Bızde jūmys ornymyzǧa tap-tūinaqtai kiınıp, ūqypty boianǧan bır kelınşek kırıp keldı. Amandyqtan soŋ jai söz bastap, anany-mynany aita bastady.
«Men numerologpyn. Adamnyŋ jolyn aşyp, kömektese alamyn»…
Äiel jūmsaq ünmen söilep, menıŋ satyp tūrǧan tauarlarymdy körıp jürdı. Bır sätte eŋ qymbat köilektı qolyna alyp «Mynau qanşa?» dep sūrady. Qymbat tūratynyn aityp edım, qanşa bolsa da alatynyn aitty.
Är tauardan paiyzdyq üles alyp jūmys ısteitın men būǧan qalai quanbaiyn. Älgı äieldıŋ aldynda qūrdai jorǧalap kettım. Bır sätte ol oryndyqqa otyrdy. Menıŋ aqşaǧa mūqtaj adam ekenımdı tüsınıp qoiypty. «Senıŋ jolyŋ jabyq tūr. Men kömektesıp, aşyp bereiın» dedı.
Būdan soŋ men de, qasymdaǧy serıktes qyz da otyra qalyp, sol äieldıŋ auzyna qaradyq. Ol tuǧan künımız ben aiymyzdy, jylymyzdy sūrap, qaǧazǧa jazyp, bırdemenı eseptedı de, jalpylama aitylatyn bır sipattamalardy maǧan taŋa bastady…
Ärı qarai ne bolǧanyn bılmeimın. Qasymdaǧy qyzdyŋ anasy auyryp jürgenın aityp, äieldıŋ aldynda jylap otyrǧany ǧana köz aldymda qalypty. Osy ainaldyrǧan 20 minut ışınde älgı äiel ekeumızden on-on myŋnan alyp, taiyp tūrdy.
Aitpaqşy, älgı köilektı satyp alǧan joq. «Erteŋ taŋerteŋ neşede aşylasyŋdar, sol kezde kelemın» dep sendırıp kettı. Aldanyp qalǧanymyzdy keiın ūqtyq.
Ömırımde numerologpen alǧaş jäne soŋǧy kezdeskenım – osy. Jalpy, adamnyŋ psihologqa, numerologqa, taǧy basqalarǧa kırıptar bolǧanyn aqylym qabyldamaityn adam edım…
Ras, būryn patşalar da jūldyzşy ūstaǧan. Bıraq olar aspan älemın jaqsy bıletın, ǧasyrda bır tuatyn ǧalymdar, ülken ılım ielerı edı. Olardyŋ özınıŋ sözderı bırde säikes kelse, endı bırde säikes kelmei jatatynyn bız tarihtan bılemız. Al qazır şe? Äleumettık jelılerde qaptap jürgen būl ne qylǧan jūldyzşylar?
Keide jyn-perınıŋ bärı jer betıne şyǧyp ketken be dep oilap, janym türşıgıp qalady.
Möldır İSA
