Keşe qala äkımdıgınıŋ «Naz» memlekettık bi teatry elordamyzdyŋ Saryarqa tösıne qonys audarǧanyna 20 toluyna arnap «Täuelsızdık tıregı – Astana» atty konserttık baǧdarlamasyn ūsyndy.
Atalǧan teatr – bas qalanyŋ mädeni ömırınıŋ qalyptasuyna eleulı üles qosyp jürgen ırgelı ūjym. Öner ordasynyŋ aty elımızge ǧana emes, bırqatar şet memleketterge de jaqsy tanys. Onyŋ dälelı, biylǧy qazan aiynda Groznyi qalasynda ötken M.Esambaev atyndaǧy IX Halyqaralyq festivalge qatysyp, jüldelı oralyp, bas şahardyŋ ǧana emes, Qazaq elınıŋ atyn äigıledı.
Söz arasynda aita keteiık, «Naz» teatrynda qazaq bi önerınıŋ babadan qalǧan ülgılerın jaŋaşa türlentıp, ony bügıngı uaqytpen sättı üilestıre bılgen talantty jastar toptasqan. Merekelık konsert te bişıler toby talai baiqaularda top jarǧan «Samǧau», «Tau ūly», «Aq Jaiyq» sekıldı qoiylymdardy jūrtşylyqqa körsetıp, olardyŋ rizaşylyǧyna bölendı. Onyŋ qoiuşy rejisserı, bas baletmeister, Qazaqstannyŋ eŋbek sıŋırgen qairatkerı Qadişa Aǧymbaeva. Sondai-aq, şara barysynda belgılı estrada şeberlerı de tamyljytyp än şyrqap, şaranyŋ sänın kırgızdı.
Bır sözben aitqanda, araily Astanaǧa arnalǧan ädemı saz ben äserlı bige toly keş jinalǧandardyŋ köŋılınen şyqty.
Azamat ESENJOL
