Oquşylar sany da köbeiıp, türlı aspap synyptary aşyldy. 2008 jyly Astana qalasy äkımınıŋ qaulysymen «№4 qazaq muzyka mektebı» «№1 balalar muzyka mektebı» bolyp özgertıldı. Öner ūjymynda elge tanylǧan talantty tūlǧalar qyzmet atqarady. Aitalyq, QR Mädeniet qairatkerı, bırneşe kıtaptyŋ avtory, belgılı önerpaz Şolpan Qorǧanbekova sabaq beredı. Taiauda ǧana direktordyŋ oqu ısı jönındegı orynbasary Ürläi Myrzaqūlova «Üzdık maman» baiqauynyŋ jeŋımpazy retınde Saryarqa audany äkımınıŋ grantyn jeŋıp aldy. Bır top mūǧalım «Şäkırt jüregıne jol tapqan ūstaz» atty respublikalyq ensiklopediiaǧa endı.
Bız joǧaryda, osy mekteptıŋ aşyluyn aŋsaǧan körnektı kompozitor, osy jerdıŋ tumasy Kenjebek Kümısbekovtıŋ esımın bekerge ataǧan joqpyz. Öitkenı, mektep ūjymy jetkınşekterge arnalǧan öner ordasyna ardaqty azamattyŋ esımı berılse dep tılek aitady. Nesı bar, el bolyp qoldaityn ūsynys…
Azamat ESENJOL
