Astana qalasy äkımdıgınıŋ «Nūrly jürek» äleumettık qyzmet körsetu ortalyǧy ärtürlı formadaǧy epilepsiia, hromosomalyq aurular, autizm, oligofreniia, söileudıŋ auyr būzylularymen jäne psihikalyq būzylystarmen üilesken serebraldy sal auruy bar, psihikalyq damuy tejelgen balalarǧa stasionarlyq jäne jartylai stasionarda arnaiy äleumettık qyzmet körsetuge arnalǧan. Ortalyq 1981 jyly stasionarlyq jäne jartylai stasionarlyq 3 jastan 18 jasqa deiıngı «Aqyl-esı kem balalarǧa arnalǧan balalar üiı» bolyp aşylǧan edı.
«Mekeme jūmysynyŋ basty maqsaty – balanyŋ qoǧamǧa beiımdeluıne, äleumettenuıne, potensialdy damuyna qolaily, jan-jaqty jaǧdai jasau. Oŋaltu jäne dene bıtımınıŋ kemşılıgın emdeu, qalpyna keltıru, tüzetu arqyly erekşe balalar qoǧamǧa belsene aralasa alady. Ol üşın barynşa mümkındık jasalǧan. Mūndaǧy sensorlyq bölmeler, Montessori bölmelerı, tıgın, aǧaş ūstasy, slesarlyq şeberhanalar, lekoteka, SBO bölmelerı, kompiuterlık synyptar, oiyn labirintter jiyntyǧy, LFK kabinetterı, fizioterapiia men galoterapiia kabinetı (tūz şahtasy) qazırgı tehnikalyq jabdyqtarmen jabdyqtalǧan. Mekeme aumaǧyndaǧy zamanaui aşyq sport alaŋdary, vandalǧa qarsy oiyn keşenderı, futbol alaŋy, basketbol jäne voleibol alaŋdary balalardyŋ igılıgınde» deidı «Nūrly jürek» äleumettık qyzmet körsetu ortalyǧynyŋ direktory Nūrbol Zūlqarnaev.
Üş korpustan tūratyn ortalyqtyŋ bırı elordanyŋ Manas köşesı, 19 mekenjaiynda ornalasqan. №1 ǧimaratta tūraqty tūratyn stasionarlyq bölımnıŋ tärbielenuşılerı ornalasqan. Qazırgı uaqytta onda 116 tärbielenuşı bar. I.Jansügırov, 12/5 mekenjaiynda ornalasqan ekı qabatty №2 ǧimarat kündız kelıp-ketetın 18 jasqa deiıngı balalarǧa arnalyp 2016 jyly aşyldy. 2018 jyly jastar men jasöspırımderge arnalǧan №3 ǧimarat aşyldy, mūnda käsıpke deiıngı eŋbekke daiyndyqqa baulidy. Mekeme tärbielenuşılerı jasyna, jynysyna jäne syrqat deŋgeiıne säikes toptarǧa bölıngen. Toptardyŋ normaǧa säikes jinaqtaluy memlekettık standart talaptaryna säikes. Būl mekemede arnaiy 8 äleumettık qyzmet körsetıledı. Onyŋ bırı – äleumettık-tūrmystyq qyzmet. Tärbielenuşılerdıŋ tamaqtanu sapasyna kündelıktı baqylau jürgızıledı. Tamaqtanu sapasy boiynşa anonimdı saualnama jürgızıledı, onyŋ nätijesı boiynşa eskertuler men ūsynystar basşyǧa jetkızıledı. Qyzmet aluşylarǧa tūrmystyq qyzmet körsetudı qamtamasyz etuge kündelıktı baqylau jürgızıledı, atap aitqanda, kırdı auystyru, onyŋ jiılıgı, juu, ütıkteu jäne t. b. Medisinalyq qyzmet aiasynda mekemedegı balalarǧa jan-jaqty kömek körsetıledı. Emdeu, zerthana-diagnostika zertteuı, sauyqtyru jäne oŋaltu arqyly balalardyŋ densaulyq jaǧdaiyn ünemı tekserıp, jylyna ekı ret käsıbi baqylaudan ötkızedı. Medisinalyq qyzmetten basqa, pedagogikalyq tūrǧydan köp jūmys ıske asady. Negızgı baǧyty – balalardyŋ boiyndaǧy bastapqy jäne qaitalama auytquşylyqty tüzetu, oŋaltuǧa jäne äleumettık eŋbekke beiımdeuge baǧyttalǧan emdeu-qalpyna keltıru, tüzetu-pedagogikalyq jūmysty ūiymdastyru. Mekemede balalardyŋ eŋbek daǧdysyn qalyptastyru boiynşa jūmys jürgızıledı. Tıgın, aǧaş şeberhanalarynda balalar qarapaiym eŋbek etıp, ūjymda jūmys ısteuge maşyqtanyp, öz eŋbegınıŋ nätijesın köruge üirenedı. Būl balalardy eŋbekke baulu qyzmetı boiynşa jüzege asady. Ortalyqta ai saiyn mädeni-būqaralyq jäne animasiialyq baǧdarlamalar boiynşa ıs-şaralar ötıp tūrady. Sonymen qatar köşpelı ıs-şaralar ūiymdastyryluda. Tärbielenuşıler «Barys» komandasynyŋ hokkei oiyndaryna, sauda, oiyn-sauyq ortalyqtaryna, mūrajailarǧa, kinoteatrlarǧa, bouling ortalyǧyna, mūz saraiyna jäne t. b.
oryndarǧa jiı barady. Äleumettık-ekonomikalyq qyzmet aiasynda mügedek balalarǧa tiıstı jeŋıldık, järdemaqy, ötemaqy jäne basqa da tölemderdı aluǧa mekemenıŋ bılıktı ekonomisterı järdemdesedı. Äleumettık-qūqyqtyq qyzmet negızınde 2024 jylǧy jaǧdai boiynşa stasionarlyq bölımşede 116 tärbielenuşı bar, onyŋ ışınde 58 tärbielenuşı – ata-anasynyŋ qamqorlyǧynsyz qalǧandar (ata-ana bolu qūqyǧynan aiyrylǧandyqtan), jetımder, bas tartqandar (ata-anasyn ızdeu jürıp jatyr, Astana qalasynyŋ IID-ne sūrau jıberıldı). Mekemenıŋ negızgı maqsaty – olardy otbasyna qaitaru arqyly stasionarlyq bölımdegı balalardyŋ sanyn azaitu. Ata-anasynyŋ qamqorlyǧynsyz qalǧan balalar arasynan tärbielenuşılerdıŋ ata-anasyn ızdeu jürgızılude.
Jetıstıkter jaiynda aitatyn bolsaq, soŋǧy 10 jylda stasionardaǧy balalar sany 160-tan 120-ǧa deiın azaidy, būl kündızgı kelıp-ketıp jürgen balalardyŋ sanyn 2006 jyly 25 baladan 2018 jyly 110 balaǧa deiın arttyrdy. 2016 jyly №2 ǧimarat (18 jasqa deiıngı kündızgı bölım), 2018 jyly №3 ǧimarat aşyldy (ūldar men jastarǧa arnalǧan kündızgı bölım). Nätijesınde ata-analardyŋ nauqas balalardan bas tartuy azaiyp, balalar otbasynda qaldy, al ata-analar jūmys ısteuge mümkındık aldy. Oquşylar qalalyq, respublikalyq jäne halyqaralyq ıs-şaralarǧa belsendı qatysady. Ol – Spesial Olimpic, «Jūldyzai» jäne t. b. Soŋǧy 10 jylda Spesial Olimpic baǧytynda ärtürlı olimpiadalyq sport türlerınen 115 altyn, 90 kümıs jäne 95 qola medal jeŋıp aldy.
Oŋaltudyŋ zamanaui ädısterı eŋ aldymen pasienttıŋ jeke basyna, joǧalǧan daǧdylardy damytuǧa baǧyttalǧan. Eger nauqastyŋ qabıletsızdıgı onyŋ syrtqy kömeksız jūmys ısteuıne mümkındık bermese, onda oǧan memleket pen qoǧam qamqorlyq jasaidy. Mūndai keşendı şaralar medisinalyq kömektıŋ sapasyn, äleumettık qyzmet etu deŋgeiın arttyruǧa, ömır süru sapasyn jaqsartyp, mügedek bala tärbielep otyrǧan otbasynyŋ auyrtpalyǧyn azaituǧa sep bolady.
